Donald Trampın kampaniya komandası bütün rusiyapərəst əlaqələri aşkar etməlidir. Bunu Hillari Klintonun meneceri bildirib.
"New York Times” qəzeti yazır ki, 2007-2012-ci illərdə cənab Trampın kampaniyasının rəhbəri Paul Manafort Ukraynada rusiyapərəst siyasi partiyadan nəğd pullar əldə edib.
Onun vəkili qeyd edib ki, cənab Manafort belə bir ödəniş almayıb.
Cənab Trampın Rusiya ilə əlaqələri ABŞ-da seçkilər ərəfəsi tez-tez müzakirə edilir.
"New York Times” qəzetində yazılan məqalədə deyilir ki, cənab Manafort və onun biznesi Ukraynanın sabiq rusiyapərəst prezidenti Viktor Yanukoviçə məsləhətlər verilməsində böyük rol oynayıb.
Ukraynanın Anti-Korrupsiya Bürosu cənab Yanukoviçin o vaxt rəhbərlik etdiyi Regionlar Partiyasının "qanundan kənar mühasibatlıq sistemi"ndə ödəniş siyahıları barədə məlumat açıqlayıb.
Büro həmçinin cənab Manafortun biznesinin yardımı ilə milyon dollarlıq biznes müqavilələrini araşdırdığını qeyd edib. Hərçənd büro hələlik cənab Manafortun 12.7 milyon dolları əldə edib-etmədiyini müəyyənləşdirməyib.
"The Times” qəzeti Manafortun vəkili Riçard Hibeidən sitat gətirib ki, onun müştərisi belə bir iş görməyib: "Dəlil olmadığı halda kimisə bu cür ittihamlarla qaralamaq doğru deyil və biz nə vaxtsa belə bir sübutun ola biləcəyini inkar edirik".
Yanukoviç qiyamdan sonra Rusiyaya üz tutub və Moskva ilə qərbpərəst Kiyev hökuməti arasında münaqişə start götürüb.
İki ildir davam edən münaqişədə təxminən 9,500 insan həlak olub.
Demokratlar Rusiyanı cənab Trampın kampaniyasına dəstək göstərməyə cəhddə ittiham edir.
