18/07/2019 09:19
728 x 90

Avroittifaq ali komissarın Mnasakanyanla Qarabağ müzakirəsi barədə məlumat yaymadı - erməni təbliğatı istədiyi yalanı danışmaq imkanı əldə etdi…

Ramil Hüseynov: “Bu ondan xəbər verir ki, Mogerini - Mnasakanyan görüşü o qədər də uğurlu alınmayıb”

img

“Bir il əvvəl Aİ-nin Paşinyandan gözləntiləri daha böyük idi”

Avropa İttifaqının xarici siyasət və təhlükəsizlik məsələləri üzrə ali nümayəndəsi Federika Mogerini Ermənistanın xarici işlər naziri Zohrab Mnasakanyanla görüşüb. Görüşdə bir sıra məsələlər, xüsusən də Dağlıq Qarabağ münaqişəsi ətraflı müzakirə edilib. Mogerini Mnasakanyanla görüşdə sözügedən məsələyə daha çox yer ayırıb. Ancaq diqqəti çəkən məqam odur ki, erməni mətbuatı, nədənsə, Mogerini - Mnasakanyan görüşü barədə çox məhdud çərçivədə məlumat yayıb. Görüşdə müzakirə olunan məsələlər barədə, o cümlədən Qarabağla bağlı aparılan müzakirələr haqqında geniş məlumat verməyib. Halbuki, tərəflərin görüşü zamanı bu məsələ geniş müzakirə edilib. Ən maraqlı məqam odur ki, sözügedən görüş barədə Aİ heç bir məlumat yaymayıb. Xüsusən də Qarabağ məsələsi barədə hansı müzakirələrin getdiyi bildirilməyib. Adətən bu cür görüşlər barədə qurumun rəsmi saytında məlumat yerləşdirilir. Nədənsə, Mogerini - Mnasakanyan görüşü barədə bu baş vermədi. Erməni mətbuatı da bundan isifadə edərək öz yalanlarını yayır. Maraqlıdır, Avropa İttifaqı niyə bu barədə məlumat yaymayıb?

Məsələyə münasibət bildirən VİP-in sədr müavini Ramil Hüseynovun sözlərinə görə, bu ondan xəbər verir ki, Mogerini - Mnasakanyan görüşü o qədər də uğurlu alınmayıb: “Çox güman ki, Mogerini Mnasakanyana Ermənistanın inkişaf etməsinin Qarabağ münaqişəsinin həllindən asılı olduğunu deyib. Ötən bir ildə Ermənistanda yeni hakimiyyətin bu yöndə yetərincə cəsarətli addımlar ata bilmədiyi deyilib. Görünür, məlum olub ki, Paşinyan hakimiyyəti get-gedə Rusiyadan daha çox çəkinməyə başlayıb. Bu da Avropa İttifaqının maraqlarına cavab vermir. Baxmayaraq ki, bir il əvvəl Aİ-nin Paşinyandan gözləntiləri daha böyük idi. Hesab edirdilər ki, Paşinyan Ermənistanın Rusiyadan asılılığının azaldılması istiqamətində daha ciddi addımlar atar, islahatlar həyata keçirər və s. Ancaq son aylar Paşinyanın siyasi gedişlərinə baxdıqda məlum olur ki, o, Rusiyaya doğru reveranslarını artırıb. Avrasiya İqtisadi İttifaqında iştirak fəallığını artırıb. İqtisadi imkanları məhdud olmağına rəğmən, Rusiyadan kredit hesabına əlavə silahlar almağa çalışır. Özü də Rusiyadan alınan kredit hesabına. Təbii ki, bu kimi addımlar Ermənistanın Rusiyadan asılılığının azalmasına yox, əksinə, daha da artmasına xidmət edir. Hesab edirəm ki, Aİ-nin bu yöndə narahatlığı Mogerini - Mnasakanyan görüşündə ifadə olunub. Ermənistanın Avropa təsisatlarından sərmayə və maliyyə yardımları ilə bağlı gözləntiləri böyükdür. Ancaq Aİ bəzi proqramlar çərçivəsində Ermənistana müəyyən maliyyə yardımı göstərsə də, böyük vəsaitlər ayırmağa tələsmir. Fikrimcə, nə qədər ki, Ermənistan Aİ-nin şərtlərini yerinə yetirməyib, böyük maliyyə yardımları olmayacaq”.

Vidadi ORDAHALLI

Son xəbərlər