“Dərin dövlət” və onun təsisatları Gürcüstanda demokratiyanı sarsıtmağa çalışıb. ABŞ Nümayəndələr Palatasının qəbul etdiyi qanun da Gürcüstana və gürcü xalqına düşmənçilik ruhunda tərtib olunub”.
Bu fikirlər Gürcüstan parlamentinin ABŞ Nümayəndələr Palatasının dəstəklədiyi “Meqobari Aktı” adlı qanun layihəsi ilə bağlı qəbul etdiyi xüsusi bəyanatında əksini tapıb.
Sənəddə aktın saxta ittihamlara əsaslandığı, Gürcüstana və gürcü xalqına düşmənçilik ruhunda tərtib olunduğu xüsusi qeyd olunur. Vurğulanır ki, “Meqobari Aktı” Gürcüstanda əhəmiyyətli demokratik geriləmənin yaşanması, hökumətin avroatlantik inteqrasiyanın qarşısını alması, Gürcüstanın Rusiya, Çin və “digər avtoritar rejimlərlə” qeyri-münasib əlaqələr qurması kimi yalan iddialara əsaslanıb.
Qeyd edilir ki, ölkəyə qarşı kobud, ədalətsiz münasibəti və ikili standartı yalnız bir şey şərtləndirə bilər – “dərin dövlət”, hakimiyyətin “ikinci cəbhənin açılması” barədə tələbi yerinə yetirməməsini Gürcüstana bağışlaya bilməyib.
Bildirilir ki, Gürcüstan parlamenti ABŞ-nin yeni administrasiyası “dərin dövlət”i uğurla zəiflədəcək və bunun nəticəsində Konqres 200 ildən artıq fəaliyyəti ilə qazandığı əvvəlki şöhrətini və adını qaytaracağına ümid edir.
Parlament Gürcüstan və ABŞ arasında münasibətlərin yaxşılaşmasına töhfə verə biləcək bütün məsələlərdə ABŞ Konqresi ilə əməkdaşlığa hazır olduğunu bildirib.
Qeyd edək ki, ABŞ Konqresinin Nümayəndələr Palatasının dəstəklədiyi qanun layihəsində Gürcüstanın yüksək vəzifəli şəxslərinə qarşı sanksiyaların və viza məhdudiyyətlərinin tətbiqi də nəzərdə tutulur.
ZÜMRÜD
