Tələbə adını qazanmaq hər bir gəncin arzusudur. Bir çox əziyyətlərə qatlaşaraq, 11 il enişli-yoxuşlu yolları fəth edərək bu adı qazanmaq mənə elə gəlir ki, tək mənim üçün yox, bütün gənclər üçün qürurvericidir. Çox əziyyət çəkdim, çalışdım yeri gəldi gecəmi gündüzümə qatdım, nəticədə arzusunda olduğum o adı qazandım. Belə bir məsəl var "Əziyyət çək, bəhrəsini görəcəksən" mən bu sözə inanmağa başladım ki, həqiqətən əziyyət çəksək sonda mütləq mükafatlanacayıq. Uğur qazanmağın ən birinci yolu tənbəlliyin daşını atmaqdır. Qarşımıza qoyduğumuz məqsəd uğrunda çalışsaq, istəyimizə nail olarıq. İndi hazırda ölkəmizin sayılıb-seçilən universitetlərindən biri olan Bakı Slavyan Universitetində tələbəyəm. İstədiyim, arzusunda olduğum jurnalistika fakültəsi üzrə təhsil alıram. Mənim üçün bu universitetdə tələbə olmaq nə qədər sevinclidirsə, bir o qədər də qürurvericidir.
BSU-nun tarixi 1946-cı ildən başlayıb. Bu ali məktəb Ümummilli lider Heydər Əliyevin 13 iyun 2000-ci il tarixli fərmanı ilə M.F.Axundov adına Azərbaycan Pedoqoji Rus dili və Ədəbiyyatı institutunun bazasını genişləndirməklə Bakı Slavyan Universiteti yaradılıb. Elə həmin il Kamal Abdulla Respublika Prezidentinin Fərmanı ilə BSU-nun rektoru təyin edilib. 2021-ci ildən isə universitetin rektoru Anar Nağıyev təyin edildi. Anar müəllimi tanıdığım az bir müddət olsada, onun səmimiyyəti, davranışındakı mehribançılıq, qayğıkeş siması məndə ona qarşı rəğbət hissi oyadıb. Tələbələrin əməyini qiymətləndirir. Belə bir insanın rəhbərlik etdiyi universitetdə tələbə olmaq mənim üçün çox xoşdur.
Hazırda mən birinci kurs tələbəsi olduğumdan hələki birinci semestr imtahanlarını vermişəm. İmtahan nəticələrində müəllimlərin tələbələrin bilik səviyyəsini qiymətləndirmələrindən çox razı qaldım. Ümumiyyətlə müəllimlərimizin biz tələbələr üzərindəki əziyyəti çox böyükdür. Ümid edirəm tələbəlik həyatım boyunca bir çox uğurlara imza atıb, müəllimlərimin üzünü ağ edəcəm. Bu yaxınlarda universitetimiz tərəfindən Novruz bayramı ilə əlaqədar "Yurdumuza bahar gəlir"adlı tədbir keçirildi. Bu tədbirdə də əməyi olan hər bir müəllimimizə təşəkkürümü bildirirəm. Fürsətdən istifadə edib bu məqalə vasitəsilə başda universitetimizin rektoru Anar Nağıyev olmaqla, jurnalistika kafedrasının müdiri Vüqar Rəhimzadə və bütün dekan, müəllim heyyətinə öz təşəkkürümü bildirirəm. İnanıram ki, müəllimlərimizin əziyyəti yerdə qalmaz, onların bizə olan inamını, güvənini doğruldarıq. Və öz adımdan istəyirəm ki, gələcəkdə sayılıb-seçilən, öz sözünü deməyi bacaran, peşəkar jurnalistlərdən olum. Hər yerdə Bakı Slavyan Universitetinin tələbəsi olduğumu fəxrlə qeyd edim.
Məmmədrzayeva Nuray, Bakı Slavyan Universiteti Jurnalistika fakültəsi birinci kurs tələbəsi.
