Məlum olduğu kimi, uzun illər əvvəl Xətai rayonu, Rəşid Bağırov 36/12b ünvanında kollektor üzərində tikilmiş ikimərtəbəli evin sökülməsi qərara alınıb. Mütəxəssislərin rəyinə görə, gələcəkdə oxşar halların digər ərazilərdə təkrarlanmaması üçün qanunsuz inşa edilmiş evin təcili sökülməsi və xəttin bərpası zəruri hesab olunur.
Qeyd edək ki, həmin evin bünövrəsinin çökməsi nəticəsində kollektorun bir hissəsi tutulub və kollektorda yağış sularının kənarlaşdırılması problemi yaranıb. İstismarda olan hər iki şəbəkənin üzərində inşa edilmiş tikililin yaratdığı izafi yüklənmə, eləcə də bu səbəbdən xətlərə vaxtlı-vaxtında texniki qulluğun göstərilməsinin mümkünsüzlüyü nəticəsində içməli su xəttində qəza baş verib. Həmçinin yaşayış evinin altından keçən kanalizasiya xətti isə daha dərində yerləşir. Ehtimal olunur ki, yüklənmə nəticəsində öncə kanalizasiya kollektoru sıradan çıxıb, daha sonra bu, su xəttinin də zədələnməsinə səbəb olub.
Bu durumda Bakıda 1600-ə yaxın tikilinin kanalizasiya və yağış kollektorlarının mühafizə zolağında və üzərində inşa olunduğu məlum olub. “Trend” agentliyi bu barədə məlumatı etibarlı mənbədən əldə edib. Bildirilib ki, Bakı Sukanal İdarəsinin balansında və istismarında olan kanalizasiya və yağış kollektorlarının mühafizə zolaqlarında və üzərində 1600-ə yaxın tikili mövcuddur. Mənbənin sözlərinə görə, bu isə sıradan çıxan kollektorların təmir və bərpasını çətinləşdirir. Bu fonda “Sitat.info” portalı isə mənbəyə istinadən yazır ki, Bakıda əslində 3 min ev su kollektorlarının üzərində tikilib. Bildirilib ki, Bakıda və Abşeronda ümumilikdə 3 min ev su kollektorlarının üzərində inşa edilib. Mənbə bildirib ki, bu hal əsasən son 10 il ərzində qeydə alınıb. Bu isə sıradan çıxan kollektorların təmir və bərpa edilməsini çətinləşdirib. Bugünlərdə isə kollektorların üzərində yerləşən evlərin söküntüsünə başlanılıb. Qeyd edək ki, Bakının Xətai rayonu, Rəşid Bağırov küçəsində üzərində evlər tikildiyinə görə diametri 1200 mm olan tullantı su kollektoru çöküb, ərazidəki evləri su basıb. Qəzaya səbəb olan ev sökülüb.
Tahir TAĞIYEV
