Azərbaycanda “ASAN xidmət” mərkəzlərinin fəaliyyətə başlaması vətəndaşların həyatına müsbət təsir göstərməyə başlayıb. Vətəndaşlar “ASAN xidmət”in göstərdiyi yüksək xidmətin faydasını hər gün öz həyatlarında yaxından hiss edirlər. Onu da qeyd edək ki, bu xidmətə müraciət edənlərin sırası günü-gündən genişlənir.
Rəsmi məlumatlara görə, “ASAN xidmət”ə müraciət edənlərin sayı 33 milyona çatıb. Prezident yanında Vətəndaşlara Xidmət və Sosial İnnovasiyalar üzrə Dövlət Agentliyindən mətbuata verilən məlumata görə, 33 milyonuncu müraciət 2 saylı Bakı “ASAN xidmət” mərkəzinə Rəşad Abdullayev tərəfindən edilib. O, Ədliyyə Nazirliyi tərəfindən həyata keçirilən notariat xidmətindən yararlanıb.
Qeyd edək ki, hazırda 15 “ASAN xidmət” mərkəzi fəaliyyət göstərir. Onlardan 5-i paytaxt Bakı şəhərində olmaqla, digərləri Sumqayıt, Gəncə, Sabirabad, Bərdə, Qəbələ, Masallı, Quba, Mingəçevir, İmişli və Şəkidədir. Bundan başqa, regionlarda 10 səyyar “ASAN xidmət” avtobusu və səyyar “ASAN qatar” vasitəsilə vətəndaşlara səyyar formada xidmətlər göstərilir.
Həmçinin, Bakı şəhərində əhaliyə kommunal sahədə xidmətlər göstərən 2 “ASAN Kommunal” mərkəzi fəaliyyətdədir.
“...bütün problemlərini eyni yerdə həll etməsi əhalinin bu xidmətdən yararlanmağa marağını artırıb”
“ASAN xidmət”ə müraciət edənlərin sayının 33 milyona çatmasının əhəmiyyətini şərh edən iqtisadçı-ekspert Ruslan Atakişiyev “Bakı-Xəbər”ə bildirdi ki, “ASAN xidmət” mərkəzləri fəaliyyətə başladıqdan sonra vətəndaşlar daha çox bu xidmət qurumuna müraciət edirlər. O hesab edir ki, “ASAN xidmət” mərkəzlərində yaradılan şərait vətəndaşlar üçün bütün xidmətləri əlçatan edib, bu səbəbdən də hazırda bu quruma müraciət edənlərin sayı 33 milyona çatıb. Uzun müddət bəzi dövlət qurumlarında süründürməçiliklə, bürokratiya ilə üzləşən vətəndaşların bu gün “ASAN xidmət” mərkəzlərində bunları görməməsi, bütün problemlərini eyni yerdə həll etməsi əhalinin bu xidmətdən yararlanmağa marağını artırıb. “Bilirsiniz ki, Azərbaycanda bir neçə ildir fəaliyyət göstərən “ASAN xidmət” mərkəzləri insanların həyatına yaxından daxil olub. Uzun illər dövlət qurumlarında bürokratiya, süründürməçilik, get-gəllə üzləşən vətəndaşlar bu gün “ASAN xidmət” mərkəzlərində bu hallarla qarşılaşmırlar. Azərbaycan Respublikasının Prezidenti İlham Əliyevin ideyası əsasında təsis edilən “ASAN xidmət”in yaradılmasında məqsəd vətəndaş məmnunluğunu təmin etmək, onların müxtəlif məsələlərlə bağlı sənədləşdirmə problemlərini asanlıqla yoluna qoymaqdır. Artıq “ASAN xidmət” özünü doğruldub. Burada vətəndaşları cəlb edən ən mühüm məsələlərdən biri onunla bağlıdır ki, vətəndaş ona aid olan sənədləşdirmə işlərini eyni binada həyata keçirir. Bir mərtəbədə həm notariat, həm bank, həm də digər xidmət sahələri fəaliyyət göstərir və vətəndaş vaxt itkisinə yol vermədən bütün sənədləşmə işini həll edə bilir. Onu da deyim ki, “ASAN xidmət” sistemində vətəndaşlara xidmət göstərən xidmət sahələrində şəffaflıq tam təmin olunub. Vətəndaşdan rüşvət, “şirinlik” tələb olunmur, aldıqları sənədlərə dövlət tərəfindən müəyyən edilmiş məbləğdə vəsait ödəyirlər. Bu da onlar üçün sərfəlidir. Bilirsiniz ki, “ASAN xidmət” mərkəzləri fəaliyyətə başladıqdan sonra vətəndaşlar sənədləşmə işləri üçün başqa orqanlara çox nadir hallarda müraciət edirlər. Bu da o deməkdir ki, əhalinin 80-85 faizi yalnız “ASAN xidmət”in xidmətindən yararlanır”.
R.Atakişiyev, həmçinin, vurğuladı ki, “ASAN xidmət” mərkəzlərində həyata keçirilən işlər vətəndaşları tam olaraq təmin edir. “Vətəndaşlar razı qalmasalar, heç bir vaxt “ASAN xidmət”ə müraciət etməzlər. Demək, “ASAN xidmət” artıq dövlətin və xalqın etimadını doğruldub, elə bunun nəticəsdir ki, bu qurumda 33 milyonuncu vətəndaş müraciəti qeydə alınıb. Hesab edirəm ki, tez bir zamanda bu rəqəm daha da artacaq. “ASAN xidmət” mərkəzlərinə vətəndaşlarımızla yanaşı, əcnəbi vətəndaşlar da müraciət edirlər və onların da sənədləşmə ilə bağlı problemləri maneəsiz olaraq burada öz həllini tapır. Deyim ki, “ASAN xidmət” təsisatı xarici ölkə vətəndaşlarının da diqqətini cəlb edir və məmnunluqlarını təmin edir” - deyə R.Atakişiyev bildirdi.
İradə SARIYEVA
