Polisin fəaliyyətinin səmərəlilik əmsalı cəmiyyətin təhlükəsizlik səviyyəsi ilə ölçülür. Polis bu gün ölkədə daxili sabitliyin və asayişin qorunması işini uğurla davam etdirir. Polis təkcə cinayətlərin açılmasında deyil, həm də risq qrupuna daxil olan – münaqişəli ailələrin, çətin tərbiyə olunan uşaqların, narkomaniya və yol hərəkəti təhlükəsizliyinə qarşı mübarizədə profilaktika, maarifləndirmə işinin genişlənməsi ilə bağlı fəal iş aparır.
Bu istiqamətdə uğurların əldə edilməsi polis-vətəndaş həmrəyliyindən çox asılıdır. Görünən odur ki, bu istiqamətdə vətəndaşların polisə etibarı get-gedə artır.
Diqqətçəkən məqamlardan biri də ondan ibarətdir ki, son aylar polis-vətəndaş münasibətlərində sosial məmnunluğu artıran yeni layihələrin həyata keçirilməsinin şahidi oluruq. Bu, müxtəlif formalarda özünü göstərir. Bütün bunlar vətəndaşların böyük rəğbətinə səbəb olur. Məsələn, ötən ilin mart ayından Daxili işlər nazirinin əmrilə piyadalar tərəfindən yol hərəkəti qaydalarının pozulmasının qarşısının alınması məqsədilə Bakı şəhərinin rayon polis idarələrinin, eləcə də respublikanın digər şəhər və rayon polis orqanlarının post-patrul xidməti əməkdaşlarına yol-patrul xidməti inspektorlarına aid olan səlahiyyətlər verilib. O vaxt belə bir qərarın verilməsinə ehtiyac var idi. Lakin post-patrul xidməti əməkdaşlarının qayda pozanları saxlayaraq protokollar tərtib etməklə onları cərimələmələri piyadaların vaxt itkilərinə, bəzən də narazılıqlarına səbəb olurdu. Bütün bunları nəzərə alan Daxili işlər naziri, general-polkovnik Vilayət Eyvazov bu günlərdə müvafiq əmr imzalayıb. Əmrə əsasən, post-patrul nizami hissələri əməkdaşlarına verilmiş yol patrul xidməti inspektorlarına aid olan səlahiyyətlərə xitam verilərək, qanunla müəyyən olunmuş vəzifələrinin icrasını davam etdirmək üçün onlar daimi xidmət yerlərinə qaytarılıblar. Bundan başqa, Daxili işlər naziri şəxsiyyət vəsiqələrinin verilməsi sahəsində vətəndaş məmnunluğunun artırılması ilə bağlı əlavə tədbirlər barədə əmr imzalayıb. Əmrə əsasən, noyabr ayının 1-dən ərazi polis orqanlarının və "ASAN xidmət” mərkəzlərində fəaliyyət göstərən Daxili İşlər Nazirliyinin qeydiyyat məsələləri qurumlarının əməkdaşları tərəfindən Azərbaycan Respublikası vətəndaşının şəxsiyyət vəsiqəsi yaşayış yeri üzrə qeydiyyatdan asılı olmayaraq veriləcək.
Məlum qərar ölkə ictimaiyyətinin böyük rəğbətinə səbəb olub. Məsələ ondadır ki, bu gün paytaxtda ölkənin müxtəlif rayonlarından gəlmiş vətəndaşlar əmək fəaliyyəti ilə məşğuldurlar. Məlum qərardan sonra şəxsiyyət vəsiqəsini dəyişməklə bağlı zərurət ortaya çıxanda buna görə vətəndaşın qeydiyyatda olduğu rayona getməsinə ehtiyac qalmayacaq. Çox rahat şəkildə paytaxtın istənilən "ASAN xidmət” mərkəzində bununla bağlı problemlər həll ediləcək.
Digər tərəfdən, vətəndaşları narahat edən şikayətlərin baxılmasına diqqət daha da artıb. Polis orqanları sözügedən məsələlərlə bağlı mümkün olan qədər maksimum şəkildə vətəndaşlara yardım edirlər. Daxili işlər nazirinin regionlara ənənəvi səfərləri və bölgələrdə vətəndaşların qəbulu davam edir. Görüşlər zamanı vətəndaşların problemləri yerindəcə həll edilir. Ümumilikdə, görülən işlər operativ şəkildə mediada işıqlandırılır. Medianı maraqlandıran məsələlər, sorğular çevik formada cavablandırılır. Təbii ki, bütün bunlar cəmiyyətdə polis-vətəndaş münasibətlərində sosial məmnunluğu daha da artıran faktorlardır. İndiki dövrdə bu çox mühüm əhəmiyyət kəsb edir.
“Son aylar verilən bir sıra qərarlar, birmənalı olaraq, əhalinin mənafeyinə xidmət edir”
Sözügedən məsələ ilə bağlı fikirlərini “Bakı-Xəbər”lə bölüşən şərqşünas Seyid Camal Əzimbəylinin sözlərinə görə, DİN tərəfindən həyata keçirilən yeni layihələr cəmiyyətdə sosial məmnunluğun daha da artmasına xidmət edir: “Həqiqətən də son aylar bu istiqamətdə sistemli işlərin görülməsi müşahidə edilir. Bu yöndə işlər cənab Ramil Usubovun nazir olduğu dövrlərdə də gedirdi, ondan sonrakı dövrdə də gedir. Cəmiyyətlə polis arasında münasibətlərin qurulmasında işlər daha da sürətləndirilib. Vilayət Eyvazov nazir olandan sonra bu yöndə gedən proseslər bir qədər də sürətlənərək miqyası genişlənir. Vilayət müəllim nazir olandan sonra apardığı islahatlar həqiqətən də cəmiyyət tərəfindən məmnunluqla qarşılanır. Bunu görməmək mümkün deyil. Bunu bir vətəndaş olaraq da cəmiyyətdə tez-tez müşahidə edirəm. Son aylar verilən bir sıra qərarlar, birmənalı olaraq, əhalinin mənafeyinə xidmət edir. Bütün bunlar, əlbəttə ki, polisə etimadın, rəğbətin yüksələn xətlə inkişafına xidmət edir. Polis-vətəndaş münasibətlərində sosial məmnunluğa stimul verir. Düşünürəm ki, cəmiyyətlə polis arasında mehriban münasibətlərin inkişafı Azərbaycan dövlətçiliyinin bütövlüyünə əlavə bir gücdür”.
Vidadi ORDAHALLI
