Mədəniyyət Nazirliyi Respublika Xatirə Kitabı Redaksiyası Biləsuvar rayonunda "44 gün – Tarixi zəfər" adlı kitabın I və II cildinin təqdimatını keçirdi. Qəhrəmanlar yurdu Biləsuvarda bu nəşrin şəhid ailələri üzvlərinə və rayon ictimaiyyətinə təqdim edilməsi xüsusi bir əhəmiyyət daşıyır.
Biləsuvar İcra Hakimiyyəti başçısı Faiq Qürbətovun, icra başçısının müavini Azər Zülfəliyevin, Səfərbərlik və Hərbi Xidmətə Çağırış üzrə Dövlət Xidmətinin Biləsuvar Rayon Şöbəsinin rəhbəri Rəfail Xəlilovun, rayon ictimaiyyətinin və şəhid ailələrinin iştirak etdiyi təqdimat mərasimində Xatirə Kitabı redaksiyasının indiyə qədər gördüyü işlər barədə geniş məlumat verildi. Bildirildi ki, birinci cilddə 44 günlük Vətən müharibəsi ilə yanaşı, 2016-cı ilin aprel döyüşləri və Tovuz döyüşləri zamanı həlak olanların da adları əbədiləşdirilib. I və II cildlərdə ümumilikdə 2000-ə yaxın şəhid haqqında ensiklopedik məlumat yer alıb.
Məlumat üçün bildirək ki, müasir Azərbaycan dövlətinin qurucusu və memarı, ümummilli lider Heydər Əliyevin qayğısı və təşəbbüsü ilə yaradılmış, onun xeyir-duası ilə fəaliyyətə başlamış Respublika Xatirə Kitabı insan resurslarını əbədiləşdirən tarixi sənəd, tarixlə cəmiyyət arasındakı həqiqətləri, müharibə ağrılarını özündə geniş əks etdirən ensiklopedik salnamədir. Bu missiyanı öz üzərinə götürərək Xatirə Kitabı Redaksiyası İkinci Dünya müharibəsi, Əfqanıstan döyüşləri, 20 Yanvar faciəsi, Xocalı soyqırımı, Azərbaycanın ərazi bütövlüyü uğrunda gedən döyüşlərdə həlak olmuş, itkin düşmüş, əsir götürülmüş vətəndaşlarımız, Milli Qəhrəmanlarımız, Azərbaycanın ərazi bütövlüyü uğrunda şücaət göstərmiş şəxslər haqqında da əhatəli materiallar toplayaraq ayrı-ayrı kitablar dərc edir.
Respublika Xatirə Kitabının indiyədək iyirmiyə yaxın cildi çap olunub. 2017-ci ildə Respublika Xatirə Kitabı Redaksiyası Dövlət Təhlükəsizlik Xidməti nəzdində fəaliyyət göstərən "Əsir, itkin düşmüş, girov götürülmüş vətəndaşlarla əlaqədar Dövlət Komissiyası"nın İşçi qrupu ilə birgə Azərbaycanın ərazi bütövlüyünə təcavüz edən Ermənistanın Dağlıq Qarabağ və ətraf rayonlara hücumu, torpaqlarımızın işğalı zamanı əsir və girov götürülmüş, həmçinin naməlum şəraitdə itkin düşmüş hərbçi və mülki şəxslərin sonrakı taleləri araşdırılıb və dörd cilddən (iki dildə) ibarət kitab hazırlanıb.
Eyni zamanda, redaksiya 44 günlük Vətən müharibəsində şəhid olmuş şəxlərin adlarının və xatirələrinin əbədiləşdirilməsi məqsədilə bir neçə cildlik kitab üzərində çalışır. Kitabın artıq 1-ci və 2-ci cildi işıq üzü görüb, 3-cü cild üzərində işlər aparılır.
Redaksiyanın nəşr etdiyi "Qələbə - 75: Azərbaycan xalqının mübarizə əzmi" kitabı da tarixlə cəmiyyət arasındakı faktiki prosesləri özündə ehtiva edir. Burada Faşizm üzərində qələbənin 75 illiyi geniş təqdir olunub, 1941-1945-ci illərdə alman faşizminə qarşı döyüşən Azərbaycan vətəndaşlarının qəhrəmanlıq və şücaəti xüsusi rakursda xarakterizə edilib, Sovet İttifaqı Qəhrəmanı adına layiq görülmüş azərbaycanlılar, müharibədə örnək, hünər göstərmiş cəsur qadınlarımız barədə tutarlı və maraqlı fikirlər yer alıb.
Respublika Xatirə Kitabı Redaksiyası həmçinin, "Bakı Xəbər" qəzeti ilə birgə layihəsi əsasında "Şəhidlər ölməz, Vətən bölünməz!" silsiləsindən Qarabağ müharibəsində həlak olanların adlarının və xatirələrinin əbədiləşdirilməsi məqsədilə bir neçə kitab nəşr edib, həmin kitabların təqdimatını keçirib. Redaksiya, eyni zamanda, "Vətən daşı... və ya 44 günün dastanı" adlı layihə əsasında 8 sənədli film çəkib. Bu filmlər geniş ictimaiyyətə təqdim olunub.
Layihənin rəhbəri Nəzakət Məmmədovadır. Respublika Xatirə Kitabı yaddaşımızın tarix salnaməsidir və redaksiya dövlət başçısı İlham Əliyevin diqqət və qayğısı altında bugünkü və gələcək strateji işlərini də eyni məhəbbət və həvəslə davam etdirmək üçün əzmlə çalışır. Təqdimat mərasimində qeyd edildi ki, Vətən müharibəsində Biləsuvar rayonu 69 şəhid verib, 2023-cü ilin 19-20 sentyabrında keçirilən antiterror tədbirlərindən sonra isə rayonun 77 şəhidi var.
Tədbirdə iştirak edən Biləsuvar rayon İcra hakimiyyətinin başçısı Faiq Qürbətov çıxışında şəhidlərimizin qəhrəmanlığından, onların hər birinin gözlərini qırpmadan canlarını Vətən uğrunda fəda etdiyindən danışdı. İcra başçısı qeyd etdi ki, o oğulları yetişdirən valideynlər özləri də qəhrəmandır. İcra başçısı bildirdi ki, Vətən müharibəsində şəhid olmuş oğulların atalarının özləri də Birinci Qarabağ Müharibəsində qəhrəmanlıqlar göstəriblər.
Biləsuvar Rayonu İcra Hakimiyyəti başçısının müavini Azər Zülfəliyev qonaqları salamladı, rayon rəhbərliyinin, bütövlükdə rayon ictimaiyyətinin şəhid ailələrinə sonsuz ehtiram bəslədiyini dedi
A. Zülfəliyev qeyd etdi ki, Mədəniyyət Nazirliyi Respublika Xatirə Kitabı Redaksiyasının nəşr etdiyi "44 gün – Tarixi zəfər" adlı kitabın I və II cildlərində
rayon şəhidlərin 43 barədə məlumat verilib, digər şəhidlər haqda növbəti cildlərdə məlumat veriləcək. Respublika Xatirə Kitabı redaksiyasının baş redaktoru Nəzakət Məmmədova da çıxış edərək "Çıxışa başlamamışdan əvvəl tədbirə toplaşan şəhid ailələrinə, bu tədbirin təşkilində bizə köməklik göstərən Biləsuvar Rayon İcra Hakimiyyətinə öz təşəkkürümüzü bildiririk.
Bugünkü tədbirimizi Azərbaycanın Milli Qəhrəmanı, yenilməz döyüşçü Mübariz İbrahimovun, general-leytenant, Vətən Müharibəsi Qəhrəmanı Hikmət Mirzyevin, Vətən Müharibəsi Qəhrəmanları Mahmudov Cavid Hilal oğlunun, Əkbərov Orxan Nadir oğlunun, Babayev Nihad Akif oğlunun, həmçinin, onlarla müxtəlif yüksək təltifli Biləsuvar oğullarının göz açdıqları qəhrəmanlıq yurdunda keçiririk"-deyə bildirdi.
Tədbirdə Səfərbərlik və Hərbi Xidmətə Çağırış üzrə Dövlət Xidmətinin Biləsuvar Rayon Şöbəsinin rəhbəri Rəfail Xəlilov da şəhidlərimizin qəhrəmanlığından, vətənin azadlığı uğrunda mübarizədən danışdı, Xatirə Kitabı Redaksiyasının çap etdiyi "44 gün – Tarixi zəfər" adlı kitabın I və II cildlərinin şəhidlərimizə qoyulan abidə hesab etdiyini bildirdi.
Sonda "44 gün – Tarixi zəfər" adlı kitabın I və II cildləri şəhid ailələrinə təqdim edildi Tədbirdən geniş yazını növbəti sayımızda təqdim edəcəyik.
İradə SARIYEVA
Biləsuvar
