Son illər boşanmaların sayı artır. Cari ilin 6 ayı ərzində 10 000-ə yaxın boşanma qeydə alınıb. Boşanmalar təkcə yeni ailə quranlar və yaxud gənclər arasında qeydə alınmır, uzun illərdir evlilik həyatı yaşayan, yaşı 60-dan çox olanlar arasında da kifayət qədərdir.
Açıqlanan statistik rəqəmlərə əsasən, ötən il 60 və daha yuxarı yaşda boşanan kişilərin sayı 373, bu yaşlarda boşanan qadınların sayı isə 173 nəfər olub.Ümumiyyətlə, 2018-ci ildə 60 və daha yuxarı yaş qrupuna aid 677 nəfər boşanıb.
Maraqlıdır, bu yaşda insanları boşanmağa vadar edən səbəb nədir?
“Boşandıqdan sonra qadınlardan çox kişilər ahıl yaşda yenidən ailə həyatı qurmağa meylli olurlar”
Psixoloq Könül Vaqifqızı bizimlə söhbətində qeyd etdi ki, ahıl yaşda olan insanların boşanmasının müxtəlif səbəbləri var: “Ahıl yaşda boşanma qərarı alan şəxslərin evliliklərinin normal davam etməməsi ilə bağlıdır. Onlar bu yaşa qədər ya övladları, ya da valideynlərinə görə boşanmırdılar. Onların qarşısında dayanan səbəb isə mərhələli şəkildə dəyişir: ilk olaraq “el töhməti”, daha sonra dünyaya gələn övladları, nəhayət, yaşlı valideynlərinə görə bir-birinə səbr edirlər. Nəticədə uşaqlar öz həyatlarını qurduqdan, valideynlər vəfat etdikdən sonra boşanmaq üçün heç bir maneə qalmadığını düşünərək bu qərarı reallaşdırırlar”.
Həmsöhbətimiz onu da vurğuladı ki, bəzi ailələrdə əmlak bölgüsünə görə 60 yaşı keçən şəxslər boşanmağı qərara alır.
Psixoloqun sözlərinə görə, boşandıqdan sonra qadınlardan çox kişilər ahıl yaşda yenidən ailə həyatı qurmağa meylli olurlar: “Bəzən bu yaşda insanlar boşanandan sonra, bir çox hallarda, həyatlarını ilk sevdikləri insanlarla birləşdirirlər. Bunu çoxları etiraf edir. Qadınların bir qismi isə, əksinə, “alınsaydı, elə birinci nikahda xoşbəxt olardım”, - deyib təkliyə üstünlük verirlər”.
K.Vaqifqızı bildirdi ki, ahıl yaşda olan şəxslərin boşanması əvvəllər Avropa ölkələrində daha çox müşahidə olunurdu: “Boşanmalarla bağlı çoxlu sayda araşdırma aparmışam. Boşanmaq məqsədilə müraciət edən yaşlı kişilər arasında ağlabatan səbəb irəli sürən olmayıb. Onlar, sadəcə olaraq, həyat yoldaşları ilə yaşamaq istəmədiklərini bildiriblər. 50-60 yaşdan yuxarı qadınların boşanmasına səbəb isə ailədə normal münasibətlərin olmamasıdır. Xəyanət səbəbilə boşanmağa gələn qadınlar da çox olub. Hətta özünü sığortalamaq məqsədilə, ev və mülklə bağlı boşanan yaşlıların da sayı az deyil.
Günel CƏLİLOVA
