18/07/2019 09:18
728 x 90

Ermənistanın özündən sonra ikinci anti-Rusiya cəbhəsi açıldı...

Elşən Mustafayev:“Paşinyanın Rusiyaya qarşı belə açıq demarşı onu deməyə əsas verir ki, Moskva hakimiyyət dəyişikliyini sürətləndirəcək”

img

Avropa Şurasının Parlament Assambleyası (AŞPA) Rusiya nümayəndə heyətinin təşkilatın işində iştirak etməsinə imkan verən qətnaməni səs çoxluğu ilə qəbul edib. Rusiya nümayəndə heyətinin qayıtmasına Assambleyanın işində iştirak edən 190 deputatdan 118-i səs verib. Daha 62 nəfər qətnamənin əleyhinə səs verib, 10 nəfər isə bitərəf qalıb. Rusiyanın əleyhinə səs verən ölkələrdən biri də Ermənistan olub.

Belə ki, AŞPA-dakı erməni nümayəndə heyətində müxalifət fraksiyalarının nümayəndələri Naira Zöhrabyan ("Çiçəklənən Ermənistan") və Edmon Marukyan ("İşıqlı Ermənistan") Rusiyanın AŞPA-ya qayıtması üçün səs veriblər, amma hakim "Mənim addımım" partiyasının iki deputatı Rusiyanın AŞPA-ya qayıtmasına imkan verən qətnaməni dəstəkləməyib. Daha dəqiq desək, Ermənistan Parlamentinin Xarici Əlaqələr üzrə Daimi Komitəsinin sədri Ruben Rubinyan qətnamənin qəbul edilməsinin əleyhinə səs verib, deputat Hovannes İgityan isə səsvermədə ümumiyyətlə iştirak etməyib. Onun adı lehinə və əleyhinə səs verən deputatların siyahısında yoxdur. Faktiki olaraq, Paşinyan hakimiyyətinin Rusiyaya qarşı açıq cəbhə açdığı tam üzə çıxmış olub. Bu tendensiya həm ölkənin daxilində, həm də xaricində- AŞPA səviyyəsində özünü göstərir. Köçəryanın həbsdən buraxılması ətrafında baş verən hadisələrin fonunda Rusiyanın həmin ölkədəki səfirinin göstərdiyi fəaliyyət və buna görə ona Ermənistan rəhbərliyi tərəfindən edilən xəbərdarlıq göstərdi ki, Ermənistanda anti-Rusiya çıxışları xüsusilə aktivləşməyə başlayıb. Paşinyanın partiyasının bu mövqeyi beynəlxalq arenada da açıq ortaya qoyması ciddi mətləblərdən və açıq mübarizəyə start verildiyindən xəbər verir. Ekspert Elşən Mustafayev “Bakı-Xəbər”ə açıqlamasında bildirdi ki, bu artıq Paşinyan hakimiyyətinin Rusiya ilə açıq konfrontasiyaya getdiyini şərtləndirən amildir: “Paşinyan hakimiyyətə təsadüfən gəldi. Onun özü də siyasi karyera baxımından kasad personadır. Sadəcə, alovlanan xalq etirazı fonunda onun hakimiyyətə inqilab yolu ilə gələ bilməsi reallaşa bildi. Ona qədər olan hakimiyyətlər Rusiyapərəst sayılırdı. Paşinyanı hakimiyyətə gətirən qüvvələr isə Rusiyanın təsirini orda azaltmaq niyyətini nəzərdə tuturdular. Görünən budur ki, Paşinyanın fəaliyyəti Rusiyanı qane etməyib və Moskva onun hakimiyyəti üçün alternativlər axtarmağa başlayıb. Paşinyan Köçəryanla bağlı baş verən proseslərdə bunu aydın sezə bilib. Bu səbəbdən də, həm ölkənin daxilində, həm də beynəlxalq arenada açıq anti-Rusiya fəaliyyətinə start verib. Bunun bir səbəbi də Gürcüstanda baş qaldıran anti-Rusiya ovqatı ilə bağlıdır. Rusiyanı istəməyən dairələr bu iki Qafqaz ölkəsində proseslərin paralel getməsini istəyir. Təbiidir ki, Rusiya Ermənistanın bu addımlarını, AŞPA səviyyəsində ona qarşı olan təxribatını cavabsız qoymayacaq. Çünki hətta bəzi Avropa ölkələri belə Rusiyanı dəstəklədiyi halda, onun vassalı sayılan bir ölkənin belə davranışını Moskva qulaqardına vura bilməz. Rusiya Ermənistanı əlindən verməyəcək və bunu istəmir. Sadəcə, hadisələrin bu gedişi və Paşinyanın Rusiyaya qarşı belə açıq demarşı onu deməyə əsas verir ki, Moskva hakimiyyət dəyişikliyini sürətləndirəcək. Buna tam əmin olan Paşinyan təzədən Köçəryanı həbsə saldırdı. Önümüzdəki qısa zamanda biz Ermənistandakı daxili vəziyyətin necə gərginləşəcəyini görəcəyik. Əslində, bütün bu kataklizmlər bizə sərf edir. Yaranmış vəziyyətdən maksimum yararlanmağa çalışmalıyıq”.

Məhəmmədəli QƏRİBLİ

 

Son xəbərlər