Azərbaycan müstəqillik əldə etdikdən sonra dövlətimizdə keçirilən prezident seçkilərinə seçki hüququ olan vətəndaşlar, siyasi partiyalar, siyasi partiyaların blokları və s. tərəfindən prezidentliyə namizədlər irəli sürülüb və həmin namizədlər çox kiçik də olsa səs faizi toplayıblar. Lakin, 7 fevral 2024-cü ildə keçiriləcək növbədənkənar prezident seçkiləri dövlətimizin milli maraqlarından, mövcud tarixi və siyasi zərurətdən qaynaqlandığı üçün, bu seçki əvvəlki seçkilərdən olduqca fərqlənəcək və bu seçkini tarixi əhəmiyyətli prezident seçkiləri adlandırmaq olar. 2003-cü il oktyabrın 15-də keçirilən prezident seçkilərində xalqımız ulu öndər Heydər Əliyevin siyasi kursunun layiqli davamçısı İlham Əliyevə səs verib onu Azərbaycan Respublikasının prezidenti seçdilər. Xalqın bu seçimi ümummilli liderə olan sevgidən, etimaddan irəli gəlirdi. İlham Əliyevi prezident seçməklə öncə Heydər Əliyevin siyasi kursuna səs verən xalq, o kursa sadiqliyini bir daha nümayiş etdirdi. Təbii ki, o illərdə xalqımız İlham Əliyevin siyasətinə yaxından bələd deyildi. Lakin, 2003-cü ildə İlham Əliyev prezident seçiləndən sonra ölkəmizin inkişafında yeni bir mərhələ başlandı. Sülhün, əmin-amanlığın, tərəqqinin, inkişafın, quruculuğun və sabitliyin təməli daha da möhkəmləndi. Və xalqımız bu gün artıq daha yaxşı dərk edir ki, ölkəmizin xoşbəxt gələcəyi, xalqımızın rifahı üçün İlham Əliyev siyasətinin digər bir alternativi yoxdur. 7 fevral 2024-cü ildə növbədənkənar Prezident seçkilərində namizədliklərini irəli sürən şəxslər indidən bilməlidirlər ki, onlar istədikləri səs faizini toplaya bilməyəcəklər. Çünki, xalqımız Qarabağı işğaldan azad edən, Vətəni bütövləşdirən, siyasi çəkisi və nüfuzu ilə dünya liderlərinin qibtə etdiyi lideri, əsrimizin qalib sərkərdəsi İlham Əliyevi kənarda qoyub, başqa namizədlərə səs verməyəcəklər. Əvvəllər həmin namizədlər seçkidə kiçik də olsa səs faizi toplayırdılarsa, budəfəki prezident seçkilərində bu qeyri-mümkündür. Artıq xalqımız yaxşı dərk edir ki, onlar İlham Əliyevi seçməklə sadəcə ölkə başçısını deyil, xoşbəxt gələcəklərini, sülhü, əmin-amanlığı, tərəqqini seçəcəklər. Çünki, İlham Əliyev heç kimdən və heç nədən asılı olmadan qarşısına qoyduğu strateji hədəflərə daha qətiyyətlə addımlayır. O, bu yolda ona mane olmaq istəyənlərin, milli maraqlarımıza kölgə salanların, dövlətimizin sabitliyini pozmaq istəyənlərin qarşısını əzmlə almağa, Azərbaycanı etibarlı şəkildə qorumağa qadirdir. 2020-ci ilin sentyabrın 27-də Vətən müharibəsinə başlayan və 10 noyabrda bu müharibəni zəfər ilə başa çatdıran, 23 aprel 2023-cü ildə işğaldan azad olunan Laçında dövlət sərhəd-buraxılış məntəqəsini yaradan və bu ilin 19-20 sentyabrında Qarabağda separatçılığa son qoyan və suverenliyimizi bərpa etmək haqqında taleyüklü qərarlar verən bir şəxs, yaşadığı müddətcə Azərbaycanın Prezidenti olmağa layiqdir. Açıq demək gərəkirsə, xalqımız dövlətimizə başqa dövlət başçısının rəhbərlik etməyinə qorxur, çəkinir. Çünki, xalqın güzəranını, rifahını ümummilli liderdən sonra İlham Əliyev yaxşılaşdırıb. Xalqı, dövləti ağ günə İlham Əliyev çıxarıb. Bu dövlət bir başqasının əlində olsaydı kim bilir, xalqın aqibəti necə olardı. Yer üzərində Azərbaycan adlı bir dövlət olardımı?! Bəlkə də heç olmazdı. Ancaq ölkə başçımız İlham Əliyevin düşünülmüş islahatları, müdrik qərarları həyatımıza yeni nəfəs gətirib, Azərbaycanı dünyanın inkişaf edən ölkələri sırasına çıxarıb. Çünki, onun siyasətinin mərkəzində insan amili dayanır. Onun amalı qurub-yaratmaq, xalqını daha xoş günə, daha firavan həyata qovuşdurmaqdır. Xalqa xidmət etmək, hər bir azərbaycanlının prezidenti olmaq İlham Əliyevin həyat fəlsəfəsidir. Bu gün Azərbaycanda həyata keçirilən siyasətin alternativi yoxdur. Xalq-iqtidar birliyi uzunmüddətli inkişaf strategiyasının müəyyənləşdirilməsinə geniş imkanlar açır. Bu günümüzün daha bir reallığı isə ondan ibarətdir ki, Azərbaycan sürətli inkişaf yolunda inamla, qətiyyətlə irəliləyir, hər ötən gün uğurla dolu yeni tarix yazırıq və dövlətimizi qarşıda daha möhtəşəm, daha böyük uğurlar gözləyir. Prezident İlham Əliyevin fəaliyyətinə nəzər saldıqda görünən odur ki, onun siyasətində həyata keçirilən əsas prioritetləri Vətənin müdafiəsi və xalqın rifahıdır. Ölkə başçımızın müasir dünyaya yaxından bələd olması, vaxtında atılan cəsarətli addımları, dünyada siyasi proseslərin dərindən təhliletmə qabliyyəti bugünkü qələbəmizi, böyük uğurlara imza atmağımızı şərtləndirən əsas amillərdəndir. XXI əsrin qalib sərkərdəsi Qarabağ zəfəri ilə bütün dünyaya Türkün gücünü, xalqımızın , dövlətimizin gücünü sübut etdi. Bu, yalnız güclü siyasi iradə və xalqına arxalanan dövlət başçısının əldə edə biləcəyi zəfər idi. Ona görə də böyük fəxarət və qürurla deyə bilirik ki, Azərbaycanın Müzəffər Ali Baş Komandanı, qalib Ordusu və sarsılmaz birliyi var. Məhz bu birliyə arxalanaraq deyə bilərəm ki, Vətən müharibəsində olduğu kimi xalqımız növbədənkənar Prezident seçkilərində də həmrəylik nümayiş etdirəcək və hər bir vətəndaşımız öz məsuliyyətini tam dərindən dərk edərək, bu tarixi seçkilərdə də yaxından iştirak edəcək, Vətənimizi bütövləşdirən, bizə zəfər sevincini yaşadan, bizə qalib ölkə, qalib xalq adını qazandıran, Müzəffər Ali Baş Komandanımızın alternativi olmayan siyasətini dəstəkləyərək, onun bu dövlətə yenidən rəhbərlik etməsinə xalqımız səs verəcəkdir. Lamiyə İsazadə,
"Kimsəsiz Uşaqların Sosial Müdafiəsi" İctimai Birliyinin sədri, Prezident Təqaüdçüsü.
