“Polisə Dəstək” İB “İnsan alveri cinayətlərini doğuran səbəblərin və problemin xəbərdarlığı, tədqiqi, habelə profilaktikasında ictimaiyyətin rolu”mövzusunda 8 oktyabr tarixində Masallı Dövlət Regional Kollecində, 10 oktyabr tarixində ADPU-nun Cəlilabad filialında Rayon Polis şöbələri, icra orqanlarının müvafiq sturukturları və KİV-lə birgə seminar- mühazirə keçirib.
Maarifləndirmə xarakterli tədbir QHT Şurasının maliyyə dəstəyi ilə həyata keçirilmiş “İnsan alverinin qarşısının alınması, problemlərin xüsusiyyətləri, habelə oxşar hüquqazidd əməllərin, uşaqların insan alverinə məruz qalma risqlərinin tədqiqi və bu istiqamətdə ictimai rəyin öyrənilməsi” ətrafında iştirakçılara geniş məlumat verilib.
Tədbiri giriş sözü ilə açan Kollecin direktoru Vidadi Nəzərov qısa informasiyadan sonra sözü “Polisə Dəstək” İB-nin sədri Şəmsəddin Əliyevə verib. O, insan alverinin sosial hüquqi hadisə kimi ictimai orqanizmin normal inkişafına mane olduğunu, insanların sosial davranışlarına, onların iradə azadlığına və psixikasına neqativ təsir etdiyini, insan alverini doğuran səbəblərin aradan qaldırılması və bu işin nəzarətdə saxlanılması, habelə onun xəbərdarlığı və profilaktikası üçün vətəndaşların maarifləndirilməsinin dövlətin cinayətkarlıqla mübarizə siyasətində prioritet təşkil etdiyini diqqətə çatdırıb.
Respublika DİN-nin statistik məlumatlarına görə, 2018-cı il ərzində 144(+2) insan alveri cinayətləri müəyyən edilmiş,28(+11) nəfərdən ibarət 13(+5) cinayətkar qrup zərərsizləşdirilərək insan alverinin qurbanı olmuş 98(+27) şəxsin cəmiyyətə reinteqrasiyası təmin edilib. “İnsan Alverinə Qarşı Mübarizə Baş İdarəsi”nin bu istiqamətdə həyata keçirdiyi əməliyyat-axtarış tədbirləri SNQ dövlətlərindən fərqli və görk olacaq həddədir.
Ş.Əliyev daha sonra insan alverinin insan hüquq və azadlıqlarına ciddi təhlükə olduğu, insan ləyaqətini alçaldan, şəxsiyyətin toxunulmazlığına yönələn qəsd, iqtisadi stabilliyi sarsıdan, vətəndaşların iradə azadlığını məhdudlaşdıran xüsusilə ağır və transmilli mütəşəkkil cinayətkarlığın mühüm, təhlükəli problemi barədə məlumat verib. BMT-nin statistikasına görə, il ərzində insan alverindən gələn gəlirin 32-35 milyard dollar təşkil etdiyini və 2,5 milyon insanın bu cinayətin müxtəlif formalarından əziyyət çəkdiyini xatırladıb, habelə qurbanların sırasında qadın və uşaqların çoxluq təşkil etdiyini narahatlıqla ifadə edib. Sonda Ş.Əliyev vətəndaşları ayıq-sayıq olmağa çağırıb, “iş və təhsillə bağlı vədlərə ümid bəsləmək sadəlövhlükdür” - deyə çıxışını bitirib. Tədbirdə Masallı RPŞ-nin rəisi, polis polkovniki Habil Əmiraslanov və yetkinlik yaşına çatmayanların işi üzrə baş inspektoru S.Əliyev də çıxış edərək, verilən sualları mahiyyəti üzrə cavablandırıblar.
Tədbir 10 oktyabrda ADPU-nun Cəlilabad filialında Pedaqoji və tələbə kollektivinin iştirakı ilə davam edib. Seminar mühazirəni giriş sözü ilə məktəbin direktoru Xudayar Sultanlı açıb, sonra məruzə ilə “Polisə Dəstək” İB-nin sədri Şəmsəddin Əliyev çıxış edib. Tədbirdə Cəlilabad RPŞ-nin rəisi polis polkovniki Mübariz Quliyev insan alveri cinayətlərinin ictimai münasibətlərə zidd hal olduğu, cəmiyyətin dəstəyilə belə hüquqazidd və Cinayət Məcəlləsi ilə qadağan olunan əməllərin zərərindən danışıb. Tədbirin sonunda iştirakçılara “İnsan alveri” kitabçası paylanıb və insanın alqı - satqısını əks etdirən 10 dəqiqəlik videofilm nümayiş etdirilib.
.jpg)
.jpg)
