Kərkükdə ABŞ qoşunlarının yerləşdiyi K1 bazasına edilən hücumlar və şiə silahlıların ABŞ-ın Bağdaddakı səfirliyinə girmək cəhdlərini "İranın bölgədəki pis davranışının nümunəsi" kimi xarakterizə edən ABŞ Müdafiə naziri Mark Esper, şiə hərbçilərinin Kərkükdəki hərbi bazaya 31 raketlə hücum etdiyini söyləyib.
Baki-xeber.com xəbər verir ki, müdafiə naziri bu barədə ABŞ Baş Qərargah rəisi general Mark Milleylə keçirdiyi mətbuat konfransında deyib.
Esper ABŞ-ın K1 bazasına hücuma cavab olaraq Ketaib Hizbullah təşkilatına qarşı hava hücumlarının "uğurlu" və "təsirli" olduğunu deyib. O, İran dəstəkli şiə silahlıların, ABŞ ordusuna hücum edəcəkləri halda buna peşman olacaqlarına dair mesaj aldıqlarını bildirib.
Esper İran dəstəkli qüvvələrdən gələ biləcək hücumlara qarşı ilkin hücumlar təşkil edə biləcəklərini də deyib: "Amerika qüvvələri və vətəndaşlarını qorumaq üçün ilkin addımlar atacağıq. Artıq oyun dəyişdi. Nə lazımdırsa edəcəyik".
Nazir ABŞ-ın İran təhdidinə qarşı bölgəyə əlavə qoşun göndərə biləcəyini də vurğulayıb: "Yalnız İraqda deyil, bölgədəki bütün obyektlərimizin təhlükəsizliyini gücləndirməyi müzakirə edirik”.
ABŞ-ın şiə milislərin tərksilah edilməsini tələb edib-etməməsi sualına gəlincə Esper deyib: "Bunu demək bizim işimiz deyil, amma İraq rəhbərliyi bü cür İrana dəstəkli silahlı qruplar məsələsində daha çox səy göstərməlidir və onların (şiə silahlıların) ABŞ və ya koalisiya qüvvələrinə qarşı hücumlarını dayandırmalı və edilən hücumları araşdırmalıdır.
Bu istiqamətdə yetərli addımların atıldığını görmədik. Bu problemi həll etməli, ölkələrini İranın təsirindən azad etməlidirlər. Onlar buna daha çox diqqət ayırmalıdırlar… İran dəstəkli qüvvələri ölkələrindən çıxarmalı və ya onları nəzarət altına almalıdırlar".
Bundan əvvəl Esper, şiə silahlı qrupların Bağdaddakı ABŞ səfirliyinə girmək cəhdinə qarşı İraqa əlavə 750 əsgərin göndərilməsi barədə əmr verib.
"Şiə milislərinin ölkədən çıxarılması və ya tərksilah edilməsi üçün qabiliyyət və iradə lazımdır. İraq rəhbərliyinin qabiliyyəti var, amma burada əsl məsələ iradədir. Bu, siyasi iradə məsələsidir". Bunu isə ABŞ Baş Qərargah rəisi general Mark Milley deyib.
Milley şiə milislərin, səfirlik binasına hücumlarını şou kimi xarakterizə edib və yanğının, tüstünün kameraların diqqətini çəkmək üçün töörədildiyini iddia edib. General qeyd edib ki, səfirlik binasına kiminsə girməsi ehimalı çox aşağıdır. Digər tərəfdən orada kifayət qədər hərbi qüvvə var və əgər kimsə binaya girərsə bu onun sonu olacaq.
Milley bölgədəki bütün qüvvələrin hazır vəziyyətə gətirildiyini də sözlərinə əlavə edib.
