"Ermənistanda polislərin sayı ilə bağlı açıqlanan rəsmi rəqəmlər reallığı əks etdirmir”. APA-nın xəbərinə görə, bu barədə Ermənistanın armlur.am saytında material dərc olunub. Məlumatda bildirilir ki, ölkədə polis əməkdaşlarının sayı olduğundan qat-qat az göstərilir.
"Ermənistanda polislərin sayı əhalinin sayına görə digər ölkələrlə müqayisədə iki dəfə artıqdır. Ölkədə polisin əsas vəzifəsi hazırkı iqtidar əleyhinə aksiyalara imkan verməməkdir”- deyə, məlumatda bildirilib.
Sayt bildirir ki, Ermənistan hakimiyyəti üçün dövlət sərhədinin qorunması vacib deyil: "Hərbi qulluqçuların acınacaqlı vəziyyətdə olması bunu sübuta yetirir. Hakimiyyət öz maraqlarına cavab verən istiqamətlər üçün vəsait ayırır. Öz postlarının itirilməməsi onlar əsas şərtdir. Hökumət bu məqsədinə çatmaq üçün "Vova” ləqəbli polis rəisi Vladimir Qasparyanın "polis komandasına” etibar edir. Ermənistan üçün əsas düşmən Azərbaycan deyil, öz daxilindəki erməni vətəndaşlardır. Ən böyük qorxuları erməni vətəndaşların etiraz aksiyalarıdır”.
Məlumatda qeyd olunub ki, bu il aprelin əvvəlində başlamış 4 günlük qarşıdurma zamanı təmas xəttinə gedən xeyli sayda erməni könüllü özlərinin məişət problemlərini mövqelərə göndərilən ərzaq məhsulları ilə həll etməyə çalışır: "Əslində ordu yerli sakinlər və müəyyən təşkilatların yardımı ilə yox, dövlət büdcəsindən ayrılan vəsaitlə saxlanmalıdır. Digər problem təmas xəttinə gedən könüllülərə müddətdən artıq xidmət etmiş hərbi qulluqçu statusu probleminin həllidir. Hazırda onların əmək haqqı 150 min dramdır (469 AZN)”.
Bundan başqa, Ermənistanda hərbi qulluqçuların müalicəsi və istirahəti üçün nəzərdə tutulmuş məbləğ ödənilmir. APA-nın "armlur.am” saytına istinadən verdiyi məlumata görə, hazırda qüvvədə olan qaydaya əsasən hər bir hərbi qulluqçu 72 min dram (225 manat) məbləğində sosial yardım müavinətindən istifadə etməlidir. Ancaq hərbi qulluqçuların çoxu bu yardımı əldə edə bilmir. Məbləğ "Ardşinbank” və "VTB Bank” vasitəsilə ödənilməlidir. Lakin artıq 3-4 ildir ki, sosial paket məbləğləri çeklə ödənilir. Ödənişi həyata keçirən şirkətlərin sayı xeyli artıb. Maraqlıdır ki, həmin şirkətlərin səhmdarları arasında Müdafiə Nazirliyinin rəhbərliyi ilə əlaqələri olanlar da var.
Hərbi qulluqçuların bir neçəsi jurnalistlərə bildiriblər ki, onlar nəzərdə tutulmuş 72 min dramdan yalnız 40 min dramı (125 AZN) ala bilirlər, yerdə qalan məbləği isə həmin şirkətlər mənimsəyir. Bir neçə ay əvvəl isə vəziyyət daha da pis olub, çünki hərbi qulluqçular üçün ayrılan məbləğin böyük hissəsi xidmət göstərən təşkilatlara çatıb. Bir sözlə, hərbi qulluqçuların müalicə və istirahəti üçün nəzərdə tutulmuş məbləğ realda onlara çatmır.
