2014-cü ildə Ukraynanın şərqində Malayziya təyyarəsini vuran raket rusiyapərəst üsyançıların nəzarətində olan ərazidən buraxılıb. Baki-xeber.com xəbər verir ki, bunu MH17 reysinin vurulmasını araşdıran beynəlxalq istintaq qrupu bildirib.
Qrupa daxil olan prokurorlar raketin Ukrayna ərazisinə Rusiyadan gətirildiyini deyirlər. Hesabatda bildirilir ki, “Boinq” sərnişin təyyarəsi iyulun 17-də Snejnoe şəhərinin 6 kilometrliyində yerləşən Pervomaysk qəsəbəsindən buraxılan raketlə vurulub. Bu ərazi həmin vaxt rusiyapərəst separatçıların nəzarətində olub. Müstəntiqlərin sözlərinə görə, raket buraxıldıqdan sonra “Buk” qurğusu yenidən Rusiyaya qaytarılıb.
Niderlandın baş prokuroru Fred Vesterbekin sözlərinə görə, istintaq qəza, terror aktı və digər təyyarədən hücum versiyalarını rədd edib.
İstintaq raketin Zaroşensk qəsəbəsindən buraxılması ilə bağlı Rusiya tərəfinin iddiasını təsdiqləməyib. Amma raketin separatçıların təşəbbüsü ilə buraxılması və ya onu Rusiya hərbçilərinin koordinasiya etməsi hələlik müstəntiqlərə bəlli deyil. Hesabata əsasən bu məsələdə 100-ə yaxın şübhəli var.
Separatçıların iyulun 16-17-də telefonla Rusiya “Buk” nu müzakirə etməsi əsas sübutlardan biridir. Ələ keçirilən telefon danışığı mətbuat konfransında ictimaiyyətə təqdim edilib.
Qeyd edək ki, Amsterdamdan Kuala Lumpura yollanarkən Ukrayna hava məkanında parçalanmış Boeing 777 təyyarəsinin göyərtəsində olan 298 adamın hamısı həlak olub. Onların əksəriyyəti Niderland vətəndaşı olub.
"Onlar bizə BUK-un necə daşınmasını söyləyib və bu nəticəyə hansı lent, görüntü və videomateriallara əsasən gəldiklərini deyiblər", hadisədə qardaşı qızını itirən Robby Oehler BBC-ə deyib.
Rusiya isə separatçılara belə bir silah vermədiyini və təyyarənin Ukrayna hərbçiləri tərəfindən vurulduğunu iddia edir və son hesabatı da qərəzli hesab edir.
Təyyarə qəzasını Niderlandın təşəbbüsü ilə yaradılmış Müştərək Təhqiqat Qrupu araşdırır. Onun tərkibinə Niderland, Avstraliya, Belçika Malayziya və Ukrayna təhqiqatçıları daxildir.
