Türkiyə Xarici İşlər Nazirliyi Suriyada bombardmanları davam etdirən Rusiyanın ünvanına çox sərt ittihamlarla çıxış edib. APA-nın "Hürriyet”ə istinadən verdiyi xəbərə görə, Türkiyə XİN Rusiya hərbi təyyarələrinin Suriyanın Türkiyə ilə həmsərhəd İdlib şəhərində xəstəxana binasını və məscidi bombalaması nəticəsində 60-dan çox mülki şəxsin öldüyünü açıqlayıb:
"Bu səhər rejimin və Rusiyanın Suriyadakı cinayətlərinə bir yenisi əlavə olunub. İdlib Milli Xəstəxanası, Abrar camesi və digər mülki obyektlərə Rusiya təyyarələri tərəfindən endirilən zərbələr nəticəsində ilkin məlumatlara əsasən 60-dan çox mülki şəxs həyatını itirib. Yaralıların sayı 200-ə yaxındır. Şiddətlə qınadığımız, dərin nifrət oyandıran bu hadisə zamanı həyatını itirənlərə Allahdan rəhmət, yaralılara şəfa diləyirik.
Suriyada siyasi həlli və hərbi əməliyyatların dayandırılması haqda razılaşmanı dəstəklədiyini bildirən Rusiya Federasiyasının bu razılıqları ayaqlar altına atdığı ortadadır. Suriya rejiminin və Rusiyanın heç bir bəraəti olmayan bu cinayətləri qarşısında beynəlxalq ictimaiyyətin üzərinə düşən məsuliyyəti gecikmədən yerinə yetirməsini gözləyirik”.
Qeyd edək ki, Rusiya hərbi komandanlığı İdlibdəki bombardmanda bu ölkə hərbi təyyarələrinin iştirak etmədiyini iddia edir.
"Rusiya tələb edir ki, Türkiyə öz qoşunlarını İraqdan çıxarsın. Ankaranın fəaliyyəti tamamilə qəbuledilməzdir”. Bunu isə "Komsomolskaya Pravda" radiosunun canlı efirində sualları cavablandıran Rusiyanın xarici işlər naziri Sergey Lavrov deyib. "Türkiyənin keçmiş baş naziri Əhməd Davutoğlu bildirmişdi ki, həmin qoşunlar İraqın suverenliyini möhkəmləndirmək üçün ordadırlar. Lakin bu, tamamilə qəbuledilməz mövqedir. Hesab edirəm ki, prinsipcə, türklərin hərəkətləri qərbli tərəfdaşlarımızın diqqətini daha çox çəkməlidir”, - deyə Rusiya XİN başçısı vurğulayıb.
O, bildirib ki, Rusiya Türkiyə ilə münasibətləri nizamlamaq təşəbbüsü ilə birinci çıxış etmək niyyətində deyil, lakin Ankaranın müvafiq müraciətinə baxmağa hazırdır. Lavrov bildirib ki, Türkiyə tərəfi hazırda çox güclü əziyyət çəkir: "Ona görə də, müxtəlif bağlı kanallarla bizə yaxınlaşmağa və hansısa komitə yaratmağa cəhd edirlər. Hələ keçən ilin dekabrında türkiyəli həmkarım mənə münasibətlərin normallaşdırılması ilə bağlı komitə və ya qrup yaratmağı təklif etmişdi. Biz heç vaxt deməmişk ki, Türkiyəyə "zeytun budağı” uzadırıq. Demişik ki, Türkiyə üzr istəməlidir, hərbi cinayət zamanı dəyən ziyanı ödəməlidir. Prezident Putin də bildirib ki, biz Ankaranın müraciətinə baxmağa hazırıq”.
Xatırladaq ki, 2015-ci il noyabrın 24-də Türkiyə hərbi təyyarəsi ölkənin hava məkanını pozan Rusiyaya məxsus "Su-24” bombardmançı təyyarəsini vurub. Bundan sonra iki dövlət arasında münasibətlər pisləşib.
