Bəsirə Məhərrəmovanın qızı:"Düz, 32 ildir ki, bu günü gözləyirdik"
"Bizim üçün gün bu gündür. Düz, 32 ildir ki, bu günü gözləyirdik. Gözümüz yolda, qulağımız səsdə idi. Anam Bəsirə Vəli qızı Məhərrəmovanın qalıqları aşkarlanıb. Atam Vaqif Cəlil oğlu Məhərrəmovun qalıqlarının da aşkarlanacağı günü gözləyirik.
Xocalı soyqırımı baş verən gecə hər iki valideynini itirən 25 uşaqdan 5-i bizik, mən və qardaş-bacılarım. 32 ildir ata-anamızdan bir xəbər yox idi, indi anamız haqda xəbər var, onun qalıqları aşkarlanıb. Yəni məhkəmə-genetik ekspertizasının hazırkı mərhələsində şəxsiyyəti müəyyən edilən 8 nəfərdən biri anam Bəsirə Vəli qızı Məhərrəmovadır.
Biz bu 32 ildə bilmirdik ki, onlar o gecə Xocalıda şəhid ediliblər, yoxsa girov götürülüblər...Bizim onların taleyindən xəbərimiz yox idi". Bunu Xocalı soyqırımı zamanı itkin düşmüş Vaqif Cəlil oğlu Məhərrəmov və Bəsirə Vəli qızı Məhərrəmovanın qızı, Xocalı şəhəri 2 saylı Tam Orta Məktəbin Uşaq Birliyi Təşkilatının Rəhbəri Vəsilə Məhərrəmova baki-xeber.com-a açıqlamasında deyib. V. Məhərrəmova ümid edir ki, tezliklə atasının da qalıqları tapılacaq. Vəsilə Məhərrəmova deyir ki, Xocalıdan çıxanda özünün 14, kiçik qardaşının isə 5 yaşı olub. Buna baxmayaraq, o qanlı gecə yaddaşlarında həkk olunub...
Əlbəttə, 32 il ata-analarının taleyi barədə heç bir məlumat ala bilməyən 5 uşağın anaları ilə bağlı nigarançılıqlarına son qoyuldu.
Qeyd edək ki, işğaldan azad edilmiş Xocalı şəhərinin mərkəzində (keçmiş xalça fabrikinin yaxınlığında) həyata keçirilən əsaslı bərpa-quruculuq işləri çərçivəsində aparılan qazıntı işləri zamanı basdırılmış vəziyyətdə kütləvi insan qalıqlarının aşkar olunması faktı ilə bağlı araşdırmalar aparılır.
Bu barədə Baş Prokurorluq və Əsir və itkin düşmüş, girov götürülmüş vətəndaşlarla əlaqədar Dövlət Komissiyasının birgə məlumatında qeyd olunub.
Qeyd olunan ərazidə həyata keçirilən baxış istintaq hərəkəti nəticəsində aşkar edilmiş insan qalıqlarının müayinəsi zamanı onların ən azı 18 nəfər şəxsə məxsus olması (4 nəfərin azyaşlı olması ehtimal edilir), onların müxtəlif üsullarla işgəncə, fiziki zorakılıq və qeyri-insani rəftara məruz qalmaları, fərdi şəkildə və mənsub olduqları dinin tələblərinə uyğun qaydada dəfn olunmamaları, həmişə tapıla bilmələri üçün lazımi qaydada qorunmaları və nişanlanmalarının təmin olunmaması müəyyən edilib.
Baş Prokurorluq tərəfindən Əsir və itkin düşmüş, girov götürülmüş vətəndaşlarla əlaqədar Dövlət Komissiyası, Səhiyyə Nazirliyinin "Məhkəmə-Tibbi Ekspertiza və Patoloji Anatomiya Birliyi" Publik Hüquqi Şəxsi, Azərbaycan Milli Elmlər Akademiyası və Beynəlxalq Qızıl Xaç Komitəsinin (BQXK) Azərbaycan Nümayəndəliyinin əməkdaşlarının iştirakı ilə hadisə yerinə baxış keçirilərək aşkar edilmiş sümük fraqmentləri üzrə zərərçəkmişlərin şəxsiyyətinin, həmçinin, iş üzrə həmiyyət kəsb edən digər halların müəyyən edilməsi məqsədilə ekspertiza və laborator müayinələr aparılır, eləcə də digər zəruri prosessual hərəkətlər həyata keçirilir.
Məhkəmə-genetik ekspertizasının hazırkı mərhələsində 8 nəfərin şəxsiyyəti müəyyən edilib:
(Xocalı rayon sakinləri)
1. Əliyev Ağaəli Naib oğlu - 01.06.1933-cü il
2. Əliyeva Sürəyya Behbud qızı – 01.06.1933-cü il
3. Mahmudov Akif Seydulla oğlu – 01.06.1962-ci il
4. Səlimov Xəzər Səyavuş oğlu – 01.09.1974-cü il
5. Səlimova Tamilla Ağamirzə qızı – 01.06.1935
(Xankəndi şəhər sakinləri)
6. Cavadov Əli Müsül oğlu - 15.06.1954-cü il
7. İsmayılov İsmayıl Bəhman oğlu – 01.08.1955-ci il
8. Məhərrəmova Bəsirə Vəli qızı - 01.06.1954-cü il
İstintaq materiallarına əsasən qeyd edilən şəxslərin hamısı 26.02.1992-ci il tarixdə Xocalı rayonu ərazisində itkin düşüb.
İradə SARIYEVA
