Sosial şəbəkələr artıq həyatımızın ayrılmaz hissəsinə çevrilib. Burada ölkə başçılarından tutmuş, siyasətçilərə, sənət adamlarına, adi insanlara rast gəlmək mümkündür. Şəbəkə sahibləri isə dünya üzrə tələbatı nəzərə alıb daim yeni funksiyalar yaradır, insanlara fərqli məşğuliyyətlər təqdim etməyə çalışırlar. Artıq sosial şəbəkələrdə “canlı yayım” funksiyası da istifadəçilərin ixtiyarına verilib.
Sosial şəbəkə istifadəçilərinin bir qismi yaşadıqları anları guya digər istifadəçilərlə bölüşmək istəyirlər. Halbuki, bu, o insanların özlərini göstərməsindən başqa bir şey deyil. Çünki bu, adamın özünə aiddir və baş verənlərin də yalnız onun üçün dəyəri var.
Bu gün “Facebook” və “İnstagram”da canlı yayım açmaq artıq bəzi istifadəçilər tərəfindən adət halını alıb. Müğənnilər restoranda mahnı oxuyarkən, evdar xanımların bir qismi mətbəxdə yemək hazırlayarkən, bəzi sürücülər isə yolda gedərkən canlı yayım açırlar. Sükan arxasında əyləşən sürücülər canlı yayım açaraq həm öz həyatlarını risqə atırlar, həm də ətrafdan keçən digər nəqliyyat vasitələrinin. Sürücülər yol gedərkən canlı yayım açırsa, yayıma qoşulan digər istifadəçilər onlara sual və ya rəy yazmaqla sükan arxasında əyləşən şəxsin fikrini yayındırırlar. Beləliklə, yol-qəza hadisələrinin sayı artır.
Məlumat üçün bildirək ki, bu günlərdə paytaxtın H.Əliyev prospektində “LADA Priora” markalı avtomobili idarə edən sürücü telefonla canlı yayıma çıxaraq qəza törədib. Hərəkət zamanı yolu çəkən sürücü bir anlıq diqqətsizlik edərək maşınını qarşıdakı digər avtomobilə vurub.
Qeyd edək ki, sosial şəbəkədə canlı yayıma çıxaraq qəza törədən sürücülər az deyil.
“Sükan arxasında sürücünün mobil telefonla danışması, ümumiyyətlə, sürücünün diqqətinin yayınmasına səbəb olan davranışlara yol verməsi qanun pozuntusudur”
Bakı Şəhər Dövlət Yol Polisi İdarəsinin bölmə rəisi, polis polkovniki Vaqif Əsədov bildirdi k, sükan arxasında sürücünün mobil telefonla danışması, ümumiyyətlə, sürücünün diqqətinin yayınmasına səbəb olan davranışlara yol verməsi qanun pozuntusudur: “Bu gün istər respublika ərazisində, istərsə də Bakı şəhəri üzrə qeydə alınan yol qəzalarının 70 faizi bu cür səbəblərdən baş verir. Eyni zamanda, dəfələrlə sürücülərə səslənərək onları yol hərəkəti qaydalarına riayət etməyə çağırırıq. Bir neçə gün əvvəl baş verən hadisədə sürücü sükan arxasında mobil telefondan istifadə etməklə yalnız özü üçün deyil, həm də digər yol hərəkəti iştirakçılarına da təhlükə yaradıb. Bu, birbaşa “Yol hərəkəti haqqında” Qanunun tələblərinin kobud şəkildə pozulmasıdır. Sükan arxasında telefondan istifadə etməklə qəza şəraiti yaradan sürücülər heç də qəhrəmanlıq etmirlər. Onlar aidiyyəti üzrə qanunun tələblərinə uyğun olaraq məsuliyyətə cəlb olunacaqlar”.
Həmsöhbətimizin sözlərinə görə, avtomobil yollarında baş verən qəzalar heç kimin şəxsi həyatı deyil: “Küçə və yollardan hər kəsin eyni dərəcədə istifadə etmək haqqı var. Vətəndaşların heç biri digərinin təhlükəsizliyini risqə atacaq qayda pozuntusuna yol verə bilməz. İctimai yerlərdə baş verən yol qəzaları heç kimin şəxsi həyatı ola bilməz. Sizin vasitənizlə həmin sürücüyə və onun timsalında bu cür qayda pozuntularına yol verərək qəza halları yaradanlara səslənirəm ki, bu, qəhrəmanlıq deyil. Bu kimi davranışlar, eyni zamanda, digər sürücüləri də qanun pozuntusuna çağırır. Buna yol vermək olmaz. “Yol hərəkəti haqqında” Qanunun tələbləri onlara riayət etmək üçündür. Qanunun tələblərini pozan hər kəs, kimliyindən asılı olmayaraq, məsuliyyətə cəlb olunacaq”.
Günel CƏLİLOVA
