Belçika polisi martın 25-də yenidən Brüsseldə reydlərə başlayıb. Bu barədə yerli mətbuat xəbər verir (Azadlıq radosu).
Məlumatlara görə, martın 25-də keçirilən reyd zamanı şəhərin ətrafındakı Sxarbik məhəlləsində partlayış səsi eşidilib. Əməliyyat zamanı 1 nəfərin zərərsizləşdirildiyi və həbs edildiyi bildirilir. Polis bunun Parisdə baş tutmayan terror aktı ilə bağlı olduğunu deyir. Amma rəsmilər hələlik məsələyə münasibət bildirməyib.
Cümə gününə keçən gecə keçirilən reydlərdə isə 6 şübhəli saxlanıb.
Bu arada Fransada hücum hazırlayan başqa bir şübhəli Paris yaxınlığında həbs olunub.
Müstəntiqlər indiki Brüssel və noyabr ayında Parisdə törədilmiş bomba basqınları arasında əlaqə olduğunu da bildiriblər.
Cümə axşamı Fransa polisi hücum hazırlayan bir şübhəlini həbs etdikdən sonra, Parisin şimal-qərbindəki Arjanteydə antiterror əməliyyatına başlanıb. Fransanın daxili işlər naziri deyib ki, həbs edilmiş şəxs fransız əsillidir və onun bundan əvvəlki Paris və Brüssel hücumları ilə bağlılığı olmasa da, o artıq öz hücum planının icra mərhələsinə yaxınlaşırmış.
Onu da qeyd edək ki, Brüssel hava limanına hücumda şübhəli bilinən üçüncü şəxsin kimliyi müəyyənləşdirilməyib və o hələ də azadlıqdadır. Bəzi məlumatlara görə, metro hücumu ilə bağlı ikinci şübhəli də axtarışdadır. AFP agentliyinin məlumatına görə təhlükəsizlik kamerasının görüntülərində Khalid el-Bakraouinin arxasında gələn iri çamadanlı başqa bir nəfər də qeydə alınıb.
Bu arada polis bildirir ki, müstəntiqlər Brüsseldə də Parisdə olduğu kimi çox böyük bir hücumun planlaşdırıldığını düşünürlər. Onların fikrincə, burada da Parisdə olduğu kimi partlayışlardan əlavə atışmalar olmalıymış.
Brüssel basqınçıları ilə Paris hücumlarına görə şübhəli bilinən Salah Abdeslam arasında əlaqə də təsdiqini tapıb.
Abdeslam Belçika paytaxtında baş vermiş partlayışlardan 4 gün əvvəl Brüsseldəki mənzillərdən birində həbs edilmişdi.
Müstəntiqlər bildirirlər ki, Khalid el-Bakraoui də saxta adla həmin mənzili kirayələyirmiş.
Cümə axşamı Abdeslamın vəkili bildirib ki, onun müştərisi fikrini dəyişib və Fransaya ekstradisiya edilməsinə müqavimət göstərməyəcək. Lakin bununla yanaşı, 26 yaşlı Abdeslam Brüssel partlayışlarından dərhal sonra müstəntiqlərə ifadə verməsini dayandırıb.
