Azərbaycanda uzun müddətdir distant ali təhsilin tətbiq edilməsi gündəmdə olsa da, hələ heç bir universitet bu istiqamətdə addım atmamışdı. Halbuki, təhsil qanunvericiliyinə görə, həm ali, həm də orta təhsil sistemində distan təhsilin tətbiq edilməsi nəzərdə tutulur. Xeyli vaxtdır UNEC-n distant təhsillə bağlı layihə həyata keçirəcəyi gözlənilirdi. Nəhayət, UNEC bu sahədə addım atdı və distant təhsilin ilk nümunəsini təqdim etdi.
Bildiyimiz kimi, sentyabrın 28-də Azərbaycan Dövlət İqtisad Universitetində (UNEC) Heydər Əliyev Fondu tərəfindən təşkil olunmuş distant Çin dili kursları üzrə dərslərə başlanıb. Onu da vurğulayaq ki, Heydər Əliyev Fondunun vitse-prezidenti Leyla Əliyeva bununla əlaqədar universitetdə keçirilən təqdimat tədbirində iştirak edib.
Çin dilini öyrənməyə yeni başlayan azərbaycanlılar üçün nəzərdə tutulan dərslər 1,5 saat olmaqla həftədə 3 dəfə keçiriləcək. Distant təhsil üzrə təlimlər ödənişlidir. Sosial cəhətdən dəstəyə ehtiyacı olan şəxslərin təhsil haqları isə Heydər Əliyev Fondu tərəfindən qarşılanır. Dinləmək, danışmaq, oxumaq və yazmaq dərslərindən ibarət olan elementar səviyyəni bitirən iştirakçılar Çin dilinin ümumi qrammatik quruluşuna bələd olacaq, sadə fikir mübadiləsi aparmaq bacarığında olacaqlar. Üç ay davam edəcək proqram üzrə təlimlər işdən ayrılmadan distant formada keçiriləcək. Layihənin tərəfdaşları Azərbaycan Dövlət İqtisad Universiteti, Azərbaycan Dillər Universitetinin nəzdindəki Konfutsi İnstitutu və Pekin Xarici Dillər Universitetidir. Proqramı müvəffəqiyyətlə bitirən iştirakçılara sertifikatlar veriləcək. Çin dilini öyrənən tələbələr Çində təqaüd proqramları ilə təhsil almaq şansı da əldə edirlər.
“UNEC-in bu addımı yeni çağırışlara cavab vermək baxımından da çox əhəmiyyətlidir”
Distant təhsilin ilk nümunəsini dəyərləndirən Gənc Alim, Aspirant və Magistrlər Cəmiyyətinin sədri, Təhsil Nazirliyi yanında İctimai Şuranın üzvü, fizika-riyaziyyat üzrə fəlsəfə doktoru İlqar Orucov “Bakı-Xəbər”ə bildirdi ki, belə bir mühüm addımın atılması olduqca əhəmiyyətlidir: “Bir neçə gün əvvəl sizinlə Azərbaycan ali təhsil sistemində distant təhsilin tətbiq edilməməsi səbəblərini müzakirə etdik. Onda da vurğulamışdım ki, artıq UNEC-də distant ali təhsillə bağlı layihə hazırlanıb. Çox sevindirici haldır ki, Azərbaycanda elm və təhsillə bağlı layihələri dəstəkləyən Heydər Əliyev Fondu kimi qurum mövcuddur. Heydər Əliyev Fondunun dəstəyilə UNEC-də distant təhsilə start verilməsinin ölkəmiz üçün çox böyük əhəmiyyəti var. Artıq distant təhsillə bağlı mərkəzin açılışı həyata keçirilib. Əslində, bu ali məktəbin təcrübəsi olduqca faydalıdır. Müasir çağırışlar fonunda, əlbəttə ki, bizim milli universitetlərimizin distant təhsil modelinə keçməsi və bu təhsil modelinin tətbiqi çox əhəmiyyətlidir. Ancaq məsələ bundan ibarətdir ki, distant təhsilin həyata keçirilməsi üçün komanda, buna imkan və şərait varmı? Təəssüf ki, bizim ali məktəblərin heç də hamısında bu imkan, bu şərait yoxdur. Ancaq UNEC-də xaricdə təhsil almış Azərbaycan gənclərindən ibarət bir komanda formalaşdırılıb və onların sayəsində bu ali məktəbin həyatında bir sıra yeniliklər nəzərə çarpmaqdadır. Hesab edirəm ki, UNEC-də fəaliyyətə başlayan distant təhsil modeli olduqca faydalıdır. Burada Çin bazarı üçün mütəxəssislər hazırlığına başlanması bizim üçün yeni imkanların açılması deməkdir. Çünki dünyanın əhali baxımından ən böyük ölkəsi olan, eyni zamanda da texnologiya nöqteyi-nəzərdən müasir qabaqcıl texnologiyaları mənimsəmiş, iqtisadiyyatının böyük hissəsi yeni texnologiyalara, innovasiyalara köklənmiş Çinlə əlaqələr vacibdir. Çindilli kadrların hazırlanması olduqca əhəmiyyətli və zəruridir. Həmçinin, bu o demək deyil ki, biz yalnız Çin bazarı üçün mütəxəssis hazırlayırıq. Çin dünyanın 5-də birini əhatə edir və əslində, Çin dili dünyanın heç bir populyar dilindən heç də geri qalmır. Çin dilinin öyrədilməsi Azərbaycan üçün çox vacibdir. Hətta mütəxəssislər tərəfindən belə fikirlər səsləndirilir ki, Çin dili gələcək dünyanın aparıcı dillərindən biri olacaq. UNEC-in distant ali təhsil sahəsindəki təcrübəsi gənclərimizə yeni imkanlar açır və bu, əmək bazarı üçün yeni kadrların hazırlanmasına böyük şərait yaradır”.
İ.Orucovun sözlərinə görə, UNEC-in bu təcrübəsindən başqa ali məktəblər də nümunə götürməlidirlər. O hesab edir ki, UNEC distant təhsilin miqyasını, əhatə dairəsini daha da genişləndirə bilər, çünki bu ali məktəbin buna potensial imkanları çatır. “UNEC distant təhsillə bağlı digər ixtisaslar üzrə də kadr hazırlığına başlaya bilər. Distant təhsil UNEC-in, eləcə də bu modelin tətbiq ediləcəyi digər ali məktəblərin nüfuzunu qaldıracaq. Bu yolla ali məktəblərimizə xarici tələbə axını güclənəcək. Xarici tələbələr nə qədər çox olsa, bizim ali məktəblərimiz dünyanın nüfuzlu ali məktəbləri ilə rəqabət mühitinə girəcəklər. UNEC-in bu addımı yeni çağırışlara cavab vermək, yeni çağırışlarla ayaqlaşmaq baxımından da çox əhəmiyyətlidir” - deyə İ.Orucov vurğuladı.
İradə SARIYEVA
