Ali məktəblərə hazırlaşan abituriyentlərin bir çoxu məktəbdən kənarda da müxtəlif fənlər üzrə repititor yanına gedirlər. Onların repititorların yanına getməkdə məqsədləri əlavə vəsaitlər hesabına öz biliklərini daha da möhkəmləndirməkdir. Amma, bildiyimiz kimi, bir sıra hallarda bilik yükü olmayan 11-cilərə heç repititorların verdiyi biliklər də kömək etmir. Problem təkcə bu deyil.
Repititor yanına gedən abituriyentlərin qarşılaşdıqları daha ciddi bir çətinlik də var. Bu problem artıq onların özlərini və valideynlərini dilə gətirib. Bu da abituriyentlər üçün nəzərdə tutulan dərsliklərin, əlavə tədris vəsaitlərinin qiymətinin sürətlə bahalaşmasıdır. Bundan başqa, bu tədris vəsaitləri içində cüzi dəyişikliklər edilməklə hər il yenidən nəşr edilir. Repititorlar da abituriyentdən tələb edir ki, köhnə nəşr işə yaramadığı üçün yeni vəsaitlər almalıdırlar. Xüsusən də bu tələbin riyaziyyat fənni ilə bağlı olduğu bildirilir. Qiymətlər isə ilbəil daha da bahalaşır. Məsələn, keçən il cəbr və həndəsə vəsaitləri bütöv dərslik halında 15 manata satılırdısa, bu il dəyişiklik edilib. Ayrı-ayrılıqda satılan cəbr və həndəsə dərs vəsaitlərinin qiyməti 11 manat 50 qəpikdir.
Keçən il alınan vəsaitin bu il istifadəsinə icazə verilmir. Halbuki, keçən il nəşr olunub istifadəyə verilən tədris vəsaitləri ilə builki vəsaitlərin içindəki tapşırıqlar arasında elə də ciddi fərq olmur. Suallar da, mövzular da, məsələlərin qoyulması da eynilik təşkil edir.
Ekspertlər bildirirlər ki, bəzi repititorlar işbazlarla əlaqədə olduqları üçün onlar abituriyentlərdən yeni nəşrlər tələb edirlər. Onların sözlərinə görə, Dövlət İmtahan Mərkəzi abituriyentlər üçün dərs vəsaitlərini cüzi dəyişiklik etməklə yenidən buraxır və bəzi müəllimlər də hazırlığa gedən uşaqları məcbur edir ki, yeni kitab alsınlar, guya o vəsaitlərin arasında hansısa fərqlər var.
“...qiyməti elə müəyyən edilməlidir ki, əlçatan olsun”
Tanınmış təhsil eksperti Xanım Qasımova “Bakı-Xəbər”ə bildirdi ki, abituriyentin əlavə dərs vəsaitlərindən istifadə etməsi yaxşı haldır və bu onlara müsbət təsir göstərir. Bununla belə, X.Qasımova hesab edir ki, 11-ci siniflər üçün nəzərdə tutulan cəbr və həndəsə, eləcə də Azərbaycan dili və digər əlavə dərs vəsaitlərinin içindəkilər elə də ciddi şəkildə dəyişmədiyi üçün, abituriyentlər köhnə nəşrlərdən də istifadə edə bilərlər. X.Qasımovanın sözlərinə görə, abituriyentlərin öz biliklərini genişləndirməsi üçün əlavə vəsaitlərə ehtiyac var. “Bilirsiniz, abituriyentlərin istifadə etdiyi əlavə dərs vəsaitləri hər il yenidən nəşr edilsə də, əslində, onların içində çox cüzi dəyişikliklər edilir. Bu baxımdan hesab edirəm ki, abituriyentlərin keçən il istifadə etdikləri vəsaitlərdən bu il də istifadə etmək tam mümkündür. Ümumiyyətlə, abituriyent hazırlığı üçün əlavə dərs vəsaitləri birillik deyil, ən azı beşillik tərtib edilməlidir. Çünki, dediyim kimi, sual və tapşırıqlarda elə də ciddi fərqlər olmur. Sadəcə, keçən il nəşr olunan vəsaitə kiçik əlavələr etməklə onları yenidən nəşr edib satışa buraxırlar. Halbuki, buna heç ehtiyac da yoxdur. Hesab edirəm ki, abituriyentin hazırlaşdığı vəsaitlərdən növbəti il onun bacı-qardaşı, qohumları da istifadə edə bilər. Bəzi repititorların abituriyentlərə yeni nəşr edilən vəsaitlər aldırması düzgün deyil. Abituriyentlərdən yeni nəşr olunan hazırlıq vəsaitləri tələb edən bu repititorlar bəzi işbazlarla əlaqədə olan adamlardır və onların bu tələbi də sırf biznes maraqlarına xidmət edir. Fikrimcə, abituriyent hazırlığı məsələsində daha həssas olmaq, onların maddi vəziyyətini, imkanlarını nəzərə almaq lazımdır. Abituriyentlər üçün əlavə tədris vəsaitlərinin qiyməti elə müəyyən edilməlidir ki, əlçatan olsun, hər kəs onlardan istifadə edə bilsin” - deyə X.Qasımova vurğuladı.
İradə SARIYEVA
