Ötən ilin noyabrında Parisdə təşkil edilən terror hücumu ilə bağlı yeni maraqlı detallar üzə çıxıb.
Baki-xeber.com xəbər verir ki, hadisəni araşdıran Parlament Araşdırma Komissiyasına görə, əsgərlər silahlarını hücum zamanı terrorçuları dayandırmaq üçün döyüş silahına ehtiyacı olan polislərə verməkdən imtina ediblər.
Hadisə yerində olan ya da sonradan bölgəyə göndərilən "BAC" (Brigade anti-criminalite) anti-cinayət qüvvələri, yalnız tapancaları ilə terrorçulara cavab verə bilmədiklərini və hadisə yerində ya da yaxınlıqda olan, hadisəyə müdaxilə hüququ olmayan əsgərlərdən əllərindəki "Famas” döyüş silahlarını onlara vermələrini tələb edib, amma əsgərlər onların bu istəyini rədd edib.
Onu da qeyd edək ki, Fransada deputatlar ölkənin kəşfiyyat xidmətlərinə böyük dəyişiklik təklif ediblər. Belə ki, Fransanın müxtəlif kəşfiyyat xidmətlərinin vahid "milli antiterror agentliyi”ndə birləşməsi təklif edilir.
Ötən noyabrda Parisdə İslam Dövləti yaraqlılarının törətdiyi hücumlarda 130 nəfər həlak olmuşdu. Bundan sonra parlament təhqiqat komissiyası yaradıb. Fransada daha öncə də bir neçə hücum baş verib.
ABŞ da 2001-ci ildə sentyabr terrorundan sonra təhlükəsizlik agentliklərini birləşdirib ABŞ Daxili Təhlükəsizlik Departamenti yaratmışdı.
