18/09/2019 22:31
728 x 90

Qondarma "DQR" ATƏT sədrinin şəxsi nümayəndəsini "üç qəpiklik"elədi – “hansı Azərbaycan-artsax sərhədi?”

Əli Orucov: “Erməni tərəfinin yaydığı məlum yalan informasiyaya ATƏT-in reaksiya verməməsi rəzalətdir”

img

“Münaqişənin həlli həmsədrlər üçün əsas məsələ deyil”

 

Erməni tərəfi ənənəvi olaraq təxribat xarakterli yalan informasiyalar yaymaqda davam edir. Bu arada isə qarşı tərəf növbəti dəfə yalan informasiya uydurub. Belə ki, erməni tərəfinin yaydığı məlumata görə, müvafiq razılaşmaya əsasən, iyunun 25-də ATƏT-in müşahidə missiyası atəşkəslə bağlı Azərbaycan və qondarma “DQR” sərhədində monitorinq aparıb. ATƏT-in sözügedən məsələ ilə bağlı monitorinq aparması yeni deyil, amma bunu guya Azərbaycanla “DQR” arasında sərhəddə aparılması kimi təqdim etmək sırf təxribat və yalandır. Həyasızlığın dərəcəsinə baxın ki, erməni tərəfi ATƏT-i də öz yalan informasiyasına şərik edir. Bu azmış kimi, iddia edirlər ki, guya Azərbaycan monitorinq missiyasının işinə öz tərəfində şərait yaratmayıb və s. Məsələnin digər tərəfi ondan ibarətdir ki, Dağlıq Qarabağ münaqişəsinin tənzimlənməsini öz üzərinə götürən ATƏT-in Minsk Qrupu erməni tərəfinin yaydığı bu yalan informasiyaya reaksiya vermir. Erməni tərəfi yazanda ki, ATƏT Azərbaycan-“artsax respublikası” sərhədində monitorinq aparıb, həmsədrlər niyə buna reaksiya vermir? ATƏT-in fəaliyyətdə olan sədrinin şəxsi nümayəndəsi Anjey Kaspşik niyə demir ki, ay yaramazlar, biz qondarma “artsax adlı respublika” tanımırıqsa, onun hansı sərhədində monitorinq apara bilərik? Yazsaydılar ki, münaqişə tərəflərinin və ya Azərbaycan-Ermənistan qoşunlarının təmas xəttində monitorinq keçirilib, bu başqa. Yoxsa bunu Azərbaycan-“DQR” sərhədi kimi təqdim etmək sırf təxribatdır və ATƏT-in borcudur ki, buna reaksiya versin. Başqa bir tərəfdən, qarşı tərəf iddia edir ki, Azərbaycan guya monitorinqdə maraqlı deyil. Nəzərə alsaq ki, Azərbaycan atəşkəsi pozmur, o zaman monitorinqin aparılmasında niyə maraqlı olmamalıdır? Məsələyə münasibət bildirən AMİP funksioneri Əli Orucovun sözlərinə görə, erməni tərəfinin yaydığı məlum yalan informasiyaya ATƏT-in Minnsk Qrupunun reaksiya verməməsi rəzalətdir: “Buna başqa bir ad verməkdə çətinlik çəkirəm. Zatən mütəmadi olaraq bölgəyə səfər edən həmsədrlərin sifətini görməkdən xalq bezib. Xüsusən də illərdir heç bir işə yarımayan ATƏT-in fəaliyyətdə olan sədrinin şəxsi nümayəndəsi Anjey Kaspşiki hər dəfə görmək adamda allergiya yaradır. Hesab edirəm ki, bütün bunlar ATƏT-in Minsk Qrupunun münaqişənin həllinə biganə yanaşmasının növbəti əyani göstəricisidir. Həmsədrlər buna ciddi yanaşsaydılar, dərhal adekvat reaksiya verib ortaya mövqe qoyardılar. Belə olduqda işğalçı tərəf bu cür təxribat və yalan xarakterli informasiyalar yaymağa cəsarət etməzdi. Onlar görəndə ki, həmsədrlər Ermənistanın nazı ilə oynayır, o zaman istədiklərini edirlər. Başqa bir tərəfdən, ATƏT-in Minsk Qrupunun əsas məqsədi odur ki, müharibə başlamasın. Təəssüflər olsun ki, nəticəsiz danışıqlar fonunda buna nail də olurlar. Münaqişənin həlli həmsədrlər üçün əsas məsələ deyil. Belə olmasaydı, o zaman işğalçı tərəfə təzyiq göstərərdilər. Ona görə də sözügedən məlumata ATƏT-in reaksiya verməməsi mənə təəccüblü görünmədi”.

Vidadi ORDAHALLI

 

Son xəbərlər