İllər öncə şəhər yerlərində zibil qutuları yox dərəcəsində idi. Böyüklü-kiçikli hər kəs zibili küçəyə atmasını zibil qutularının olmaması ilə əlaqələndirirdi. Amma son illərdə həm paytaxtda, həm də digər şəhərlərdə küçə və prospektlərə zibil qutularının qoyulması bu bəhanəni qismən aradan qaldırdı. Son zamanlar Bakıda məişət tullantıları üçün qablar yeniləri ilə əvəzlənir.
Bəllidir ki, zibil qutuları əsasən yaşayış yerlərində, binaların həyətində, yol kənarında qoyulur. Əsasən də zibil qutuları binaların qarşısında qoyulur. Zibil daşınana qədər və daşınandan sonra həmin qutulardan xoşagəlməz qoxu ətrafa yayılır.
Bəzi ərazilərdə zibil qutuları əsasən binaların girişi ilə üzbəüz yerlərə qoyulur ki, bu səbəbdən ətrafı üfunət iyi bürüyür. Ekspertlər bildirirlər ki, zibil qutuları vaxtlı-vaxtında dərmanlanarsa, ətrafa qoxu yayılmaz. Ancaq Bakı və bölgələrdə zibil qutularının nə zamansa dezinfeksiya olunduğu bəlli deyil. Sovet dönəmində zibil qutuları hər gün dezinfeksiya olunardı.
Qeyd edək ki, qonşu ölkələrdə hər səhər zibil qutuları xüsusi dərmanla dezinfeksiya olunur. Rusiya və Gürcüstanın zibil qutularından, Bakıda olduğu kimi, üfunət iyi gəlmir. Ancaq bizdə isə zibil qutuları nəinki dezinfeksiya olunmur, hətta bəzi ərazilərdə zibil qutuları vaxtında daşınmadığı üçün həmin yerdə zibil topası əmələ gəlir.
Zibil konteynerlərinin yaşayış yerlərində, binaların həyətində, yol kənarında qoyulduğunu nəzərə alsaq, görərik ki, bu konteynerlərin dezinfeksiya məsələsi də aktuallıq kəsb edir. Maraqlıdır, zibil qabları dezinfeksiya olunurmu və bunun üçün nə qədər müddət nəzərdə tutulub?
- Bakı Şəhər Mənzil-Kommunal Təsərrüfatı Departamenti - İlqar Hüseynov: “Zibil qutuları mütəmadi olaraq xüsusi yuyucu vasitələrdən istifadə edilməklə yuyulur”
Bakı Şəhər Mənzil-Kommunal Təsərrüfatı Departamentinin Kommunal xidmətlər müəssisəsinin direktoru İlqar Hüseynovun sözlərinə görə, zibil qutuları mütəmadi olaraq xüsusi yuyucu vasitələrdən istifadə edilməklə yuyulur. Onun sözlərinə görə, bu işi rayon mənzil-kommunal təsərrüfatı birliklərinin əməkdaşları həyata keçirirlər: “Bakıda zibil qutularının yenilənməsi ilə bağlı işlər başa çatdırıldıqdan sonra dezinfeksiya işləri daha tez-tez aparılacaq. Məlumat üçün bildirim ki, paytaxtın Nərimanov, Səbail, Yasamal, Binəqədi, Nəsimi və Nizami rayonlarında məişət tullantılarının yığılması üçün iki rəngdə plastik zibil qutuları qoyulub. Gələcəkdə bütün rayonlarda belə qutuların qoyulması nəzərdə tutulur”.
- Telman Zeynalov: “Zibil qutularının yeri və ətrafı vaxtlı-vaxtında dezinfeksiya olunmalıdır”
Ekoloq Telman Zeynalov bildirdi ki, zibil qutularının yeri və ətrafı vaxtlı-vaxtında dezinfeksiya olunmalıdır: "Hər rayonun Mənzil-Kommunal Təsərrüfatı Birliyi (MKTB) ərazi dezinfeksiya şöbələri ilə bu xidməti həyata keçirmək üçün müqavilə bağlamalıdır. MKTB-lər həmin müqavilələri bağlamağa təşəbbüs göstərmirlər. Müqavilələrin sayı sıfır səviyyəsindədir. Ona görə də ağcaqanad, həşəratlar artır. Vətəndaşlar məişət tullantılarının mütəmadi daşınmamasından şikayət edirlər. Vaxtında daşınmayan və dezinfeksiya olunmayan zibil qutuları xəstəlik mənbəyidir”.
Həmsöhbətimizin sözlərinə görə, şəhərin zibil problemini həll etmək məqsədilə dövlətin, özəl sektorun və insanların kifayət qədər pul verməsinə baxmayaraq, Bakı şəhərinin təmizliyinin təmin edilməsi sahəsində ciddi problemlər hələ də qalır. Pis haldır ki, bu, aidiyyəti qurumları narahat etmir.
Günel CƏLİLOVA
