Sabunçu rayonunun bəzi ərazilərində çirkab suların axıdılmasında problemlər yaşanır. Problem ondadır ki, mövcud kanalizasiya xətləri həmin ərazilərdə məskunlaşan əhalinin sayına adekvat deyil. Məskunlaşma o qədər çoxdur ki, bu səbəbdən kanalizasiya xətləri tez-tez tutulur. Bu da həmin ərazilərdə yaşayan sakinlər üçün ciddi problemlər yaradır. Belə yaşayış sahələrindən biri də Sabunçu rayonu 6-cı mədən adlanan ərazidir.
Sözügedən yaşayış massivində yaşayan Sabir Cəbiyevin sözlərinə görə, 6-cı mədəndə tez-tez kanalizasiya xətləri tutulur: “Nəticədə çirkab sular axa bilmədiyi üçün tutulur. Bəzən də elə olur ki, çirkab sular daşır. Burada bir neçə çoxmənzilli bina var, qalan evlərin hamısı fərdi inşa edilən evlərdir. Həmin evlər də əsasən 2000-ci ildən sonra tikilib. Hər ev tikiləndən sonra kanalizasiya xəttinə qoşulur. Nəticədə çirkab suları ötürməyə xəttin gücü çatmır. Bu səbəbdən tez-tez kanalizasiya xətti tutulur və üfunət iyindən dayanmaq olmur. Əgər mövcud kanalizasiya xətləri yenilənsə, o zaman çirkab suların axıdılmasında problem yaşanmayacaq. Çünki hazırkı xətt bir belə tullantını ötürmək gücündə deyil. Altıncı mədəndə hardasa 7 min nəfərdən çox əhali yaşayır. Ölkənin müxtəlif rayonlarından bura gəlib məskunlaşanlar var. Məskunlaşanların bir qismi məcburi köçkünlərdir. Yaşayış massivi Balaxanı qəsəbəsinin tabeliyindədir. Təxminən 8 il əvvəl buranın elektrik, qaz və su təchizatı bərbad vəziyyətdə idi. Su fasilə ilə verilirdi. Sakinlərin hamısı su çəni alıb vəziyyətdən çıxırdı. Normal qaz xətti belə yox idi. Şükürlər olsun, bütün bu problemlər öz həllini tapdı. İndi elektik enerjisi, qaz və su təchizatından əziyyət çəkmirik. Yolla da bağlı problem yoxdur. Problem yalnız kanalizasiya xətti ilə bağlıdır. İstəyirik ki, kanalizasiya xətləri yenilənsin”.
Yaşayış massivində olarkən həqiqətən də mövcud problem özünü göstərirdi. Məsələ ondadır ki, ərazidəki bir sıra yerlərdə üfunət iyindən qalmaq olmurdu. Çirkab suların normal axıntısının olmaması üzündən bəzi yerlərdə tullantı sularının əməllicə sızması müşahidə edilirdi. Bu səbəbdən ətrafa üfunət qoxusu yayılırdı.
Natiq Fərhadov: “...xoşagəlməz mənzərə ilə üz-üzəyik”
Altıncı mədən sakini Natiq Fərhadov deyir ki, tullantı suların axıdılmasında əvvəlki illərə baxanda indi problemlər daha tez-tez yaranır: “Ona görə ki, hazırki xətlər çirkab suları ötürmək gücündə deyil. O vaxt sözügedən xətlər ancaq binalar üçün nəzərdə tutulub. Sonra elə oldu ki, ətrafda çoxsaylı fərdi ev, obyektlər tikildi. Bu səbəbdən, bir növ, kanalizasiya xətti tıxanıb. Yayda vəziyyət daha pis olur. Üfunət iyindən gecələr həyətdə oturmaq olmur. Bəzən elə olur ki, axıntı olmadığına görə çirkab sular hamamın içinə qayıdır. O dərəcədə xoşagəlməz mənzərə ilə üz-üzəyik”.
Sözügedən məsələ ilə bağlı “Azərsu” Açıq Səhmdar Cəmiyyəti ilə gün ərzində bir neçə dəfə əlaqə saxlamağa çalışsaq da, bu mümkün olmadı.
Rəsul Cahangirli: “Əhalinin nizamsız formada məskunlaşması mövcud kanalizasiya xətlərinin normadan çox yüklənməsinə gətirib çıxarıb”
Məsələyə münasibət bildirən ekspert Rəsul Cahangirlinin sözlərinə görə, bununla bağlı bir sıra işlər görülməlidir: “Son illər Bakının su-kanalizasiya sisteminin yenilənməsi üçün bir sıra işlər görülüb. Yeni xətlər çəkilib, əvvəlki sistemlər yenilənib. Ancaq buna baxmayaraq, Bakıətrafı bir sıra ərazilərdə kanalizasiya xətləri qaydasında deyil. Elə yerlər var ki, ümumiyyətlə, orada kanalizasiya xətti yoxdur. Əhali kanalizasiya əvəzinə quyulardan istifadə edir. Yəni tullantı suları quyulara yönəldilir ki, bu da torpaqların ekoloji baxımdan çirklənməsinə gətirib çıxarır. Əsas problem həm də onunla bağlıdır ki, əhalinin nizamsız formada məskunlaşması mövcud kanalizasiya xətlərinin normadan çox yüklənməsinə gətirib çıxarıb. Ona görə də bununla bağlı xüsusu proqram hazırlanmalıdır”.
Vidadi ORDAHALLI
