ABŞ Rusiyanı iki ölkə arasında Suriya ilə bağlı bütün razılaşmalardan imtina etməklə təhdid edib. Baki-xeber.com xəbər verir ki, ABŞ dövlət katibi Con Kerri bəyan edib ki, Rusiyanın Suriya rejimi ilə birgə Hələbdə keçirdiyi bombardmanlar dayandırılmasa Moskova ilə bütün əlaqələri kəsəcəklər.
Dövlət Departamentinin sözçüsü Con Kirbinin sözlərinə görə, Kerri rusiyalı həmkarı Sergey Lavrovla görüşdə də, Suriyanın Hələbdə keçirdiyi əməliyyatların dayandırılması ilə bağlı təcili addımlar atılmasa Rusiya ilə Suriya ilə bağlı razılaşmaları dayandıracaqlarını deyib.
Moskva ilə əlaqələri dayandırmağa hazırlaşan Vaşinqtonun, Rusiyanın Hələbdəki hücumu dayandırmaq və atəşkəsi təmin etmək mövzusunda təcili addımlar atmayacağı halda, birgə icra mərkəzi yaradılmasından da imtina edəcəyi bildirilir.
Kerri artıq bununla bağlı hazırlıqlara başladıqlarını da deyib.
Rusiya Xarici İşlər Nazirliyi isə bəyan edib ki, Sergey Lavrov Kerriyə ABŞ-ın "terror təşkilatları" ilə müxalifətin bir-birlərindən ayrılmaları mövzusunda götürdüyü öhdəlikləri yerinə yetirməsinin vacibliyini deyib.
Xatırladaq ki, sentyabrın 9-da İsçveçrədə Rusiya XİN rəhbəri Sergey Lavrov və ABŞ dövlət katibi Con Kerri Suriya ilə bağlı çoxmərhələli plana dair razılığa gəliblər. Plana əsasən, sentyabrın 12-dən Suriyada atəşkəs rejimi elan olunub. Atəşkəs bir həftə davam edib və bu müddətdə tərəflər bir-birlərini onu pozmaqda ittiham ediblər.
Sentyabrın 19-da əvvəl müxaliflər, sonra isə hökumət qüvvələri döyüşlərin bərpa olunduğunu elan edib. Bununla yanaşı, Moskva və Dəməşq ABŞ-ın rəhbərlik etdiyi koalisiyanı Suriya ordusunun mövqelərinə zərbələr endirməkdə ittiham edib. Vaşinqtondan isə bəyan ediblər ki, Moskva Suriyada humanitar konvoya hücum edib.
Çoxmərhələli planla bağlı ilkin açıqlamada bildirilirdi ki, Suriya hökumət qoşunları spesifik nöqtələrdə müxalifətə qarşı hərbi əməliyyatları dayadırmalıdır. Razılaşma Suriyada İslam Dövləti qrupuna və əl-Nüsra Cəbhəsinə qarşı müştərək ABŞ-Rusiya mərkəzinin yaradılmasını nəzərdə tuturdu. Hərbi əməliyyatların dayanmasından 7 gün sonra isə Rusiya və ABŞ “vahid icra mərkəzi” yaradacaqlardı.
Həmin vaxt Kerri bildirirdi ki, plan hər iki tərəfin öz öhdəliklərinə əməl etməsindən asılı olacaq. Dövlət katibi əlavə edib ki, Suriya rejimi ciddi olduğunu nümayiş etdirərsə, müxalifət də plana əməl edəcək.
Lavrov isə bildirirdi ki, yaradılacaq “vahid icra mərkəzi” Vaşinqton və Moskvaya terrorçularla müxalifəti bir-birindən ayırmaq imkanı verəcək. Plana görə bölgədə yalnız ABŞ və Rusiya təyyarələri hərəkətdə olacaqdı.
Ancaq bu razılaşma baş tutmadı. Tərəflərin bir-birini ittiham etməsi fonunda Moskva qarşı tərəfə Suriyaya dair Rusiya-ABŞ razılaşmasının detallarının ictimailəşdirilməsini təklif etdi. Ancaq Vaşinqton Moskvanın bu istəyinə qarşı çıxdı.
Bir neçə gün əvvəl isə Rusiya Xarici İşlər Nazirliyi rəsmi saytında ABŞ-la Suriyaya dair əldə olunmuş sazişin mətninin bir hissəsini yaydı. Vaşinqtondan da ikitərəfli razılaşmaların tam mətnini dərc etməsini tələb etdi.
“ABŞ tərəfinin sağlam düşüncəli müxalifətçiləri “Əl Qaidə”nin qolu olan “Cəbhə ən-Nüsrə” qruplaşmasından ayrılmasına dair üzərinə götürdüyü öhdəliyi ictimaiyyət qarşısında təsdiqləməkdən, həmçinin Rusiya ilə birlikdə atəşi dayandırmayan terrorçulara zərbələr endirməkdən boyun qaçırması diqqət cəlb edən əsas məqamlardan biridir”, - deyə XİN-in məlumatında bildirilir.
Bununla belə, Rusiya XİN ABŞ-ın mötədil müxalifətin terrorçulardan ayrılmasına dair üzərinə götürdüyü öhdəlikləri icra edəcəyinə ümidvar olduğunu bildirib. Məlumatda həmçinin qeyd olunur ki, Vaşinqtonun “mötədil” hesab etdiyi silahlılar Cəbhə ən-Nüsrənin tərkibində döyüşür.
