Korporativ sosial məsuliyyət şirkət və quruluşların cəmiyyətə qarşı olan məsuliyyətlərinin məcmuəsidir. Korporativ sosial məsuliyyət, ilk olaraq, şirkət və ya qurumun yaşadığı cəmiyyətdə vergiləri ödəməsi, ətraf mühitə hörmətlə yanaşması və öz işçilərinin iş şəraitini düzgün qurmasından başlayır.
Daha sonra bu fəaliyyət cəmiyyətin yararına olan hər hansı bir problem və ya paradiqmanı inkişaf etdirmək, ona dəstək olmaqla davam edir. Şirkət və ya qurum korporativ sosial məsuliyyəti ilə fəaliyyət zamanı cəmiyyətin hər hansı bir problemli sahəsinə köməklik göstərir və bu köməklik qalıcı olur.
Bu gün Azərbaycanda çoxsaylı özəl klinika fəaliyyət göstərir. Sözügedən klinikaların əksəriyyətinin həm maliyyə imkanları, həm də peşəkar həkimlərlə yanaşı, texniki imkanları üstün səviyyədədir. Ancaq bütün bu parametrlərə rəğmən, ölkədəki özəl klinikalar korporativ sosial məsuliyyət prizmasından əhaliyə xidmət etmirlər. İş ondadır ki, indiyə qədər heç bir özəl klinikanın öz daxili vəsaitləri hesabına hansısa tanınmış sənət adamını, sıradan bir imkansız ölkə vətəndaşını müalicə etməsinin şahidi olmuruq. Xeyriyyəçilik edib hansısa xəstənin müalicə xərclərini öz üzərlərinə götürmürlər. Prezident İlham Əliyev və ölkənin birinci xanımı Mehriban Əliyevanın humanistliyi sayəsində bir çox insan müalicə edilərək yaşamaq imkanı əldə edib. Özəl klinikaların fəaliyyəti üçün dövlətin yaratdığı geniş imkanlara baxmayaraq, sözügedən klinikalar əhalinin həssas təbəqələrinə yönəlik sosial dəstək layihələrinə qoşulmurlar. Ölkədəki tikinti şirkətləri qaçqın və məcburi köçkünlər üçün inşa edilən mənzil tikintisində iştirak edirlər. Ancaq, qeyd olunduğu kimi, özəl klinikalar, ümumilikdə, bütün xeyriyyə işlərindən uzaqdırlar.
“Nəinki özəl klinikalar, böyük şirkətlər var ki, kifayət qədər vəsait qazanırlar, amma bu kimi sosial xeyriyyə aksiyalarında iştirak etmirlər”
Sözügedən məsələni dəyərləndirən ekspert İlqar Hüseynlinin sözlərinə görə, Azərbaycanda özəl klinikalar müəyyən müayinələri bəzən pulsuz həyata keçirirlər: “Bununla bağlı hansısa aksiya keçirirlər. Ancaq yaxşı olardı ki, bu işdə onlar daha fəal iştirak etsinlər. Bir sıra hallarda bahalı ağır əməliyyatların pulsuz edilməsi mümkün olmur. Məsələn, bizdə özəl klinikaların qaraciyər transplantasiyası imkanları yoxdur. Digər tərəfdən, nəinki özəl klinikalar, böyük şirkətlər var ki, kifayət qədər vəsait qazanırlar, amma bu kimi sosial xeyriyyə aksiyalarında iştirak etmirlər. Özəl klinikalar, ən azından, güzəştli şərtlərlə əməliyyatların edilməsinə şərait yaratmalıdırlar. Böyrək, öd kisəsi üzərində olan əməliyyatları öz imkanları hesabına edə bilərlər. Bütün özəl şirkətlərin, o cümlədən, özəl klinikaların üzərində korporativ sosial məsuliyyətlə bağlı qanun var. Ona görə də özəl klinikalar xeyriyyə xarakterli aksiyalara qoşulmalıdırlar. Aztəminatlı ailələrin müalicəsini öz üzərlərinə götürə bilərlər. Ümumilikdə, sosial korporativ məsuliyyət böyük pul qazanan bütün şirkətlərin üzərində var. Ancaq bəla ondadır ki, bu kimi məsələlərdə hamı dövlətdən mədət umur. Hesab edirəm ki, bu doğru deyil”.
Vidadi ORDAHALLI
