Türkiyə Prezidenti Rəcəb Tayyib Ərdoğan qondarma genosid layihəsinin Almaniya Federal Məclisində qəbul edilməsinə sərt reaksiyalarını davam etdirir.
Baki-xeber.com xəbər verir ki, Ərdoğan bu dəfə Bundestaqın qondarma genosid qərarına görə, Almaniya kansleri Angela Merkeli sərt tənqid edib. Türkiyə Prezidenti Merkellə bağlı "Əlindən gələni edəcəyini dedi, əlindən gələn səsverməyə qatılmamaqdırmı?” - deyə bildirib.
Ərdoğan daha sonra bildirib: "Biz bütün arxivlərimizi açdığımız halda ey Almaniya rəhbərləri, bütün dünyaya da səslənirəm, əgər özünüzə güvənirsinizsə, tarixə, elmə hörmətiniz varsa, biz bütün arxivlərimizi açdıq, siz də açın. Gəlin bu işi tarixçilərə verək. Nəticə nə çıxsa biz ona razıyıq. Bunu bu gün demirəm, həmişə deyirəm. Ey Almaniya, sən nə etmək istəyirsən? Sənin dərdin nədir? Özü ilə danışanda əlindən gələni edəcəyini dedi, sənin əlindən gələn parlamentdəki səsverməyə qatılmamaqdırmı?”
Ərdoğan bildirib ki, İkinci Dünya Müharibəsində Almaniyanın soyqırımından qaçanların bir qismini Türkiyə qəbul edib: "Məsələ ermənilərlə bağlı deyil, "erməni soyqırımı”ndan Türkiyəyə qarşı bir şantaj vasitəsi, dəyənək kimi istifadə edilir. Bizim keçmişimizlə bağlı alnımız açıqdır. Qərb ölkələrinin keçmişdəki cinayətlərinin siyahısını ortaya qoysaq, necə olar?! İkinci Dünya Savaşında Almaniyanın həyata keçirdiyi soyqırımından qaçanların bir qismini bir qəbul etdik. Almaniya parlamentinin bunlardan xəbəri varmı? Bizim keçmişimizlə bağlı utanacaq bir məsələ yoxdur. Bütün dünyaya səslənirəm ki, bizim erməni məsələsində mövqeyimiz birmənalıdır. Biz soyqırımı ittihamını qəbul etmirik. Birinci Dünya Müharibəsinin şərtləri altında Anadoluda asayişi qorumaq üçün bir sıra tədbirlər görülüb. Almaniya Bundestaqı bu qərarı qəbul edərkən hansı arxiv materiallarından istifadə edib? Əgər dürüstsənizsə, arxivlərimiz açıqdır, siz də açın. Ancaq buna ürəkləri yetmir, rəzil olacaqlarını bilirlər. Biz arxivlərimizi açmağa hazırıq, Ermənistan, Almaniya, Qərb ölkələri buna hazırdırmı?”.
Ərdoğan, saxta genosid layihəsini hazırlayan partiyalar arasında yer alan Yaşıllar Partiyasının türk mənşəli lideri Cem Özdəmiri də sərt tənqid edib: "O uşaqdır, uşaq, çıxıb Almaniya parlamenti üçün mətn hazırlayır. Sən haradan bilirsən bunları? Sən arxivlərdən nə bilirsən? Almaniyada doğulub, böyüyüb, hara gedirsən get, Tayyib Ərdoğanı söymək sənə bir şey qazandırmaz. Amma mən Almaniya Parlamentinin bunların əlində alətə çevrilməsinə təəccübləndim”.
