1988-ci ildən – ermənilərin azərbaycanlılara qarşı genosid siyasətinə başladıqları dövrdən ta günü bu günə qədər hələ heç bir beynəlxalq təşkilatın ədalət mövqeyində durduğunu nə görən, nə oxuyan nə də bu barədə yazan olmayıb. Olmayan bir şeydən nə bəhs edəcəksən ki. Əksinə daima BMT qarışıq ATƏT, NATO digər beynəlxalq qurumlar anti-Azərbaycan mövqeyində dayanıb, təcavüzkar, işğalçı Ermənistana qahmar çıxıblar. Elə günü bu gün də elədir...
Azərbaycanlılara qarşı bu haqsızlığa nəinki göz yuman, hətta qatil erməniləri himayə edən beynəlxalq təşkilatlardan biri də Beynəlxalq Qızıl Xaç Komitəsidir. Əslində missiyası humanistlik, sülh və ədalət olan bu təşkilatın daima siyasi alət kimi istifadə olunması təəsüf yaradıb. Qeyd edək ki, Beynəlxalq Qızıl Xaç Komitəsinin (BQXK) Bakı Nümayəndəliyi 1992-ci il mart 3-dən Azərbaycanda da fəaliyyət göstərir. 1996-cı il iyulun 29-da Azərbaycan Respublikası ilə Beynəlxalq Qızıl Xaç Komitəsi arasında onun Azərbaycan Respublikası ərazisində yerləşən nümayəndəliyinin hüquqi statusu haqqında saziş imzalanıb. Təəssüf ki, Beynəlxalq Qızıl Xaç Komitəsi ermənipərəst mövqeyini ölkəmizdə fəaliyyətə başlayandan bu günədək davam etdirir. Özünü müstəqil, tərəfsiz, qərəzsiz təşkilat hesab edən Beynəlxalq Qırmızı Xaç Komitəsi Azərbaycana münasibətdə bu əsas prinsipləri pozmaqdan, qanunazidd hərəkətlər etməkdən belə çəkinmir. Özünü daha çox Ermənistanın vəkili kimi aparır. Əgər belə olmasaydı, ötən il Laçın postunda BQXK-nin maşınlarında içərisində qaçaqmalçılıqla keçirilməsinə cəhd göstərilən benzin, siqaret, mobil telefon qutuları aşkarlanmazdı. Bu azmış kimi, 1991-ci ildə Meşəli soyqırımını törətmiş müharibə cinayətkarlarından, ən amansız qatillərindən olan Vaqif Xaçaturyanın da Beynəlxalq Qırmızı Xaç Komitəsinin avtomobilində Xankəndidən Ermənistana keçirilərkən Azərbaycan sərhədçiləri tərəfindən saxlanıldı. Videogörünülərdən də məlum idi ki, Xaçaturyanı "müalicəyə" aparan Beynəlxalq Qızıl Xaç Komitəsinin əməkdaşları onun hərbi cinayətkar olduğundan xəbərdar idilər. Təlaşını gizlədə bilməyən BQXK-nin nümayəndəsi həmən məqamda Xaçaturyana "məsləhət" verməkdən belə çəkinmirdi.Otuz ildən çoxdur ki, Beynəlxalq Qırmızı Xaç Komitəsi Azərbaycanda fəaliyyət göstərir. Amma bizim deyil, ermənilərin xeyrinə. Bir fakta diqqət edək: 4 min nəfərə yaxın azərbaycanlı Ermənistanın Azərbaycana qarşı təcavüzü nəticəsində itkin düşsə də, ötən 30 illik dövr ərzində onların aqibəti, taleyi barədə Beynəlxalq Qırmızı Xaç Komitəsinin nəzərəçarpacaq uğurları olmayıb. Minlərlə ailə hələ də közərən ümidlə xəbər gözləyir. İndi də bu qurum Xankəndidəki "varlığına" xitam verib Bərdədə ofis açıb "fəaliyyət" göstərməyə qərar verib. Özü də bu məlumatı İrəvan ofisi yayırsa, məsələ məlumdur... Görəsən hansı ölkədə BQXK-nin iki ofisi fəaliyət göstərir? Bu təşkilat bu torpaqlarda Azərbaycan xalqı qarşısında hansı xidmətlərə, etimada sahibdir ki, belə "cahanşümul" fəaliyyət meydanı qazanır?.
Humanitar təsisatdan daha çox, radikal xristian ittifaqı kimi çıxış edən bu komitə Qərb dairələrinin diktəsi altında məmnuniyyətlə öz missiya və öhdəliklərini bir kənara qoyaraq selektiv yanaşmalarda ehtiva olunan pozuculuqla məşğul olmaqdadır. Əslində onun geosiyasi oyunlara cəlb olunaraq Qərbin maraq və mənafelərini ifadə edən oyuncağa çevrilməsi beynəlxalq humanitar təşkilat kimi yox, Fransa Xarici İşlər Nazirliyinin, yaxud Sorosun departamenti kimi fəaliyyət göstərməsi bizim üçün yenilik deyil. Azərbaycanda 1992-ci ildən fəaliyyət göstərən BQXK-nın ötən 31 ildə nə münaqişə dövründə, nə də postmüharibə reallığında Azərbaycana münasibətdə ciddi və səmərəli fəaliyyətinə şahid olmamışıq. Əksinə, "bitərəflik", "qərəzsizlik", "vahidlik" kimi fundamental prinsipləri rəhbər tutmaq barədə öhdəlik götürən BQXK daim elə Qərbin diktəsi ilə Ermənistanla vahid tərəf kimi çıxış edib. Bir sözlə, humanistlikdən başqa HƏR ŞEY...
Mətləb
