“Onlar birmənalı olaraq dövlətin içməli su siyasətinə zərbə vurmaq niyyəti güdürlər”
“Hesab edirəm ki, su filtri satan şirkətlərin gün ərzində xidmət göstərməsinə limit qoyulmalıdır”
Bəzi şirkətlər vətəndaşların rahatlığını qətiyyən nəzərə almaq istəmir. Səhər tezdən başlamış gecə saat 23-24-ə qədər vətəndaşları narahat etməkdə davam edirlər. Xüsusən də su filtri satan şirkətlərin əməkdaşları gecə demədən, gündüz demədən qapılarımızın zəngini çalır və öz şirkətlərinin məhsullarını təklif edirlər. Bu şirkətlərin əməkdaşları hətta mühafizə olunan binalara belə asanlıqla daxil ola bilir və sakinlərin rahatlığını pozurlar. Onlardan soruşanda ki, niyə gecənin bu vaxtı qapını döyürsüz? “Nə edək bəs gündüzlər sakinlərin çoxu işdə olduğu üçün axşam üstü saat 5-dən, 6-dan sonra işə başlayırıq. Sizə pislik etmirik ki, öz yüksək standartlı filtrlərimizi təklif edirik. Bilmirsiz ki, içdiyiniz və başqa işlər üçün istifadə etdiyiniz su həddən artıq çirkli və zərərlidir? Bizim şirkətin su filtrlərini alıb istifadə etsəniz içdiyiniz su daha təmiz olar”-deyirlər. Bu şirkətlərin əməkdaşları əsasən gənc qızlar və oğlanlardır. Onların çoxu tələbə olduqlarını, işdən sonra bu işlə məşğul olduqlarını deyir. Bəzi su filtri satan şirkətlərin bu addımı birmənalı olaraq öz biznes maraqlarına xidmət etməklə yanaşı, həm də dövlətin ekoloji cəhətdən təmiz su siyasətinə yönəlik mənfi hərəkətlərdir. Bu şirkətlərin əməkdaşları aldıqları təlimatlara uyğun şəkildə, bir qayda olaraq, dövlətin əhaliyə verdiyi işməli suyun keyfiyyətinin həddən artıq aşağı olduğunu və bu suların nə içmək, nə də digər məqsədlər üçün istifadə etməkdən ötrü yararlı olduğunu iddia edirlər.
Onu da bildirək ki, işbazların təklif etdiyi su filtrlərinin qiyməti elə də ucuz deyil. Bu hər bir vətəndaşa ən azı 2000-3000 manata başa gəlir. Bir çox hallarda su filtrlərini kreditlə də təklif edirlər. Bu filtrləri alıb həm içməli, həm də hamamxana kranına bağladan müştərilərlə söhbət zamanı məlum oldu ki, aldıqları filtrlər elə də keyfiyyətli deyil. Sadəcə, onlar bu işbazların toruna düşüblər.
Azərbaycan əhalisinin ekeloji cəhətdən təmiz su ilə təmin olunmasının birbaşa dövlətin və əlaqədar qurumların diqqətində olduğu məlumdur. Bu halda su filtri satan şirkətlərin məqsədi tamamilə aydındır - pul qazanmaq, öz biznes maraqlarını təmin etmək. Onlar belə rəy yaratmaq istəyirlər ki, guya əhalinin təmiz su içməsi onlar üçün önəmlidir. Halbuki, söhbət onların daha çox qazanc əldə etməsindən gedir. Gənc qızları gecənin gec saatlarında evbəev salmağın özü də yaxşı hal deyil. Camaatın yatdığı bir vaxtda kiminsə qapını döyüb hansısa biznes məhsulu təklif etməsi həqiqətən də dəhşətlidir. İşlərini gündüzlər görmək əvəzinə gecələr görürlər, bu da vətəndaşları ciddi narahat edir.
Sosial sahə üzrə ekspert Aytəkin Kamranqızı baki-xeber.com-a bildirdi ki, bəzi işbaz şirkətlərin əməkdaşlarının bu qeyri-etik davranışları əhalini cana gətirib. Bunun ciddi problem olduğunu vurğulayan ekspertin sözlərinə görə, ümumiyyətlə, iş vaxtından sonra hansısa şirkətin əməkdaşlarının sakinlərin qapısını döyməsi, onlara öz məhsullarını təklif etməsi ciddi qanun pozuntusudur. “Müəyyən işbaz şirkətlər var ki, onların məqsədi əslində vətəndaşları aldatmaqdır. Su filtri satan şirkətlərin də bu yola qulluq etməsi şübhə doğurmur. Gecə saat 11-də, 12-də vətəndaşın qapısını döymək, ona su filtri şirkətinin məhsulunu təklif etmək ən azından qeyri-etikdir. Bu olmaz. Şirkətlər anlamalıdır ki, əməkdaşları yalnız iş saatlarında vətəndaşı narahat edə bilər, qalan vaxtlarda onların hanısa sakini rahatsız etməsi yolverilməzdir. Vətəndaş axşam yorğun vəziyyətdə işdən evə qayıdır, gün boyu steress, qayğı, gərginlik içində olur, evə gəlib dincəlmək istəyir. Bu vaxt qapı döyülür, vətəndaş qapını açır və qarşısında su filtri satan şirkətlərin əməkdaşlarını görür. Bu şirkətlərin hamısı eyni sözü əzbərləyib ki, bəs dövlətin sizə verdiyi su keyfiyyətsizdir, ekoloji cəhətdən təmiz deyil, siz bizim şirkətin filtrlərini alın təmiz su için. Vətəndaş da, təbii, nəzakətlə həmin şirkətlərin əməkdaşlarını yola salır. Hadisə ertəsi gün gecə saatlarında bir daha təkrarlanır. Bu işbaz şirkətlərin külli məbləğdə qazanc götürməsi, biznesini irəlilətməsi vətəndaşın narahatlığı, əndişəsi hesabına başa gəlir. Onlar birmənalı olaraq dövlətin içməli su siyasətinə zərbə vurmaq niyyəti güdürlər. Guya bunlar vətəndaşları dövlətdən çox istəyirlər. Hesab edirəm ki, su filtri satan şirkətlərin gün ərzində xidmətinə limit qoyulmalıdır. Yəni onların xidmət saatları konkret olaraq müəyyən edilməlidir ki, bu şirkətlərin işçiləri gecə saatlarında vətəndaşın qapısını döyüb onu narahat etməsin. Mənim özümün də dəfələrlə qapımı bu şəkildə döyüblər. Demişəm ki, mənə su filtri lazım deyil, mən də, ailəm də dövlətin verdiyi suyun keyfiyyətinə inanırıq və ondan istifadə edirik. Yenə də öz bildiklərini deyirlər və dövlətin verdiyi içməli suyun keyfiyyətini şübhə altına alan fikirlər bildirirlər”.
Əlaqədar qurumların bu şirkətlərlə bağlı ölçü götürməli olduğunu deyən ekspert hesab edir ki, dövlətin içməli su siyasətini şübhə altına almaq məqsədilə həyata keçirilən qara təbliğat kampaniyası vətəndaşlarda inamsızlıq aşılamağa hesablanıb. “Su filtri şirkətlərinin kələkbaz, mənfətpərəst olduğunu, vətəndaşları aldatdığını dəfələrlə “Azərsu” ifşa etsə də, onlar yenə də əməllərindən qalmır. Dövlətin içməli su siyasətini həyata keçirən “Azərsu” dönə-dönə verilən içməli suyun keyfiyyətinin aşağı olmadığını, süyun bir neçə mərhələdə filtrizasiya olunduğunu qeyd edib, əhalini işbazların toruna düşməməyə çağırıb. Deyim ki, bəzi vətəndaşlar bu şirkətlərə aldansa da, əhalinin böyük hissəsi onları qapıdan qovur. Çünki bu addımı bezdikləri, usandıqları üçün atırlar”-deyə ekspert qeyd etdi.
İradə SARIYEVA
