Azərbaycan dövlətinin siyasi qüdrəti, Prezident İlham Əliyevin siyasi iradəsinin və sərkərdəlik istedadının, müstəqil siyasət kursunun daha bir möhtəşəm uğuru göz qarşısındadır. 44 günlük zəfər müharibəsindən sonra regiona yerləşən rus sülhməramlı qüvvələri artıq Qarabağ ərazisindən çıxarılır. Rusiya sülhməramlılarının Qarabağa yeridilməsindən sonra bir çoxlarının israrla "Rusiya regiona yerləşdi və bir daha Qarabağı tərk etməyəcək" deməsi artıq fiaskoya uğradı. Xüsusilə Azərbaycandakı radikal düşərgə təmsilçiləri və xaricdəki "blogger" sürüsü bu dəfə də dedikləri qələtin qurbanı oldular. Artıq onların öz dilindən etiraflar ard-ardına gəlməkdədir. Tarixi proses qarşısında başqa nə deyəcəklər ki?
Xüsusilə Azərbaycan liderinin bir çox ölkələrin liderlərinə nümunə olan siyasi iradəsi və liderlik keyfiyyətləri qarşısında bütün nankorlar MAT durumuna düşüblər.
Digər bir baxımından rus qoşunlarının ərazilərimizi tərk etməsi Xankəndi, Şuşanın işğaldan azad edilməsi qədər mühüm əhəmiyyət kəsb edən bir məsələdir. Bu torpaqlarımızı azad etdikdən sonra başlanan proseslərin son nöqtəsidir. Azərbaycanın bütün ərazisi üzərində dövlət suverenliyini "şəriksiz" bərpa etməsinin nəticəsidir.
Üçtərəfli bəyanat əsasında rus qoşunları Azərbaycan ərazisində yerləşmişdi. Yəni, biz bunu hətta parlamentdə ratifikasiya belə etmədik. Bu da cənab Prezidentin böyük bir cəsarəti idi və parlamentə ratifikasiya ilə bağlı müraciət etmədi. Rus qoşunlarının ərazilərimizi tərk etməsi Azərbaycanın növbəti uğuru, nailiyyətidir. Daha bir fakta müraciət edək.
Rusiya Dövlət Dumasının Müdafiə komitəsi sədrinin birinci müavini Aleksey Juravlyov mətbuata açıqlamasında bildirib ki, Rusiya sülhməramlı kontingentinin (RSK) Qarabağdakı missiyası tam yerinə yetirilmiş hesab edilə bilər, çünki Qarabağın Azərbaycana məxsus olması ilə bağlı artıq heç kim mübahisə etmir. O qeyd edib ki, RSK-nın missiyası tam yerinə yetirilmiş hesab edilə bilər, yəni, Rusiya hərbçilərinin artıq evə qayıtmaq vaxtı çatıb.
Deputat qeyd edib ki, indi sülhməramlılara ehtiyac yoxdur, çünki Qarabağda heç bir münaqişə tərəfi qalmayıb və Qarabağın Azərbaycana məxsus olması ilə bağlı artıq heç kim mübahisə etmir.
Eyni zamanda, politoloq Aleksey Naumov bildirib ki, 2023-cü ilin sentyabrında Qarabağdakı antiterror əməliyyatından sonra Moskva sülhməramlılarla bağlı bütün məsələləri Bakı ilə həll edib. O deyib ki, Qarabağın Azərbaycana qayıtmasından sonra Moskva sülhməramlılar haqqında yalnız Bakı ilə dialoq aparacağını vurğulayıb və indi bu dialoqun nəticəsi görünür. Rusiyalı deputatın bu açıqlaması proseslərin mahiyyəti baxımından çox aktualdır.
Digər bir məqama diqqət göstərək. Elə 10 noyabr bəyannaməsindən sonra da müxtəlif dairələrdə rəylər və bəyanatlar verilirdi ki, sülhməramlılar bura nəinki 5 illik gəliblər, hələ bundan sonrakı 5 il də uzadılacaq. Amma bu gün biz sülhməramlıların vaxtından əvvəl ölkəmizdən çıxdığının şahidi oluruq. Bu tarixi proses artıq başlayıb və Azərbaycanın siyasi mənafeləri çərçivəsində reallaşmaqdadır.
Mətləb
