19/11/2019 19:19
728 x 90

İşsiz vətəndaş Şəbnəm Vəlicanova Binəqədi Rayon Məşğulluq Xidmətində hansı problemlə üzləşib?

“Yeni bir bəhanə taparaq dedilər ki, Əmlak Komitəsindən adıma torpaq sahəsinin olub-olmamağı ilə bağlı arayış gətirməyim lazımdır”

img

Redaksiyamıza Binəqədi rayonu, Sulutəpə qəsəbəsi, bağ № 140A- 240A-da qeydiyyatda olan  Vəlicanova Şəbnəm Qamət qızı tərəfindən ərizə daxil olub. Baş redaktor Aydın Quliyevə ünvanlanan ərizədə Ş.Vəlicanova Binəqədi Rayon Məşğulluq Xidməti İdarəsində üzləşdiyi problemin səbəblərinin araşdırlmasını xahiş edir.

“Yazıb sizə bildirmək istəyirəm ki, 2011-ci ildə Bakı Biznes Universitetini maliyyə-kredit ixtisası üzrə bitirmişəm. 2017-ci ilə qədər iş tapa bilmədiyim üçün Binəqədi Rayon Məşğulluq Xidməti  İdarəsinə işlə bağlı müraciət etdim. Onlar mənə ixtisasıma uyğun olaraq kompyuter mühasibliyi kursunu məsləhət bildilər və məni əvvəlcə işsiz kimi qeydiyyata alıb, kursa götürüldüyümü bildirdilər. Ancaq çox təəssüf ki, bir il süründürməçilikdən sonra, nəhayət, məsələ nazirliyin daxili nəzarət şöbəsinə çatdıqdan sonra müsbət həllini tapdı, məni 21.05.2018-ci ildə kursa götürdülər, 20.07.2018-ci ildə oranı bitirdim. Qanunla kursu bitirdikdən 10 gün sonra ixtisasıma uyğun iş təklif etməlidirlər. Qanunda o da var ki, 6 ay müddətində iş tapılmadığı halda, mənim yenidən ora  müraciət edib, başqa bir kursda oxumaq hüququm var. Mən də bu hüququmdan istifadə etmək məqsədilə 2019-cu ilin aprel ayında başqa bir kursa yazılmaq istədiyimi bildirdim. Onlar da fikrimlə razılaşaraq, kulinariya kursuna qeydiyyata götürüldüyümü bildirdilər və bir neçə gündən sonra  kursun başlayacağını, məni də çağıracaqlarını dedilər”.

Ş.Vəlicanovanın bildirdiyinə görə, çox təəssüf ki, qurum yenə də əvvəlki əməllərini təkrarlamağa başlayıb. O yazır ki, 7 ay keçdikdən sonra, 10.10.2019-cu ildə atası ilə birlikdə sözügedən quruma gediblər: “Atam öz iradını bildirdikdə Elşən və Əlizamin adlı şəxslər bidirdilər ki, müəllim, bağışla, yadımızdan çıxıb. Atam da o sözün qarşısında bildirdi ki, bunların hamısı bəhanədir, dedi ki, yaxşı, onda yaddan çıxıbsa, indi yazın və yazıldığını bildirən bir sənəd verin. Onlar da əvvəlcə razılaşdılar, daha sonra yeni bir bəhanə taparaq dedilər ki, Əmlak Komitəsindən adıma torpaq sahəsinin olub-olmamağı ilə bağlı arayış gətirməyim lazımdır. Bundan sonra onlarla danışmağın əbəs olduğunu bildiyimizdən, oradan çıxdıq. Sual olunur: mən niyə 7 ay get-gələ salınırdım? Əgər elə bir kağız lazım idisə, niyə o vaxt mənə deyilmədi? İkincisi, 2018-ci ildə mən o biri kursu oxuyanda niyə o kağız lazım olmamışdı? Deməli, məşğulluq haqqında qanunda belə bir tələb yoxdur. Varsa, həmin sənəd göstərilsin”.

Yeganə istəyinin oxuduğu kursa uyğun işlə təmin olunmaq olduğunu deyən şikayətçinin qeyd etdiyinə görə, bu iki il müddətində ona heç bir iş təklif olunmadığına baxmayaraq, təkrarən kursa cəlb edilməyini istəyir: “Hörmətli Aydın müəllim, sizdən artıq dərəcədə xahiş edirəm, yazdıqlarım redaksiyanız tərəfindən araşdırılsın və məsləhət bilirsinizsə, qəzetinizdə çap olunsun. Qabaqcadan  sizə öz təşəkkürümü bildirirəm”.

  • Elşən Məcidov: “Şəbnəm xanım adına həqiqətən də kənd təsərrüfatına yararlı torpaq sahəsinin olmadığına dair arayışı Binəqədi Rayon Məşğulluq Xidməti İdarəsinə təqdim etdiyi təqdirdə, onun təkrarən yeni kursa cəlb edilməsi üçün heç bir problem yoxdur”

Ş.Vəlicanovanın şikayətini araşdırmaq məqsədilə Binəqədi Rayon Məşğulluq Xidməti İdarəsi ilə əlaqə saxladıq. İdarənin İş axtaran və işsiz vətəndaşların sosial müdafiəsi sektorunun müdiri Elşən Məcidov “Bakı-Xəbər”ə bildirdi ki, indiyə qədər Ş.Vəlicanovanın işlə təmin edilməməsinin səbəbi bu sahə üzrə vakansiyanın olmamasıdır. O qeyd etdi ki, həmin ixtisas üzrə vakansiya olduğu halda müraciət edən vətəndaş işlə təmin edilir. Ş.Vəlicanovanın qanunvericiliyin tələblərinə uyğun təkrar kurslara cəlb edilməməsinin səbəblərinə gəlincə, E.Məcidov qeyd etdi ki, Şəbnəm xanım heç bir məğulluğunun olmamasını təsdiq edən sənəd təqdim etdikdən sonra o təkrarən yeni kurslara cəlb edilə bilər. “Bilirsiniz, vətəndaş kursa göndərilir və onun ixtisası üzrə vakansiya olursa, həmin sahəyə yönəldilir, işlə təmin edilir. Əgər hansısa müəssisə o sahə ilə bağlı vakansiya yeri təqdim etməyibsə, biz kursu bitirənləri ora göndərə bilmirik. Oktyabrın 10-da həmin vətəndaş bizim idarədə olub və biz ona digər kurslara göndərilməməsinin səbəbini izah etmişik. Biz ona yenidən kursa göndərilməsi üçün tələb olunan sənədlərin siyahsını verdik. Dedik ki, vətəndaş Əmlak Komitəsindən adına kənd təsərrüfatı üçün yararlı, məhsul verən torpaq sahəsinin olub-olmaması barədə arayış alıb bizim quruma təqdim etməlidir. Bu sənəd ona görə tələb olunur ki, həmin vətəndaşın adına kənd təsərrüfatına yararlı torpaq sahəsi varsa, o adam məşğul şəxs sayılır. Yəni işsiz adam sayılmır. Belə torpaq sahəsi olan adamalar kənd təsərrüfatı, əkinçiliklə, heyvandarlıqla məşğul ola bilər. Onlar məşğul şəxs sayıldıqları üçün, onları kursa yazmaq mümkün deyil”.

Ş.Vəlicanova ikinci dəfə kursa yazılmaq üçün Məşğulluq Xidmətinə müraciət edərkən sözügedən arayışın o zaman deyil, indi tələb edilməsinin səbəblərinə gəlincə, E.Məcidov bildirdi ki, bu tələb bu ilin aprel ayından qüvvəyə minib: “Bu qayda bu ilin aprel ayından tətbiq edilib. Şəbnəm xanım adına həqiqətən də kənd təsərrüfatına yararlı torpaq sahəsinin olmadığına dair arayışı Binəqədi  Rayon Məşğulluq Xidməti İdarəsinə təqdim etdiyi təqdirdə, onun təkrarən yeni kursa cəlb edilməsi üçün heç bir problem yoxdur”.    

İradə SARIYEVA

Son xəbərlər