Azərbaycanda “Tütün məmulatlarının istifadəsinin məhdudlaşdırılması haqqında” Qanun qüvvəyə mindikdən sonra tütündən istifadə (siqaret çəkmə) ilə bağlı çox ciddi məhdudiyyətlər yer alıb. Belə ki, təhsil və tərbiyə, səhiyyə və tibbi reabilitasiya müəssisələrində, habelə onların ərazilərində, restoran, kafe, barlar da daxil olmaqla, ictimai iaşə obyektlərində, piyada keçidlərində, sərnişin avtobuslarında və taksilərdə, liftlərdə, avtovağzallarda, dayanacaqlarda, yanacaqdoldurma məntəqələrində və digər yerlərdə siqaret çəkmək qadağan olunur.
Lakin qadağaya heç də əməl olunmur. İctimai yerlərdə yenə də siqaret çəkilir, bununla yanaşı, siqaret istifadəçiləri həmin nəsnənin kötüyünü zibil qabına deyil, şəhərin istənilən yerinə atırlar.
Daxili İşlər Nazirliyinin Baş İctimai Təhlükəsizlik İdarəsi tərəfindən "Tütün məmulatlarından istifadənin məhdudlaşdırılması haqqında” Qanunun tələblərindən irəli gələn vəzifələrin icrası diqqət mərkəzində saxlanır, tütün tüstüsünün ətraf mühitə ziyanlı təsirinin azaldılması məqsədilə bir sıra məqsədyönlü tədbirlər həyata keçirilir. Keçirlən tədbirlər zamanı, ümumilikdə, 2019-cu ilin 9 ayı ərzində respublikanın şəhər, rayon polis orqanları tərəfindən keçirilmiş tədbirlər nəticəsində "Tütün məmulatlarından istifadənin məhdudlaşdırılması haqqında” Qanunla qadağan edilmiş yerlərdə tütün çəkdiklərinə, tütün məmulatları tullantılarını ətraf mühitə atdıqlarına görə 1923, tütün məmulatlarını yektinlik yaşına çatmayanlara satdıqlarına görə 224 şəxs İnzibati Xətalar Məcəlləsinin 212.1-ci, 212.4-cü və 455.2-ci maddələrinə əsasən inzibati məsuliyyətə cəlb olunub, onlara tətbiq edilmiş cərimələr 79.550 manat təşkil edib.
İctimai yerlərdə siqaret istifadə edənlərin, həmçinin, tütün məmulatını ətrafa tökənlərin cərimələnməsini ekspertlər müsbət qarşılayırlar.
“...yaxın 10 ildə siqaretdən istifadə 10 faiz azaldılmalıdır”
Azad İstehlakçılar Birliyinin (AİB) sədri Eyyub Hüseynov bildirdi ki, ictimai yerlərdə tütün məmulatlarından istifadənin qadağan edilməsinin məqsədi əhalinin sağlamlığının qorunması, sağlam həyat tərzinin təbliği, eyni zamanda, uşaqların və gənclərin sağlam böyüməsinə nail olmaqdır: “Qanun tütün məmulatlarından istifadəni və tütün tüstüsünün ətraf mühitə ziyanlı təsirlərini azaltmaq üçün hüquqi əsasları müəyyən edir. Ölkəmizdə qeyri-infeksion xəstəliklərlə mübarizəyə dair 2015-2020-ci illər üçün Strategiya da qəbul edilib. Həmin sənədə əsasən, yaxın 10 ildə siqaretdən istifadə 10 faiz azaldılmalıdır”.
AİB sədrinin sözlərinə görə, qadağan edilən yerlərdə tütün məmulatlarından istifadənin qarşısını almaq üçün, ilk növbədə, əhali fəal olmalıdır: “Əhali arasında maarifçilik səviyyəsi aşağıdır, siqaretdən istifadə edənlər qadağan olunan yerlərdə çəkməyə davam edir, siqareti harda gəldi yerə atırlar. Bu kimi əməllərin qarşısının alınması üçün cəza tədbirləri gücləndirilməlidir. İctimai yerlərdə siqaret çəkilməsinə, siqaretin hara gəldi atanlara qarşı cərimə məbləğinin yüksək olması təqdirəlayiqdir. Belə olarsa, istifadəçilər harda gəldi siqaret çəkməzlər”.
Günel CƏLİLOVA
