Son bir ay ərzində qadınlara qarşı, sadəcə, mediaya məlum olan zorakılıq və cinayət faktları hər kəsi dəhşətə gətirib. Cəmi bir neçə gün ara ilə Bakıda iki qadının 18-20 bıçaq zərbəsi ilə öldürülməsi məsələnin aktuallığını bir qədər də artırıb. Son günlər ailə üzvləri tərəfindən qadınlara qarşı törədilən zorakılıq sərhəd tanımır. Bu işdə müxtəlif soyuq silahlardan: balta, dəyənək, bıçaq və sairədən istifadə edilir.
Qeyd edək ki, döyülən və amansızlıqla qətlə yetirilən qadınların sayı ölkə ictimaiyyətini narahat edir. Müxtəlif bəhanələrlə döyülən, öldürülən qadınların statistikasına nəzər salanda tək bir ayda zorakılığa məruz qalan qadınların sayı il ərzində şiddətə məruz qalan qadınların sayına bərabərdir.
Son günlər qadınların necə amansızlıqla qətlə yetirilməsi faktlarını təqdim edirik.
Bakının Binəqədi rayonu, “Avtovağzal” metrostansiyası yaxınlığında Nicat Abdullayev həyat yoldaşı Leyla Abdullayevanı 3 övladının gözü qarşısında, 20 bıçaq zərbəsi ilə öldürüb. Əri azyaşlı uşaqları ilə Leylanı atası evinə apararkən ona maşında 1 bıçaq zərbəsi vurub. Özünü xilas etmək istəyən Leyla maşından düşərək qaçmaq istəsə də, əri onu yoldaca tutaraq 19 bıçaq zərbəsi vurub. Hadisəyə ailənin övladları da şahidlik ediblər. Bu hadisədən 3 gün sonra analoji hal yenidən təkrarlanıb.
Bakının Nizami rayonunda 39 yaşlı İlham Əkbərov yaşadığı evdə arvadı, 36 yaşlı Əkbərova Cəvahir Telman qızını qısqanclıq zəminində 18 bıçaq yarası ilə öldürüb.
Paytaxtın Xəzər rayonu, Binə qəsəbəsi, Südçülük sovxozunda Firdovsi Məhərrəmov 30 yaşlı gəlini Cəmilə Məhərrəmovanı balta ilə qətlə yetirib. 4 uşaq anası olan Cəmilə aldığı 12 balta yarasından hadisə yerində ölüb. Qətl mərhumun oğlunun gözü qarşısında baş verib.
Xətai rayonu, NZS qəsəbəsində ailə münaqişəsi zəminində qardaş öz bacısı, 1966-cı il təvəllüdlü Köçərli Bikə Məhəmmədəli qızını döyərək ağır xəsarət yetirib.
Həmçinin, Abşeronun Masazır qəsəbəsində intihar edən 26 yaşlı Aynurə Abdullayevanın da ailə münaqişəsi zəminində öldürüldüyü iddia olunur.
Nəsimi rayonunda qayın ana və qızını beysbol dəyənəyi ilə döyərək xəstəxanalıq edib.
Bakıda məhbus Ramin Bayramov ona baş çəkməyə gələn həyat yoldaşı, 33 yaşlı Elmira Bayramovanı döyüb və həbsxanada kəsici alətlə ağır xəsarət yetirib.
Qadınların zorakılığa məruz qalması halı bölgələrdə də müşahidə olunur. Belə ki, Ağsunun Qiyaslı kənd sakini Nəriman Zahidov qardaşının həyat yoldaşı, 19 yaşlı Xumar Zahidovanı kəndirlə boğaraq öldürüb. Yoldaşı hərbçi olan gənc ananın ikiaylıq körpəsi qalıb. Qətlə yetirilən Xumar onu öldürməkdə şübhəli bilinən Nərimanın bibisi qızıdır.
Tərtərin Şıxarx qəsəbəsində qayınata əsəbiləşərək avtomobillə gəlininin üstündən keçib. Hadisənin ailə münaqişəsi zəminində qəsdən törədildiyi bildirilir.
Gəncənin Bayan küçəsində, 1977-ci il təvəllüdlü Natavan Mustafayevanın boğazı əri Məhərrəm Sirati tərəfindən kəsilib. Hadisənin mübahisə zəminində baş verdiyi bildirilir.
Bu günlərdə iki qadın qoyun səbəbindən döyülərək xəstəxanalıq edilib. Belə ki, oktyabrın 9-da Daşkəsənin Əmirvar kəndində 19 yaşlı, hamilə olan Ayşə Abdullayeva qayınanası və qayınatası tərəfindən ölümcül döyülüb. Buna səbəb isə gəlinə valideynləri tərəfindən cehiz olaraq qoyun verilməməsi olub. Digər analoji hadisə isə Gədəbəydə baş verib. Qoyunlara görə əmisi oğlu tərəfindən döyülən 65 yaşlı Zərraf Əsgərova ağır vəziyyətdə xəstəxanaya çatdırılıb.
Ən dəhşətli hadisələrdən biri iki gün öncə qeydə alındı. Belə ki, Goranboy rayonunun Xanqərvənd kəndində 35 yaşlı Sahilə Ələkbərova qonşusundan atlarını geri qaytarmağı tələb edən zaman mübahisə yaranıb. Bu zaman qonşu qadın oğlu və qızı ilə birlikdə S.Ələkbərovanı döydükdən sonra qadını həmin ata bağlayaraq sürüyüblər.
Maraqlıdır, son günlər baş verən qadınlara qarşı zorakılığın arxasında nə dayanır? Əks cinsin nümayəndələri niyə qolunun gücünü qadınların həyatına son qoymaq üçün göstərirlər?
Bildirək ki, son günlər qeydə alınan qadınlara qarşı zorakılığa etiraz etmək məqsədilə sosial şəbəkədə #qadınaşiddətəson haştəqi ilə aksiya başladılıb.
Məlahət İbrahimqızı: “Nə qədər ki, cəmiyyətdə ailələrdəki belə hallara qarşı ciddi reaksiya olmayacaq, belə hallar azalmayacaq”
Millət vəkili Məlahət İbrahimqızı qəzetimiz vasitəsilə hüquq müdafiəçilərinə müraciət etdi: “Nə qədər ki, cəmiyyətdə ailələrdəki belə hallara qarşı ciddi reaksiya olmayacaq, belə hallar azalmayacaq. Hüquq müdafiəçiləri belə hallarla mübarizə məsələlərində nümunə olmalıdırlar”.
Elgün Səfərov: “Məişət zəminində qadına qarşı zorakılığın forması ildən-ilə daha da qəddarlaşır”
Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin müdiri Elgün Səfərov bizimlə söhbətində bildirdi ki, son günlər sosial şəbəkələrdə #qadınaşiddətəson haştəqi ilə başladılan aksiya təqdirəlayiqdir: “Komitə bundan əvvəl də bu kimi kampaniyalara dəstək olub. Biz bu aksiyaya dəstək veririk. Azərbaycan qadını hər zaman aparıcı qüvvə olub. Ona görə də hər kəs birdəfəlik beyninə həkk etməlidir ki, qadına qarşı zorakılıq cinayətdir. Bu, qanun pozuntusudur, insan hüquqlarının pozulması deməkdir. Bu, bir aksiomadır və bunun bir fakt kimi cinayət işi olduğu hər kəs tərəfindən qəbul edilməlidir. Bu cinayəti törədənlər də məsuliyyətə cəlb olunmalıdırlar. Məişət zəminində qadına qarşı zorakılığın forması ildən-ilə daha da qəddarlaşır. Təəssüflər olsun ki, cəmiyyətdə zorakılığı normal yanaşma kimi qəbul edənlər var və son vaxtlar bu kimi hadisələrə təəccüblənmirlər. Eyni zamanda, küçədə zorakılığa məruz qalaraq bıçaqlanan qadına kömək etmək əvəzinə, onu videolentə alırlar. Zorakılığa yanaşma da psixoloji məsələlərdən irəli gəlir. Qadına cəmiyyətdə münasibət dəyişməlidir. Qadın anadır, bacıdır, qızımızdır”.
Fatimə Hacıbəyli: “Son günlər məişət zorakılığı qurbanlarının sayı artmaqda davam edir”
“Vəfa” Sosial-İctimai Birliyinin rəhbəri Fatimə Hacıbəyli bildirdi ki, hər bir ailə özü üçün kiçik bir dövlətdir, onun öz qanunları, münasibətləri var: “Biz bilmirik ki, bu ailə sevgi, hörmət üzərində qurulub, yoxsa qadını zorla ərə veriblər. Biz zorakılığın baş verdiyi ailədə mühitin necə olduğunu bilmirik. Bilmirik ki, dünyaya gələn uşağı bunlar istəyib, ya yox. Son günlər məişət zorakılığı qurbanlarının sayı artmaqda davam edir. Qolu güclü kişilər müxtəlif bəhanələr gətirərək övladının anasını amansızlıqla qətlə yetirirlər. Ümumiyyətlə, pis vərdişlər, tüfeyli həyat, ailədaxili münaqişələr və onların gizlədilməsi zorakılıq hallarına əsas səbəbdir.
Bir neçə gün öncə Goranboyda insanı dəhşətə gətirən hadisə qeydə alınıb. Qadını döyərək ata bağlayıb sürüyüblər. İnsanlarda bu qədər hikkənin, aqressiyanın, paxıllığın səbəbi nədir? Qadını döyüb ölümcül hala salanda digər qonşular görməyib? Əlbəttə, görüb. Biganəlik. Mənə aid deyilsə, nə olursa-olsun. Bəzən deyirlər ki, kasıblıq, maddi sıxıntılar var. Əvvəl də var idi. Ailədə 5-6 uşaq olurdu. Uşaqlar bir-birinin yamaqlı paltarı ilə gəzirdilər. Onlarda nə qədər səmimiyyət, mehribanlıq var idi. Hamı işləyirdi. Ancaq indi kimsə qonşuya atılan daşın nə üçün atıldığı ilə maraqlanmır. “Mənə dəymir, kimə nə olur-olsun” prinsipi ilə yaşayırlar. İnsanlarda məsuliyyət hissi yoxdur”.
Günel CƏLİLOVA
