Sülhməramlıların Azərbaycan ərazisindən çıxarılması ilə bağlı qərarın qəbul olunmasından sonra Prezident İlham Əliyevin Rusiyaya səfəri mühüm əhəmiyyət daşıyırdı. Bu, ölkələr arasındakı əlaqələrin gələcək perspektivlərinin müəyyənlşdirilməsi, Qafqazın bundan sonrakı taleyinin necə olacağının aydınlaşdırılması baxımından da vacib idi. Prezident İlham Əliyevin Rusiyada yüksək səviyyədə qarşılanması, ümummilli liderimiz Heydər Əliyevin xatirəsinə göstərilən böyük ehtiram, Prezident Putinin görüşlərdəki səmimi jestləri Rusiyanın Azərbaycanı etibarlı tərəfdaş, Cənubi Qafqazın söz sahibi, İlham Əliyevi isə dünyada və regionda baş verən proseslərə ciddi təsir imkanına malik lider kimi qəbul etdiyinin göstəricisidir.
Ölkələr arasındakı qarşılıqlı əlaqələrin yüksək səviyyəyə çatması Prezident İlham Əliyevin apardığı uğulu siyasətin nəticəsidir. Dövlətimizin başçısı son illər daxili və xarici təzyiqlərə baxmayaraq, şimal qonşumuzla münasibətlərin gərginləşdirilməsinə gətirib çıxaracaq heç bir addım atmadı. Beynəlxalq güclər, proseslərin gedişindən xəbəri olmayan yerli siyasətçilər Rusiyaya qarşı sanksiyalara qoşulmaq çağırışı etsə də, Azərbaycan Prezidenti milli maraqlarımıza uyğun siyasət yürütdü. İlham Əliyev bəzi hallarda Rusiyanın kaprizlərinə, Azərbaycan əleyhinə fəaliyyətinə təmkinlə yanaşdı, uğurlu diplomatik gedişlərlə bütün təhlükələri dəf edə, şimal qonşumuzu tamamilə neytrallaşdıra bildi.
Rusiya böyük dövlətdir. 2022-ci ildən sonra dünyanın demək olar ki, əksər qüdrətli ölkələri Rusiyaya qarşı birləşsə də, onu məğlub edə bilmir. Rusiya ilə münasibətlərin korlanması ölkəmizə yaxşı heç nə vəd etmir. Ukrayna nümunəsi göz qabağındadır. İki il bundan öncə rahat, firavan həyatını yaşayan Ukrayna xalqı bu gün od içində yanır. Ukraynanın böyük bir hissəsi darmadağın edilib. Müharibə qurtardıqdan sonra Ukraynanın bərpasına azı 20 il vaxt lazımdır. İqtisadi itkiləri uzun bir vaxtdan sonra bərpa etmək olacaq, ancaq müharibdə öldürülən yüz minlərlə ukraynalının həyatını geri qaytarmaq mümkün deyil.
Bəs Azərbaycanda nə baş verdi? Prezident İlham Əliyev siyasətə səhnədən gəlmədiyindən, yetkin siyasətçi olduğundan onu aldada bilmədilər. Dövlətimizin başçısı hələ 10 il bundan əvvəl dünyanın hara getdiyini görürdü. Onun 10 il bundan əvvəl atdığı addımlar, yürütdüyü siyasət bu günə hesablanmaşdı. Qərbin, Şimalın "Dirijor çubuğu" ilə deyil, milli maraqlarımızın diqtə etdiyi istiqamətdə hərəkət etməyimiz Azərbaycan xalqının tarixdə misli görünməmiş uğurlar qazanmasına gətirib çıxardı. Bu gün Azərbaycan son 100 il ərzində suverenliyini tam bərpa etmiş, son 200 ildə ilk dəfə qalib ölkə statusu qazanmış qüdrətli dövlətə çevrilib. Son 100 ildə ilk dəfədir ki, ölkəmizin ərazisində başqa bir dövlətin ordusu yoxdur. Və biz bu uğurlara Prezident İlham Əliyevin dərin zəkası, diplomatik məharəti sayəsində nail olmuşuq. Rusiya ilə münasibətlərin gərginləşdirilməməsi, əksinə, əlaqələrin daha da inkişaf etdirilməsi, Rusiya-Türkiyə əlaqələrinin indiki səviyyəyə gəlib çatmasında Azərbaycan liderinin rolu regional təhlükəsizliyin təmin olunmasına da öz töhfəsini verir.
Prezident İlham Əliyev ilk dəfə idi ki, suverenliyimizi əlimizdən alan ölkəyə suverenliyini tam bərpa etmiş dövlətin lideri kimi getmişdi. Doğrudur, antiterror əməliyyatından, Xankəndidə bayrağımızın ucaldılmasından sonra Azərbaycan öz suverenliyini bərpa etmişdi. Ancaq sülhməramlı da olsa, ölkəmizin ərazisində başqa dövlətin ordu hissələri var idi. Ona görə də ölkəmizin suverenliyinin möhkəmləndirilməsinə təhdid yaranmışdı. Rusiya sülhməramlılarının Azərbaycan ərazisindən çıxarılmasından sonra suverenliyimiz tam bərpa edilməklə yanaşı, həm də möhkəmləndirildi. Məhz bu prosesdən sonra Prezident İlham Əliyevin suverenliyini tam bərpa etmiş ölkənin lideri kimi ilk Rusiyaya səfər etməsi həm böyük rəmzi məna daşıyır, həm də Rusiyaya və bütün dünyaya ciddi mesajdır. Bu o deməkdir ki, bir dövr qapandı, indi qüdrətli Azərbaycan var və bizim ölkəmizlə hesablaşmaq zamanıdır.
Dövlətimizin başçısının Prezident Putinlə görüşdə səsləndiridiyi bu fikirlər Azərbaycanın indiki mövqeyini davam etdirməsinin Rusiyada asılı olduğuna işarədir: "Ölkələrimiz arasında əməkdaşlıqdan, qarşılıqlı fəaliyyətdən çox şey asılıdır. Biz qarşılıqlı fəaliyyət və qarşılıqlı maraqlar ruhunda etimad tədbirlərinin, əməkdaşlığın, qarşılıqlı anlaşmanın möhkəmləndirilməsinə və bütün məsələlərin nizamlanmasına çalışırıq".
Ölkəmizin rəhbəri Rusiya liderinə açıq şəkildə deyib ki, bundan sonra da milli maraqlarımıza cavab verməyən heç bir addım atılmayacaq, heç bir fəaliyyət qəbul edilməyəcək. Yəni Rusiya Azərbaycanı itirmək istəmirsə, Cənubi Qafqazla bağlı ambisiyalarından əl çəkməli, regionda tərəf tutmamalı, ədalətli olmalı, bizim suverenliyimizə təhdid yaratmamalıdır.
Prezident İlham Əliyev çıxışında Cənubi Qafqazda Rusiyanın maraqlarına zidd addımlar atılmayacağına, başqa qlobal güclərin regiona buraxılmayacağına da işarə edərək bu sözlərlə Rusiya liderinə təminat verib: "Rusiya Qafqazda və daha geniş coğrafiyada regional təhlükəsizlik üzrə əsas ölkədir".
Digər dünya liderləri kimi, Putin də sözü imzası qədər keçərli olan Azərbaycan Prezidentinə inanır, ona etibar edir.
Bütün bunları ümumiləşdirərək deyə bilərik ki, Azərbaycanla Rusiya arasında əlaqələr yeni dövrə qədəm qoyur. Bu dövr əvvəlki dövrlərdən fərqlənir. İndi Azərbaycan Rusiya ilə tam bərabərhüquqlu əməkdaşlıq münasibətləri qurur.
Rusiya lideri Putinin bu səfər zamanı Azərbaycan Prezidentinə göstərdiyi yüksək diqqət, ehtiram və səmimi münasibət heç nəyin əvvəlki kimi olmayacağını deməyə əsas verir.
Keçmiş Sovetlər Birliyi məkanında Heydər Əliyevdən sonra Rusiyanı rəhbərlik etdiyi ölkənin maraqlarına uyğun siyasət aparmağa, dövlətinin milli maraqlarını nəzərə almağa vadar edən, xalqının istəklərini mərhələ-mərhələ yerinə yetirən yeganə LİDER İlham Əliyevdir.
Mənə elə gəlir, bu fotonun çəkildiyi vaxt İlham Əliyev Putinə deyir ki, nəhayət, mən atamın daha bir vəsiyyətini yerinə yetirdim, suverenliyini tam bərpa etmiş Azərbaycanı qurdum. Putin isə deyir ki, Siz də atanız kimi, regionun inkişafına böyük töhfələr verirsiniz. Yeni dövr dövlətimiz və xalqımız üçün daha uğurlu olacaq.
Tural Səfərov
