Suriyanın şimalında üç kürd kantonu federasiyanın yaradıldığını elan edib. Baki-xeber.com xəbər verir ki, Cəzirə, Kobani və Afrin kantonundan olan kürdlər Suriyanın şimalında PKK terror təşkilatının Suriya qanadı PYD-nin nəzarətində olan Rmeylan şəhərində keçirilən iki günlük konfransda Şimali Suriya Birləşmiş Demokratik Sistemi bəyannaməsini qəbul edib.
Konfransda kürdlərin nəzarətində olan üç kantonun da muxtariyyəti təsdiqlədiyi və bu sistemin kantonların yerini alacağı qeyd edilir.
Suriya hökuməti isə qərarın ardından yeni qurumu tanımadığnı, federalizm elanının rəsmi və ya siyasi bir təsiri olmayacağını bəyan edib. Suriya Xarici İşlər Nazirliyinin rəsmisi federalizm qərarının ölkənin ərazi bütövlüyü prinsipinə zidd olduğunu bildirib.
Müxalifət təşkilatlarından Suriya Müxalif və İnqilabçı Qüvvələr Milli Koalisiyası da müəyyən bölgələrdə fərqli bir sistem qurmağın Suriya xalqının iradəsinə zidd olduğunu bildirib
PYD həmsədri Saleh Müslim isə federal sistemin Suriyadan ayrılmaq mənasına gəlmədiyini iddia edir. Müslim bununla bağlı Cenevrəyə rəsmi bir heyət göndərməyə də hazır olduqlarını, ancaq Cenevrə danışıqlarına dəvət edilmədiklərini qeyd edib.
Bundan əvvəl ABŞ Suriya ərazisində kürd muxtariyyətinin yaradılmasına qarşı çıxmışdı. Dövlət Departamentinin sözcüsü Mark Tonerin sözlərinə görə, Suriya ərazisində muxtar və ya yarım muxtar zonaların formalaşması bu ölkədəki siyası böhranın həlli baxımından müsbət addım olmayacaq.
Mark Toner bildirib ki, Suriyanın gələcəyi ilə bağlı addımar bütün Suriya xalqı tərəfindən qəbul edilməlidir.
Rusiya xarici işlər naziri Sergey Lavrov isə Suriya hökuməti və müxalifəti federal sistemə keçid qərarı verəcəyi halda bunu dəstəkləyəcəklərini bildirmişdi.
