“Dünya Azərbaycanlıları Gənclər Şəbəkəsi” vasitəsilə xaricdəki gənclərimizə daha düzgün və planlı şəkildə istiqamət verilsə, onlar yüksək səviyyədə Azərbaycanın xeyrinə işlər görər”
Bu günlərdə Azərbaycan diasporunun birləşdirilməsi yolunda mühüm addım atılıb. Diaspor Gənclərinin I Yay düşərgəsinin iştirakçıları “Dünya Azərbaycanlıları Gənclər Şəbəkəsi”nin yaradılması haqqında qərar verib və bu barədə bəyannamə qəbul olunub. Bəyannamədə gənclər bildiriblər ki, dünya gəncləri ilə birlikdə sülh, qardaşlıq və dostluğun təbliği, ətraf mühitin mühafizəsi, elmin və təhsilin inkişafı istiqamətində əməkdaşlıq edəcək, qlobal problemlərə qarşı birlikdə mübarizə aparacaq, dünya azərbaycanlılarının daha sıx birliyinə çalışacaq, Azərbaycan Respublikasında həyata keçirilən sosial-iqtisadi və siyasi-hüquqi islahatlara dəstək verəcəyik. “Dünya Azərbaycanlıları Gənclər Şəbəkəsi”nin üzvləri gələcək fəaliyyətləri ilə bağlı qətnamə imzalayıblar. Qətnamədə gənclərin birliyi və qarşılıqlı əlaqələrini təmin edəcək bir təşkilatın yaradılması alqışlanır.
Diaspor gəncləri tərəfindən yeni təşkilatın yaranmasının əhəmiyyəti barədə danışan Diaspor Fəaliyyətinə Jurnalistlərin Dəstəyi İctimai Birliyinin sədri Fuad Hüseynzadə “Bakı-Xəbər”ə açıqlamasında qeyd etdi ki, xaricdəki gənclərimiz artıq yeni bir gücə çevrilib: “Gənclər Azərbaycanın xaricdəki düşünən beyni, ictimai-siyasi, elmi potensialıdır. Məhz buna görədir ki, onlar Vətən məsuliyyətlərini dərk edir və baş verən proseslərdən kənarda qalmaq istəmirlər. Xaricdəki gənclərimiz kifayət qədər təşkilatlanıblar və ölkəmizin aktiv təbliğatını aparırlar. Lakin bütün bu fəaliyyətlər bir çox hallarda dağınıq olduğu üçün onları Azərbaycandan koordinasiya edən hər hansı təşkilata ehtiyac duyulurdu. Bu baxımdan “Cümhuriyyətin 100 illiyi” Diaspor Gənclərinin I Yay Düşərgəsinin nəticəsi olaraq “Dünya Azərbaycanlıları Gənclər Şəbəkəsi”nin yaradılması çox müsbət haldır. Bu Şəbəkə xaricdəki gəncləri motivə edib Azərbaycan adına birləşdirmək baxımından da önəmlidir. İnanırıq ki, bundan sonra xaricdəki gənclər şəbəkə şəklində fəaliyyət göstərəcəklər. Bir yerdə işləyib, güclü lobbi yarada biləcəklər. Çünki xaricdəki gənclərin lobbiçilik işinə cəlb olunması vacib amildir”.
Həmsöhbətimiz onu da vurğuladı ki, bu gün beynəlxalq əlaqələrdən də istifadə edib daha geniş formada ölkəmizi tanıtmaq və dünyada güclü mövqeyə malik olan siyasi mərkəzlərlə əməkdaşlıq edilməlidir. Bu işdə xaricdəki savadlı və intellektual səviyyəli gənclərin bilik və bacarığından maksimum yararlanmaq olar: ““Dünya Azərbaycanlıları Gənclər Şəbəkəsi” vasitəsilə xaricdəki gənclərimizə daha düzgün və planlı şəkildə istiqamət verilsə, onlar yüksək səviyyədə Azərbaycanın xeyrinə işlər görərlər. “Dünya Azərbaycanlıları Gənclər Şəbəkəsi” xaricdəki gənclərimizin səylərini birləşdirərək mərkəzləşmiş qaydada koordinasiya etməlidir”.
Günel CƏLİLOVA
