Bakının böyük qəsəbələrindən biri də Qaraçuxurdur. Suraxanı rayonuna aid olan bu qəsəbədə rəsmi məlumata görə 80 min nəfər, qeyri-rəsmi məlumata görə, 100 min nəfərədək əhali yaşayır. Qəsəbə sakinlərini narahat edən başlıca problem ictimai nəqliyyatla bağlıdır. Problem ondadır ki, sözügedən qəsəbədən metroya yalnız bir marşrut – 81 saylı avtobus hərəkət edir. Bu da çox ciddi sərnişin sıxlığına səbəb olur.
Bu barədə qəzetimizə şikayət edən Qaraçuxur qəsəbə sakini Burhan Məmmədovun sözlərinə görə, metro istiqamətində yalnız 81 saylı marşrut işləyir ki, bu da sakinlərin tələbatını ödəmir:
Burhan Məmmədov: “81 saylı avtobusda hər gün sərnişin sıxlığı müşahidə edilir”
“81 saylı avtobusda hər gün sərnişin sıxlığı müşahidə edilir. Bunun nəticəsində Qaraçuxur sakinləri səhərlər işə, təhsil müəssisələrinə vaxtında gedə bilmirlər. Eyni zamanda, axşam evə qayıdanda yollarda qalmalı oluruq. Problem ondadır ki, 81 saylı marşrut xəttində hərəkət edən avtobuslar kiçikqabaritlidir. Salonu balaca olduğundan, sərnişin tutumu çox azdır. Ona görə də mövcud tələbata uyğun gəlmir. Ehtiyac var ki, salonu geniş olan avtobuslar xəttə buraxılsın. Yaxud da əlavə bir marşrut xətti açılsın ki, problem aradan qaldırılsın. Yoxsa, bu problemi həll etmək mümkün deyil. Hər gün yaşanan bu problem Qaraçuxur sakinlərinin narazılığına səbəb olur. Əvvəl 125, 33 saylı avtobuslar qəsəbədən birbaşa şəhərə gedirdi. Bir neçə il əvvəl bu marşrutlar ləğv edildi. Nəticədə ümid yalnız bir marşruta qaldı. İndi camaat əziyyət çəkir. Əvvəlki dayanacaqlarda avtobus sərnişinlə dolduğu üçün, qəsəbənin digər dayanacaqlarında avtobusa minmək mümkün olmur. O dərəcədə ciddi sərnişin sıxlığı müşahidə edilir”.
B.Məmmədovun şikayətindən o da məlum oldu ki, yeni dərs ilinə qədər bu problemin həll ediləcəyi deyilirdi: “Ancaq bu baş vermədi. Bununla belə, biz gözləyirdik ki, şəhərə gətirilən yeni avtobuslar bizim qəsəbəyə işləyən marşrut xətlərinə də veriləcək. Ancaq belə olmadı. Hesab edirəm ki, Bakı Nəqliyyat Agentliyi yerində vəziyyətə baxmalıdır. Yaranan vəziyyətdən çıxış yolu üçün konkret tədbirlər görməlidir”.
Mais Ağayev: “Qaraçuxur istiqamətində də marşrut probleminin həllinə baxılır”
Məsələ ilə bağlı Bakı Nəqliyyat Agentliyinin mətbuat xidmətinin rəhbəri Mais Ağayevlə əlaqə saxladıq. O, “Bakı-Xəbər”ə açıqlamasında bildirdi ki, Qaraçuxur qəsəbə sakinlərinin üzləşdiyi problem həllini tapacaq: “Artıq neçə vaxtdır avtobus xətlərinin optimallaşdırılması işləri gedir. Bu işlər çərçivəsində ətraf kənd və qəsəbələrdə ictimai nəqliyyatla bağlı mövcud olan çatışmazlıqlar, problemlər öyrənilir. Hazırda bütün bunlar təhlil edilir. Qaraçuxur istiqamətində də marşrut probleminin həllinə baxılır. Yəqin ki, həmin istiqamətdə sərnişinləri razı salacaq və qane edəcək tədbirlər görüləcək. Yaxın vaxtlarda bu istiqamətdə işlər görüləcək. Çünki hazırda təzə avtobuslar gətirilib, xərclər optimallaşdırılır. Bu işlər çərçivəsində Qaraçuxurla bağlı məsələ də öz həllini tapacaq”.
Vidadi ORDAHALLI
