Qərbdəki ermənipərəstlər yenə Brüsseldə erməni sevgisinə bürünüb yeni şou yaratmağa çalışdılar. Neçə həftələrdir erməni mediasının bəh-bəhlə Ermənistan ictimai rəyinə sırımağ istədiyi, Ermənistan üçün "xilas görüşü" kimi qabardılan Brüssel toplantısından gözləntilər elə arzu olaraq da bitdi. Erməni tərəfi bu görüşdə hərbi paktın imzalanacağını, Ermənistana böyük maliyyə və siyasi dəstəyi, iqtisadi yardım paketini ehtiva edən sənədin qəbulunu gözləyirdi. Amma... amma Azərbaycanın qətiyyətli mövqeyi, Prezident İlham Əliyevin həm ABŞ həm də Avropa İttifaqı rəsmiləri ilə telefon danışığı zamanı prinsipial mövqedən çıxış etməsi "Brüssel oyunçularını" geri çəkilməyə məcbur etdi. Bəli, məhz Azərbaycan tərəfinin ədalətli və qətiyyətli mövqeyi, ölkə Prezidentinin qlobal miqyasda nüfuzlu Lider olmasının nəticəsidir ki, görüşün təşkilatçılarından olan ABŞ dövlət katibi Blinken dövlətimizin başçısına zəng edərək vəziyyəti izah etməyə məcbur oldu. Brüssel görüşünün digər təşkilatçısı Avropa Komissiyasının Prezidenti Ursula Fon der Lyayen Prezident İlham Əliyevə zəng edib, müzakirələr aparılıb. ABŞ dövlət katibi kimi, Avropa Komissiyasının Prezidenti də Prezident İlham Əliyevə 5 aprel görüşünə dair mövqelərini izah etməyə çalışıblar.
Əlbətddə yuxarıda qeyd etdiyimiz kimi, Avropa İttifaqı, ABŞ və Ermənistan arasında Brüsseldə keçirilmiş görüş haqqında Ermənistanda böyük illüziyalar var idi. Hərbi paktın imzalanması, eləcə də hərbi-siyasi təhlükəsizlik sahəsində hərtərəfli dəstəyin nümayiş olunması və bu dəstəyin birtərəfli qaydada ödənişsiz icrası İrəvanın əsas niyyəti idi. Qərb dairələri öz ermənipərəst siyasətlərini daha qabarıq, açıq şəkildə reallaşdırmaq istəyirdilər. İstəyirdilər ki, qərbin istənilən qanlı təxribatı reallaşdırmaq üçün heç nədən çəkinməyəcəyini, xüsusilə Rusiyanı Cənubi Qafqaz bölgəsindən tamamilə sıxışdırıb çıxarmaq üçün prinsipial siyasət yürütdüyünü hər kəs görsün. Düzdür, onların bu nümayişkaranə güc göstərmələri alınmadı. Amma bu o demək deyil ki, qərbdəki ermənipərəst qruplar niyyətlərindən az da olsalar geri çəkildilər. Qəti! Onlar indi daha xaotik gərginlik yaratmaq kursu seçəcəklər ki, elə son günlər ardıcıl olaraq pozulan atəşkəs rejimi, atılan güllələr də dediklərimi hərfinə qədər təsdiqləyir...
Sözsüz ki, bu siyasətin "anası" rolunda Fransa çıxış edir. Danılmaz faktdır ki, Fransanın, bütövlükdə bəzi Qərb ölkələrinin öz geosiyasi maraqları naiminə rəsmi İrəvan vasitəsilə Ermənistan və Azərbaycan arasında sülh prosesini əngəlləməsi Cənubi Qafqazda qarşıdurmanı gücləndirir, regionun təhlükəsizliyinə əsaslı təhdid yaradır. Bütün dünya şahid oldu ki, Ermənistan baş naziri Nikol Paşinyanın ABŞ Dövlət katibi Antoni Blinken və Avropa Komissiyasının sədri Ursula Fon der Leyayenlə Brüssel görüşündə də bu dairələr regionda sabitliyi pozmaq üçün yenə öz simalarını ortaya qoydular. Rəsmi Bakı hələ bir neçə gün öncə bəyan edirdi ki, sözügedən görüş tam şəffaf şəkildə keçirilmir. Aİ-Ermənistan-ABŞ müştərək konfransı açıq şəkildə birtərəfli və qərəzli xarakter daşıyır və ikili standart yanaşmasına əsaslanır. Bu konfrans erməni tərəfini xoş niyyətlə danışıqlara sövq etmək əvəzinə regionda yeni bölücü xətlər və dırnaqarası təsir dairələri yaradır. Deyilən kimi də oldu...
Heç də təsadüfi deyil ki, Brüssel görüşü ərəfəsində, aprelin 2-də Fransanın Avropa və xarici işlər naziri Stefan Sejurne ABŞ Dövlət katibi Antoni Blinken ilə birgə mətbuat konfransında fransalı nazir ölkəmizin əleyhinə böhtan xarakterli fikirlər səsləndirib. O, bütün diplomtik etiketləri kobud şəkildə pozaraq bildirib ki, guya Azərbaycanın ritorikası nəzarətdən çıxır və vəziyyətin gərginləşməsində Ermənistanı günahlandırmaq məqsədi güdür. Fransalı nazir bir az da irəli gedərək deyib ki, Bakının təbliğatı daha çox Rusiyanın Ukraynaya qarşı təbliğatı ilə üst-üstə düşür. Təbii ki, bütün bunlar saxtakar Stefan Sejurnenin, daha doğrusu, Fransanın beynəlxalq aləmdə Azərbaycan barədə təcavüzkar, sülhə, əməkdaşlığa meyilli olmayan dövlət imici formalaşdırmaq istəyindən başqa bir şey deyil.
Prezident İlham Əliyev regionda hazırki mövcud vəziyyəti qorumaq və eləcə də inkişaf etdirmək istiqamətində çoxsaylı addımlar atmışdır. Sülh, təhlükəsizlik və sabitlik üçün ardıcıl səylər daha da inkişaf etdirilmişdir. Eyni zamanda, dövlət başçımızın qətiyyəti və siyasi iradəsi, həmçinin əlavə etməliyik ki, müdrikliyi regional təhlükəsizlik təhdidlərinin də aradan qaldırılmasına kömək edir. Bütün regiona qarşı olan münasibət meyilləri və bununla bağlı olaraq etiraz mövqeyimiz dərhal nəzərə çatdırılır.
Digər bir baxımdan bütün bunlardan sonra ABŞ Dövlət katibi Antoni Blinkenin "Biz sülhün olduğu Cənubi Qafqaz istəyirik" fikrinin səmimiyyətinə inanmaq çətindir. Amma hər şeyə rəğmən, Brüssel görüşündə rəsmi İrəvan bir daha Azərbaycanın ərazi bütövlüyünü tanıdığını bəyan etdi. Bu, bir daha onu göstərir ki, artıq dünya Azərbaycanın gücü və yaratdığı reallıqlarla hesablaşır. Dünya Azərbaycanın gücündən çəkinir və Bakıya nəyisə diktə edə bilmir. Həmçinin Azərbaycanla hədə-qorxu dilində danışmağın mümkün olmadığı və bunun heç bir nəticə verməyəcəyi qlobal güclər tərəfindən də etiraf edilir. "Uzun illər ərzində işğal altında olan torpaqlarımızın azad edilməsi ilə bağlı BMT Təhlükəsizlik Şurasının qətnamələri beynəlxalq birlik tərəfindən həyata keçirilmədi. Sonda həmin qətnamələrin icrasını öz gücümüzə həyata keçirdik, bölgədə yeni bir güc və söz sahibi olduğumuzu sübut etdik. Azərbaycan mütəmadi olaraq öz mövqeyini qarşıya qoyaraq sübut edir ki, müstəqil siyasət yürütməklə bölgədə yeni mühit formalaşdırmaqdadır.
Bir məqamı da xüsusi vurğulamaq lazımdır: Ermənistanı alətə çevirən ABŞ və Aİ Cənubi Qafqazda qarşıdurma yaratmaq, yeni münaqişə ocağı alovlandırmaq və bununla da bölgəmizdə hegemonluq etməkdə maraqlıdır. Ermənistanın silahlandırılması, bu ölkəyə açıq maliyyə dəstəyi göstərilməsi, son olaraq Brüsseldə aparılan gizli sövdələşmələr fonunda bölgəmizin ciddi təhlükələr astanasında olduğu faktdır. Beləcə Brüssel görüşü həm də bir faktı gün kimi bütün dünya ictimaiyyətinə çatdırmış oldu ki, qərbdəki siyasətbazlar nə qədər Cənubi Qafqazı qarışdırmaqda, sülh əvəzinə qan tökməkdə israrlı olsalar da, qarşılarında əzəmətli və müstəqil siyasət kursu yeridən qüdrətli Azərbaycan dövləti dayanır!
Mətləb Salahov
