Gündəmdə tez-tez müzakirə olunan, həllini tapmayan vacib problemlərdən biri də kitabların qiymətləridir. Xüsusən də ali məktəb dərsliklərinin satış qiymətinin yüksək olması tələbələrin haqlı narazılığına səbəb olur. Tələbələr kitabların baha olduğunu bildirirlər. Onlar qeyd edirlər ki, dərsliklərin yüksək qiymətə satılması bir sıra çətinliklər yaradır. Məlumdur ki, tələbələrin bir qismi kirayə mənzildə yaşayır. Aylıq kirayə pulu, gündəlik tələbatını ödəyən tələbə üçün yüksək qiymətə dərs vəsaitini almaq büdcəsinə təsir göstərir.
Ekspertlərin fikrincə, tələbələr üçün nəzərdə tutulan dərsliklərin qiymətində müəyyən güzəştlər olmalıdır. Necə ki, orta məktəblərdə dərsliklər şagirdlərə pulsuz verilir, eyni qayda universitetlərdə tətbiq oluna bilər. Bununla yanaşı, ali məktəb dərsliklərinin PDF variantı internetə yüklənə bilər. Dərs vəsaiti internetə yüklənərsə, şagird əlavə vəsait sərf etməz.
Mütəxəssislərin fikrincə, ali məktəb dərsliklərinin qiymətinin baha olmasının səbəbi müəllifin həmin vəsaiti öz vəsaiti hesabına hazırlatmasıdır. Qeyd edək ki, nəşr olunan kitabların tirajı da olduqca az olur və 500-1000 arası dəyişir. Həmin kitabların bir çoxu universitet kitabxanalarında olmadığından və satışda çətin tapıldığından, tələbələr məcbur olurlar ki, həmin kitabın surətini çıxarsınlar. Bu problem hər il semestr imtahanları ərəfəsində daha qabarıq nəzərə çarpır.
“Dərsliklərin elektron variantı yaradılarsa, bu, dərsliklərin qiyməti məsələsinə çox ciddi təsir edər”
Təhsil Nazirliyi yanında İctimai Şuranın üzvü, fizika-riyaziyyat üzrə fəlsəfə doktoru İlqar Orucov “Bakı-Xəbər”ə bildirdi ki, ali məktəb dərsliklərinin qiymətinin baha olması aktual problemlərdən biridir: “Təhsil Nazirliyi yanında İctimai Şura olaraq ali məktəb dərsliklərinin satış qiymətinin yüksək olmasını diqqətdə saxlayacaq və bu məsələni təhsil nazirinin diqqətinə çatdıracağıq. Məlumdur ki, ali təhsil müəssisələri müəyyən sərbəstliyə malikdir. Bütün hallarda, Təhsil Nazirliyi mərkəzi icra orqanı olaraq dövlət təhsil siyasətini həyata keçirən qurumdur. Bu istiqamətdə Təhsil Nazirliyinin ali təhsil müəssisələri qarşısında tövsiyələri faydalı olar”.
Həmsöhbətimiz bildirdi ki, ali təhsil müəssisələri üçün nəzərdə tutulan dərsliklərin qiyməti bahadır: “Nəzərə almaq lazımdır ki, tələbələr dövlətin ən həssas təbəqələrindən biridir. Ölkə başçısı İlham Əliyev tələbələrə xüsusi diqqət və qayğı ilə yanaşır. Prezidentin qayğısı nəticəsində tələbə təqaüdləri, eyni zamanda, dövlət sifarişli yerlərin sayı artıb. Hesab edirəm ki, dərsliklərin qiyməti məsələsi də aidiyyəti qurumların diqqətində olacaq”.
İ.Orucov hesab edir ki, ali təhsil müəssisələri dərslikləri tələbələrə verərkən vəsaitin satış qiyməti ilə bağlı müəyyən güzəştlər etməlidirlər: “Təhsil Nazirliyi ilə yanaşı, universitetlər, dərslik müəllifləri də bu məsələdə həssas olmalıdırlar. Ali təhsil dərslikləri ilə bağlı müəlliflərlə yanaşı, mətbəələr də müəyyən güzəştlər tətbiq etməlidirlər”.
Ekspert onu da vurğuladı ki, tələbələrin rahatlığı üçün dərsliklərin elektron variantı hazırlanmalıdır. Dərsliklərin elektron variantı yaradılarsa, bu, dərsliklərin qiyməti məsələsinə çox ciddi təsir edər: “Dəsrliklərin elektron variantının hazırlanması tələbələri vəsait daşımaqdan xilas edəcək. Məlumdur ki, tələbələrin əksəriyyəti ictimai nəqliyyatdan istifadə edir. Dərsliklərin elektron variantı olarsa, tələbələr əlavə vəsait daşımaqdan xilas olarlar”.
İ.Orucov hesab edir ki, ali təhsil ocaqlarının maddi durumu yaxşı səviyyədə olduğu üçün onlar tələbələrə dərs vəsaitini müəyyən güzəştlərlə verə bilərlər.
Günel CƏLİLOVA
