M.Lomonosov adına Moskva Dövlət Universitetinin Botanika bağında keçirilən Azərbaycan Mədəniyyəti günlərində “Vestnik Kavkaza” saytının müxbirinin suallarını cavablandıran Heydər Əliyev Fondunun vitse-prezidenti Leyla Əliyeva ona Minskdə II Avropa Oyunları zamanı Çeçenistan prezidenti Ramzan Kadırovla görüşündən də bəhs edib.
Baki-xeber.com-un xəbərinə görə, Leyla Əliyeva deyib ki, görüş spontan alınıb və qısa sürüb. ”Ramzan Kadırov səmimi və çox pozitiv insandır” deyən vitse-prezident görüşdən sonra Çeçenistan prezidentinin özünün sosial şəbəkə səhifəsində Azərbaycan haqqında çox gözəl sözlər yazdığını bildirib və onun Azərbaycan haqqında müsbət rəyindən qürur duyduğunu deyib. Leyla Əliyeva onu da deyib ki, Çeçenistana səfər edəcəyinə ümid edir, eyni zamanda, ekologiya və ətraf mühitin müdafiəsində bir çox birgə xeyirxah işlər görə biləcəklərinə inanır.”Habelə, qəyyumluğa möhtac uşaqlar mövzusunda da fəaliyyət göstərmək olar. Ümid edirəm ki, Heydər Əliyev Fondunun xəttilə Çeçenistan Respublikasına səfər etmək və müvafiq sosial layihələrdə iştirak etməyimiz mümkün olar - deyən L.Əliyeva eyni zamanda qeyd edib ki, Çeçenistanda musiqini qiymətləndirirlər və o üzdən orada konsert də təşkil etmək olar. “Axı musiqi dünyanı daha yaşamalı edir”- o deyib.
Xatırladaq ki, sözügedən görüş şənbə günü baş tutub və Ramzan Kadırov vurğulayıb ki, Azərbaycan ölkəsinin ən yaxın qonşusu, Rusiya üçün dost ölkədir. Bu dostluğun əldə olunmasında Rusiya prezidenti Vladımır Putinlə Azərbaycanın dövlət başçısı İlham Əliyev arasındakı möhkəm dostluğun xüsusi rol oynadığını deyən Ramzan Kadırov Azərbaycan prezidenti ilə aralarındakı səmimi münasibətdən də danışıb.
Vkontakte sosial şəbəkəsində isə Çeçenistan prezidenti yazıb ki, Minskdə Milli Məclisin sədri Oqtay Əsədovla və Heydər Əliyev Fondunun vitse-prezidenti Leyla Əliyeva ilə görüş onda xoş təəssürat yaradıb. Ramzan Kadırov onu da qeyd edib ki, bu il Leyla Əliyevanı Qroznıda görməkdən məmnunluq duyar və bu əlaqələr nəticəsində iki ölkə arasında mədəni, idman və humanitar sahədə əməkdaşlığın genişlənəcəyindən əmindir.
Baki-xeber.com
