Prezident Barak Obama Demokratlar partiyasının prezidentliyə namizədi Hillari Klintonu rəsmi şəkildə dəstəkləyib. O, bu qərarını xanım Klintonla namizədlik uğrunda mübarizə aparan Vermont senatoru Bernie Sanderslə görüşdükdən sonra açıqlayıb.
Xanım Klintonun Twitter səhifəsində paylaşılmış videoda cənab Obama deyir ki, o, bəlkə də tarixdə prezidentlik roluna uyğun ən keyfiyyətli şəxsdir.
Aparıcı liberal siyasətçi Elizabeth Uarren də xanım Klintonu dəstəkləyib.
"Mən bu döyüşə hazıram və var gücümlə Hillari Klintonun ABŞ-ın növbəti prezidenti olması üçün çalışacağam", Massachusetts senatoru MSNBC-ə deyib.
O həmçinin əlavə edib ki, Donald Trampın Ağ Evə "yaxın gəlməsinə" də qarşı mübarizə aparacaq.
Gözlənilir ki, Prezident Obama və xanım Klinton tezliklə birgə kampaniyaya başlayacaq.
"Bu inanılmaz yolun lap əvvəlindən mənim yanımda olanlara demək istəyirəm ki, "Mən Onunlayam". Mən Hillari üçün kampaniyaya başlayacağım günü səbrsizliklə gözləyirəm," cənab Obama videoda deyib.
"Katib Klinton və senator Sanders praymerizdə rəqib olsalar da, hər ikisi ölkəsini sevən vətənpərvərlərdir və Amerika üçün bizim inandığımız nəzər nöqtəsinə malikdirlər".
2008-ci ildə də Hillari Klinton və Barak Obama namizədlik uğrunda mübarizə aparıb, cənab Obama isə daha sonra onu dövlət katibi təyin edib.
Xanım Klinton söyləyib ki, prezident Obamanın sözləri "dünyaya dəyər". "İllər ərzində prezident Obamanın və mənim kəskin rəqiblərdən əsl dostlara çevrilməsi şərəf və fərəh verir", o deyib.
Respublikaçıların qalmaqallı namizədi hesab olunan Donald Tramp isə, Twitterdə Obamanın Klintona dəstək videosu ilə bağlı yazıb ki, bu, "daha 4 Obama ili" deməkdir.
Hillari Klinton isə ona Twitterdə cavab verib ki, "profilini sil".
