İstedadlı uşaqlar qayğı ilə əhatə olunduqda onların istedadı cəmiyyət, dövlət üçün olduqca faydalı, gərəkli olur. Azərbaycanda hər zaman istedadlı uşaqlara xüsusi qayğı göstərilir, onların bilik və bacarıqlarının üzə çıxarılması üçün xüsusi layihələr həyata keçirilir. Azərbaycanda istedadlı uşaqlar üçün xüsusi siniflərin əhatə dairəsi genişləndirilib. Təhsil Nazirliynin yaydığı məlumata görə, 2019-2020-ci tədris ilində istedadlı uşaqlar üçün 102 xüsusi sinif yaradılıb.
Nazirlikdən verilən məlumata görə, hazırda Bakı, Sumqayıt, Gəncə, Mingəçevir və Şirvan şəhərləri ilə yanaşı, 47 rayon üzrə 82 məktəbdə, ümumilikdə, 162 xüsusi sinif fəaliyyət göstərir. 4000-ə yaxın şagird sözügedən siniflərdə təhsillərini davam etdirir.
Müvafiq siniflər üzrə il ərzində bir neçə dəfə səviyyə müəyyənləşdirmə imtahanı, müəllimlərin peşəkarlığının yüksəldilməsi istiqamətində seminar və mühazirələr təşkil ediləcək.
Bölgələrdə xüsusi siniflərin təşkil olunmasında məqsəd istedadı ilə seçilən şagirdlərin elmi potensialının inkişafı, onların müvafiq istiqamətlər üzrə daha keyfiyyətli hazırlığının təmin edilməsidir.
Qeyd edək ki, 2018-2019-cu tədris ilində Bakı şəhərində 18, Sumqayıt, Gəncə, Mingəçevir şəhərləri ilə yanaşı, Ağdaş, Bərdə, Xaçmaz, Quba, Şəki, Şəmkir, Zaqatala, Kürdəmir, Ağcabədi, İsmayıllı, Qəbələ, Sabirabad rayonlarında isə 29 məktəb olmaqla, ümumilikdə, 47 ümumtəhsil məktəbində VII və VIII siniflər üzrə istedadlı şagirdlər üçün 60 xüsusi sinif təşkil edilib. 7-ci siniflər üzrə riyaziyyat-informatika təmayüllü, 8-ci siniflər üzrə isə təbiət elmləri təmayüllü siniflər yaradılıb.
Xanım Qasımova: “...məqsəd istedadlı uşaqların beyninin inkişaf etdirilməsi, onların gələcək fəaliyyətinin elmə yönəldilməsi kimi məsələlərdir”
İstedadlı uşaqlar üçün yaradılan xüsusi siniflərin əhəmiyyətini şərh edən tanınmış təhsil eksperti Xanım Qasımova “Bakı-Xəbər”ə bildirdi ki, xüsusi siniflərin yaradılması Azərbaycan uşaqlarının gələcəyinə müsbət təsir göstərəcək. “İstedadlı uşaqlar üçün xüsusi siniflərin yaradılmasının böyük əhəmiyyəti var. Bu o uşaqların bilik və bacarıqlarından cəmiyyətin gələcəkdə istifadə etməsi üçün böyük şərait yaradır. Bilirsiniz ki, musiqidə, incəsənətdə xüsusi istedadı olan uşaqlar üçün xüsusi məktəblər var, gedib elə uşaqları rayonlardan, kəndlərdən axtarıb üzə çıxarırlar. Ola bilsin, hansısa bir uşağın hansısa bir istedadı olsun və o, xüsusi sinifdə oxuyarkən onun istedadı üzə çıxa bilər. Xüsusi siniflərdə istedadlı uşaqlara təkan verilir və onların istedadları cilalanır, inkişaf edir. Cəmiyyətə, gələcəkdə elmə faydalı olmaları üçün o uşaqları xüsusi olaraq hazırlayırlar. Bu siniflərdə onlar öz bilik və bacarıqlarını inkişaf etdirir, müəllimlər onları doğru ünvana yönəldirlər”.
X.Qasımovanın sözlərinə görə, bu gün dünya təcrübəsində də belə bir məsələ var. Dünyanın müxtəlif yerlərində xüsusi istedadı olan uşaqlar bir araya gətirilərək onlara dərslər keçilir. “Hələ əvvəlki dövrlərdə xüsusi istedadı olan uşaqları bir yerə yığb onları dünya olimpiadasına hazırlayırdılar. Bu ənənə indi də var. Dünya olimpiadasına hazırlaşan xüsusi şagirdlər olur ki, onları xüsusi müəllimlər hazırlayırlar. Azərbaycan məktəblərində yaradılan xüsusi siniflərdə həmin məktəblərin daha savadlı, seçilən müəllimləri dərs keçirlər. Xüsusi istedadı olan uşaqların dərsləri gücləndirilmiş proqram əsasında keçilir. Xüsusi siniflərin yaradılmasında məqsəd istedadlı uşaqların beyninin inkişaf etdirilməsi, onların gələcək fəaliyyətinin elmə yönəldilməsi kimi məsələlərdir. Bu uşaqların xüsusi riyazi biliyi, onların kəşfləri, yenilikləri ola bilər” - deyə X.Qasımova qeyd etdi.
İradə SARIYEVA
