Uzun müddət idi ki, Bakıda çoxmərtəbəli binaların idarəçiliyi ilə bağlı narazılıqlar yaşanırdı. Çoxmərtəbəli binalarda yaşanan əsas problem mənzil üçün çıxarışın alınması idi. Əksər MTK-lar mənzil sahiblərindən artıq pul əldə etmək üçün çıxarışı sakinlərə pulla verirdi. Bu kimi problemlərin həll olunması üçün cari ilin əvvəlində ölkə başçıs çoxmənzilli binaların istismarına icazə verilməsinin sadələşdirilməsi ilə bağlı fərman imzaladı. Həmin fərmana əsasən, 2019-cu ilə qədər tikilmiş və azı bir hissəsində sakinlər məskunlaşan binaların sadələşdirilmiş prosedurla istismarına icazə veriləcək. Bundan sonra vətəndaşlar çıxarış almaq üçün müraciət edə biləcəklər.
Çoxmərtəbəli binaların mənzil çıxarışının sadələşdirilməsi ilə bağlı Prezidentin imzaladığı fərmana baxmayaraq, bəzi MTK-lar yenə də öz bildiklərini etməkdə davam edirlər.
Bu günlərdə Binəqədi rayonu, Əcəmi Naxçıvani küçəsində ''Olimp'' MTK tərəfindən tikilən yaşayış binasında yaşayan sakinlər mənzillərinə çıxarış ala bilmədikləri üçün etiraz ediblər. Bakıda 200-dən çox ailə mənzillərinə çıxarış ala bilmir. Adıçəkilən MTK-nın yaşayış binasında yaşayan sakinlər mənzillərinə çıxarış almaq istəyirlər, amma şirkət tərəfindən onlara problem yaradılır.
Sakinlər bildirirlər ki, həmin binada yaşayan 200-dən çox ailə mənzillərinə çıxarış ala bilmir: “Olimp” MTK tikinti şirkəti mənzillər üçün ”protokoldan çıxarış”ı yalnız müəyyən pul qarşılığında təqdim edir. Şirkət bizə üç sənəd verməlidir. Daha doğrusu, şirkət bu sənədləri bizə verməyə borcludur. Biz də həmin sənədləri mənzilimizə çıxarış almaq üçün Əmlak Məsələləri Dövlət Komitəsinə təqdim etməliyik. Tikinti şirkəti isə o sənədləri yalnız pul qarşılığında vermək istəyir və bunun müqabilində bizdən qanunsuz olaraq özlərinin təyin etdikləri məbləği tələb edirlər. Halbuki, biz mənzili alanda evin pulunu onlara ödəmişik. Biz MTK-nın sədrləri Lətif Kərimov və İsmayıl İsmayılovla görüşürük və sözümüzü onlara deyirik. Onlar isə bizə sənədləri verməkdən yayınırlar”.
Sakinlər onu da iddia edirlər ki, “protokoldan çıxarış” sənədini MTK verməli olduğu halda, şirkət rəhbərliyi müxtəlif bəhanələr gətirərək bu sənədi verməkdən imtina edir: “Şirkət evin kvadratını 30 qəpikdən hesablayaraq özündən bir məbləğ çıxarır. Şəxsən mənim mənzilimə “protokoldan çıxarış” verilməsi üçün 6000 manat pul istəyirlər. Bunlar hamısı qanunsuzdur. Pulunu verib sənədlərini alan da var”.
“Olimp'” MTK - Lətif Kərimov: “Şikayət edən sakinlərin hər birinin tikinti şirkətinə kommunal ödənişlərlə bağlı borcu var”
Qeyd olunan ittihamların ciddiliyini nəzərə alıb “Olimp'” MTK ilə əlaqə saxladıq. MTK-nın sədri Lətif Kərimov “Bakı-Xəbər”ə açıqlamasında qeyd etd ki, sakinlərin səsləndirdiyi iddialar əsassızdır. Onun sözlərinə görə, şikayət edən sakinlərin hər birinin tikinti şirkətinə kommunal ödənişlərlə bağlı borcu var: “Biz sakinlərə dəfələrlə bildirmişik ki, borc ödənildikdən sonra onlara ''protokoldan çıxarış'' veriləcək. Lakin onlar borcu ödəmək istəmirlər. Kommunal borcu ödəyəndən sonra onların mənzil çıxarışı veriləcək. Burada problemli heç nə yoxdur”.
Ramil Osmanlı: “Qanunvericiliyə görə, MTK-lar mənzilin alqı-satqısı zamanı ''protokoldan çıxarış''ı alıcıya mütləq təqdim etməlidirlər”
Əmlak məsələləri üzrə ekspert Ramil Osmanlı bildirdi ki, qanunvericiliyə görə, MTK-lar mənzilin alqı-satqısı zamanı ''protokoldan çıxarış''ı alıcıya mütləq təqdim etməlidirlər. Ancaq, bir çox hallarda, şirkətlər bu qaydaya əməl etməyərək vətəndaşların hüquqlarını pozurlar.
Həmsöhbətimiz onu da vurğuladı ki, çoxmərtəbəli binalardakı mənzillərin dövlət qeydiyyatına alınmasının dövlət üçün həm hüquqi, həm də iqtisadi baxımdan çox böyük faydaları var: “Hüquqi baxımdan mövcud mənzil fondunun genişlənməsi, qeydiyyatının asanlaşmasına səbəb olacaq”.
Günel CƏLİLOVA
