Məlum olduğu kimi, oktyabrın 1-dən Azərbaycanda əhalinin növbəti – müstəqillik dövründə sayca üçüncü dəfə siyahıyaalınması başlayıb. Sözügedən proses oktyabrın 10-na qədər davam edəcək.
Siyahıyaalma Prezident İlham Əliyevin 2016-cı il 7 sentyabr tarixli Fərmanına əsasən icra olunur. Ölkənin hər bir inzibati ərazi vahidi üzrə təşkilati plan tərtib edilib, yerli icra hakimiyyətləri ilə razılaşdırılaraq Dövlət Statistika Komitəsi tərəfindən təsdiqlənib. Təşkilati planların tərtib edilməsi nəticəsində əhalini siyahıyaalmanın rayonlaşdırılması başa çatdırılıb. Ölkə ərazisi 720 siyahıyaalma, 6777 təlimatçı və 33 min 907 sayıcı məntəqəsinə bölünüb, bu prosesə cəlb ediləcək işçilərə olan tələbat müəyyənləşdirilib.
Siyahıyaalma vərəqəsində 6 sual, sorğu vərəqəsində isə alt suallar da daxil olmaqla, 46 sual nəzərdə tutulub. Əvvəlki siyahıyaalmadan fərqli olaraq, sorğu vərəqəsinə ilk dəfə olaraq daxil edilmiş əlilliyə dair suallar ölkədə sağlamlıq imkanları məhdud uşaqların və əlilliyi olan şəxslərin mənzil-məişət şəraitinə, təhsilinə və məşğulluğuna, habelə siyahıyaalma çərçivəsində toplanan digər göstəricilərə dair məlumatların əldə edilməsinə imkan yaradacaq.
O da məlumdur ki, siyahıyaalmada iştirak edən ilk şəxs Prezident İlham Əliyev oldu. Belə ki, ölkə başçısı Azərbaycanda həyata keçirilən növbəti siyahıyaalmada iştirak edərək siyahıyaalma və sorğu vərəqələrinin suallarını cavablandırıb. Azərbaycanda əhalini siyahıyaalmanda ilk addımın Prezidentin simasında atılması, prosesdə iştirak edən ilk şəxsin ölkə başçısının olması sözügedən kampaniyada ictimai aktivliyin təmin olunmasına necə təsir edəcək?
“Hesab edirəm ki, bu, nümunəvi bir addımdır”
Məsələyə münasibət bildirən politoloq Elçin Mirzəbəylinin sözlərinə görə, ölkə başçısının bu addımı əhalinin siyahıyaalınma prosesində daha fəal iştirak etməsinə təkan verəcək: “Ölkədə əhalini siyahıyaalma, sadəcə, əhalinin sayını müəyyənləşdirəcək bir kampaniya deyil. Bu prosesdə çoxlu sayda sual var ki, dövlətin gələcək inkişaf perspektivləri bu suallara cavabdan asılıdır. Bu həm də ölkə miqyasında keçirilən önəmli bir sorğu prosesidir ki, ölkənin sosial, milli siyasətinin müəyyənləşdirilməsində və digər istiqamətlərdə müstəsna əhəmiyyət kəsb edir. Cənab Prezident həm Azərbaycandakı son 10 ildə baş verən inkişafı dəyərləndirdi, həm də ölkədəki demoqrafik vəziyyətə diqqət çəkdi. Demoqrafik vəziyyətin müsbət olması, əslində, ölkənin sosial-iqtisadi inkişafının bariz nümunəsidir. Digər tərəfdən də düşünürəm ki, əslində, cənab Prezidentin bu kampaniyada iştirakı həm də ölkə vətəndaşlarının prosesdə fəal iştirakı üçün bir çağırışdır. Hesab edirəm ki, bu, nümunəvi bir addımdır”.
Vidadi ORDAHALLI
