Paytaxtımız günü-gündən böyüyür, dəyişir. Heç şübhəsiz ki, bu dəyişikliklər yeni ünvanların, yaşayış yerlərinin yaranmasına səbəb olur. Bu da sirr deyil ki, son zamanlar Bakıda bir sıra ünvanlarda dəyişikliklər edilib. Əlbəttə, bunlar yaxşı hal olsa da, müəyyən problemləri də ortaya çıxarır.
Bu gün Bakının ciddi problemlərindən biri naviqator xəritəsi ilə bağlıdır. Hazırda həm taksi sürücülərinin, həm də digər vətəndaşların geniş istifadə etdiyi naviqator xəritələrində ciddi nöqsanlar mövcuddur. İstifadəyə verilən naviqator xəritələrində, demək olar ki, əksər ünvanlar dəqiq göstərilmir. Halbuki, şəhərin nəinki binaları, eləcə də kiçik evləri belə bu naviqator xəritəsində əks olunmalıdır. Lakin biz bunu görə bilmirik. Bir çox hallarda taksidən istifadə edərkən taksi sürücüləri giley-güzar edirlər ki, naviqatorda ünvanlar səhv göstərildiyi üçün yolu yanılırlar. Taksi sürücüləri bildirirlər ki, bu gün paytaxtda dəyişdirilən ünvanlar naviqator sistemində əks olunmur. Bu da nəinki onların, bütövlükdə, avtomobil idarə edənlərin hər birinə ciddi problemlər yaradır. Taksi sürücüləri qeyd edirlər ki, Bakının naviqator sisteminə nəzarət edən qurumlar bu sahəyə başdansovdu yanaşdıqları üçün mövcud vəziyyət yaranıb.
“...bizim şəhərsalmada mövcud olan nöqsanlar naviqator xəritə sisteminə də ciddi təsir göstərir”
Məsələni şəhr edən sosial sahə üzrə ekspert İlqar Hüseynli “Bakı-Xəbər”ə bildirdi ki, bu problemin aradan qaldırılması üçün əlaqədar qurumlar kompleks tədbirlər həyata keçirməlidirlər: “Bu problemin mövcud olmasının səbəbi bir amillə bağlı deyil, bu, bir neçə məsələ ilə əlaqədardır. Bakıda Nəqliyyatın İntellektual İdarəetmə sisteminin bazasında yerləşdirilən informasiyalar həmin o xəritə əsasında hazırlanır. Burada keyfiyyətlə bağlı ciddi problemlər olduğu üçün, biz onunla qarşılaşırıq. Digər tərəfdən, bilirsiniz ki, paytaxtımızda çox sürətli tikinti bumu yaşanır. İstər yaşayış binalarının, istərsə də fərdi evlərin tikilməsi ilə əlaqədar olaraq yollarda ciddi problemlər var. Bu gün bir prospektdən keçirsən, səhərisi gün oradan keçəndə görürsən ki, yeni binalar, ictimai iaşə obyektləri, ticarət evləri inşa edilib və onların heç biri zamanında həmin elektron xəritə sistemində yerləşdirilmir. Yəni problemin bir tərəfi buradan qaynaqlanır. Dəyişikliklər elektron xəritə sistemində yerləşdirilmədiyi üçün sürücülər yeni ünvanlarla bağlı məlumata malik olmurlar və bu ünvanları naviqator sistemində görə bilmirlər. Hesab edirəm ki, bu, Bakının baş planı ilə əlaqədar işlər görən, şəhərin xəritəçəkmə və layihələndirmə işləri ilə məşğul olan institutların səhlənkar münasibətilə bağlı olan məsələdir”.
İ.Hüseynlinin qeyd etdiyinə görə, Bakıda “Xutor”, Alatava və digər elə yaşayış massivləri var ki, ünvanı olmayan, yaxud ünvanı dəqiq göstərilməyən yeni-yeni tikintilər, gecəqondularla da bağlı ciddi problemlər yaşanır. “Bu mənda bizim şəhərsalmada mövcud olan nöqsanlar naviqator xəritə sisteminə də ciddi təsir göstərir. Bu problemin həlli təkcə İntellektual İdarəetmə Mərkəzi ilə bağlı deyil. Burada digər qurumlarla da əlaqəli məsələlər var. Düşünürəm ki, bu problemin həllinə nail olunması üçün Bakı Şəhər Nəqliyyat Agentliyi də işlər görməli, problemin üstünə getməlidir. Bununla bağlı kompleks tədbirlər görülməlidir. Bu istiqamətdə fəaliyyət göstərən qurumlar bir-birilə qarşılıqlı əməkdaşlıq etməlidirlər ki, problem kökündən öz həllini tapsın. Yeni binalar, yeni ticarət mərkəzləri tikilərkən şəhərsalma və infrastrukturla bağlı xəritəçəkmə institutu məlumatlar verməlidir, eyni zamanda, Bakı Nəqliyyat Agentliyinin bu məsələdən xəbəri olmaldır” - deyə İ.Hüseynli vurğuladı.
İradə SARIYEVA
