Şou-biznesdə təmsil olunan bəzi müğənnilərin Azərbaycan dövlətinin qanunlarına əməl etməməsi tendensiyası yayılıb. Xüsusən də yol polisləri ilə bağlı məsələlərdə şou-biznesçilər bir sıra qanunsuzluqlara yol verirlər. Onlar bir çox hallarda yol hərəkəti qaydalarını ciddi şəkildə pozur, qadağa nişanlarına, polisin çağırışlarına əhəmiyyət vermək istəmirlər.
Bəzi şou-biznesçilərdə belə fikir formalaşıb ki, onlar populyar olduqları üçün bütün qayda-qanunları poza bilərlər, yol hərəkəti qaydalarını pozanda belə, polisin onları saxlamaq ixtiyarı yoxdur (?). Belə iddiada olan kifayət qədər müğənni var. Onlar öz populyarlıqlarından sui-istifadə edərək yol polisinə qarşı müxtəlif qaralama kampaniyaları həyata keçirirlər. Halbuki, onlar da Azərbaycan vətəndaşları olaraq bütün qanunlara riayət etməli və yol hərəkəti qaydalarını pozmamalı, pozduqları halda isə cərimələrini ödəməlidirlər. Bütün vətəndaşlar qanun qarşısında cavabdehdirlər. Amma təəssüf ki, bəzi şou-biznesçilər bunu unudurlar. Amma onların bu qeyri-etik davranışları sonradan özlərinə baha başa gəlir.
Bəzi şou müğənniləri sərxoş vəziyyətdə avtomobil də idarə edir və bu halda yol hərəkəti qaydalarını dəfələrlə pozurlar. Yol polisi onlara irad bildirdikdə, hərəkətləri ilə bağlı cərimə tətbiq etdikdə isə onların böyük əksəriyyəti yol polislərini söyür, təhqir edir və onları hədələyirlər.
Bu günlərdə Xəyal Qasımzadə adlı müğənni polisləri təhqir edib. Yayılan məlumatlara görə, Nizami rayonu, Nəsimi küçəsində “STOP” nişanının tələblərini pozan X.Qasımzadə yol polisləri tərəfindən saxlanıb. Avtosfer.az xəbər verir ki, 99 YP 378 dövlət nömrə nişanlı YPX avtomobili ilə xidmət aparan əməkdaşlar - Samir Elmanov və Nüsrət Səfərov sürücüyə qayda pozuntusunu izah edərək sənədlərini tələb ediblər.
Lakin 99 PB 494 dövlət nömrə nişanlı, “Chevrolet Malibu” markalı avtomobili idarə edən X.Qasımzadə heç bir sənəd təqdim etməyib. O, yol polisləri ilə əvvəlcə mübahisə edib. Özünü “Şeron” qrupunun keçmiş üzvü kimi təqdim edən sürücü tanınmış şəxs olduğunu bildirərək yol polislərinə ona heç nə edə bilməyəcəklərini deyib. Ardınca YPX əməkdaşlarını təhqir edən X.Qasımzadə səs-küy salaraq təhqiramiz ifadələr işlədib. Bununla kifayətlənməyən sürücü yol polisinə hücum edərək əl-qol hərəkətləri edib.
Lakin YPX əməkdaşları əraziyə post-patrul xidmətinin əməkdaşlarını dəvət edərək, sürücünü 25-ci Polis Bölməsinə təhvil veriblər.
Sürücü barəsində toplanmış materiallar aidiyyəti üzrə Nizami Rayon Məhkəməsinə təqdim olunub. Polisə tabesizlik göstərən, ictimai asayişi pozan sürücü Xəyal Qasımzadə barəsində məhkəmənin qərarı ilə 10 gün müddətində inzibati qaydada həbs tədbiri seçilib.
Ümumiyyətlə, şou-biznes nümayəndələrinin yol polisini təhqir etməsi, onun xəbərdarlıqlarına əhəmiyyət verməməsi nədən qaynaqlanır? Şou-biznesçilər bu addımı atmaqla nəyə arxayındılar?
“Ancaq çox təəssüflər olsun ki, müəyyən məhkəmə orqanlarının şou-biznesçilərlə bağlı məsələlərə birmənalı yanaşmaması onların bu cür qanunsuzluqlara yol verməsinə səbəb olur”
Tanınmış hüquqşünas, vəkil Əziz Qəmbərov “Bakı-Xəbər”ə bildirdi ki, bəzi şou-biznesçilərin öz populyarlıqlarından sui-istifadə etməsi halları geniş yayılıb və qanunazidd əməldir. “Şou-biznesçilərin yol polisinə qarşı qanunazidd əməlləri səbəbsiz deyil, bu onların indiyə qədər özlərini cəmiyyətdə “toxunulmaz şəxs” saymaqlarının göstəricisidir. Guya onlar toxunulmazdır və nə istəsələr onu edə bilərlər. Bu xalqın pulu ilə pullanıblar və pullandıqları üçün də qanunları saymaq istəmirlər. Əslində, bu, kökündən yanlış düşüncədir. Dövlət məmurlarından tutmuş, sadə vətəndaşlara qədər, hər kəs qanun qarşısında bərabər hüquqa, məsuliyyətə malikdir. Qanunlar heç kəsi bir-birindən fərqləndirmir. İstər yol hərəkəti haqqında, istərsə də digər qanunlar olsun, heç bir fərq qoyulmadan bütün vətəndaşlar o qanunların tələblərinə əməl etməlidirlər. Azərbaycan Konstitusiyası var və bütün qanunlar da ondan qaynaqlanır. Dövlətin qanununu pozmuş hər bir vətəndaş qanun çərçivəsində sərt şəkildə cəzalandırılmalıdır. Ancaq çox təəssüflər olsun ki, bəzi hallarda müəyyən məhkəmə orqanlarının şou-biznesçilərlə bağlı məsələlərə birmənalı yanaşmaması onların bu cür qanunsuzluqlara yol verməsinə səbəb olur. Bir də görürsən ki, şou-biznesçi, hansısa bir populyar müğənni bu kimi qanunazidd əməllərə yol verir, ancaq bəzi məhkəmələrdə onların bu əməllərinə haqq qazandırılır. Bilirsiniz ki, məhkəmə orqanlarında şəffaflığın təmin olunması, məhkəmə sistemində islahatların daha da dərinləşməsi ilə bağlı cənab Prezidentin verdiyi sərəncamın böyük əhəmiyyəti var. Cənab Prezidentin belə bir sərəncam imzalaması bu sahədə baş verən problemlərin aradan qaldırılması ilə bağlıdır. Bəzi məhkəmələr şou-biznesçilərlə, müğənnilərlə müxtəlif əlaqələrə girərək onlar üçün cəzasızlıq yaradır və şou-biznesçilər də bundan istifadə edərək qanunların tələbini pozmaqda davam edirlər. Onlar deyirlər ki, mən populyaram, pulum var və yol hərəkəti qaydalarını poza, polisi təhqir edə bilərəm. Onların yol verdikləri bu hərəkətlər böyük hüquq pozuntusudur. Mən həm bir vətəndaş, həm də bir vəkil kimi şou-biznesçilərin yol polisinə qarşı neqativ hərəkətlərini qınayıram. Bütün vətəndaşlar, kimliyindən asılı olmayaraq, polisin xəbərdarlığına əhəmiyyət verməli, saxlanarkən sənədlərini təqdim etməlidirlər” -deyən Ə.Qəmbərov hesab edir ki, şou-biznesçilər qayda-qanunları pozmamalı və qanunu pozanlar cinayət məsuliyyətindən kənarda qalmamalıdırlar.
İradə SARIYEVA
