Bakıətrafı kənd və qəsəbələrin əksəriyyətinin payız-qış aylarında bataqlığa çevrilən yol problemi ilə yanaşı, daha bir dərdi var. Problem ondan ibarətdir ki, bəzi qəsəbələrdə zibil yeşikləri yoxdur. Bakı və ətraf qəsəbələrin inkişafına dair dövlət proqramları sayəsində bu qəsəbə və kəndlərin çoxunda su, qaz, elektrik xətləri yenilənib. Ancaq məişət tullantılarını atmaq üçün münasib yerlər və tullantıların vaxtında daşınması hələ də ciddi problem olaraq qalır. Belə problemlərin mövcud olduğu qəsəbələrdən biri də Xəzər rayonunun Binə qəsəbəsidir.
Sözügedən qəsəbədə məişət tullantılarının daşınması ilə bağlı çox böyük problemlər var. Zibillər vaxtlı-vaxtında yığılmır. Bəzi qəsəbə sakinləri zibili torpağa basdırırlar. Problem ondadır ki, Binə qəsəbəsində zibil atmaq üçün zibil qutusu yoxdur. İstər bina evlərinin, istərsə də həyət evlərinin yaxınlığında zibil qutuları yoxdur.
Rüfət Mirzəyev: “Bu boyda qəsəbədə zibil qutusu yoxdur, kustar formada dəmir vedrələrdən zibil qutusu kimi istifadə edirik”
Bu barədə qəzetimizə şikayət edən Binə qəsəbəsi sakini Rüfət Mirzəyevin sözlərinə görə, sakinlər zibili blokun qarşısına yığırlar: “Həftənin ikinci günü bələdiyyə işçiləri zibili yığırlar. Bu müddət ərzində üfunət iyindən həyətə, bloka yaxın durmaq olmur. Gözləyirik haçan ikinci gün olar, gəlib zibili yığarlar. Bu boyda qəsəbədə zibil qutusu yoxdur, kustar formada dəmir vedrələrdən zibil qutusu kimi istifadə edirik. Eləsi var ki, zibili kisəyə yığır və qoyur bir kənara. Bu zaman sahibsiz itlər kisəni eşib zibili ətrafa yayırlar. Hansı ki, ağzı qapalı zibil qutuları olsa, nə üfunət olar, nə də digər problemlər. Bir sıra hallarda işə gedəndə evdəki zibilləri maşına qoyub harada qabağıma zibil yeşiyi çıxırsa, ora atıram. Bu zaman gərək mütləq qəsəbədən kənara çıxasan. Bələdiyyə işçiləri həftədə bir dəfə gəlib həyətdən zibili götürürlər. Bununla iş düzələr? Həyət evləri olanların bəziləri çarəsizlikdən zibili basdırırlar. Eləsi də var ki, qapının ağzına bir çəllək qoyub. Zibil yığıldıqca atır çəlləyə. Qışda bu o qədər də hiss olunmur. Hava soyuq olduğundan, üfunətin iyi o qədər də yayılmır. Əsl vay-müsibət yayda olur. Yay aylarında zibilin iyindən qapını açmaq blə olmur. O dərəcədə üfunət iyi ətrafa yayılır”.
Sözügedən məsələ ilə əlaqədar gün ərzində bir neçə dəfə Xəzər rayonu Binə qəsəbəsinin bələdiyyəsi ilə əlaqə saxlasaq da, telefonun dəstəyini qaldıran olmadı.
İlqar Hüseynli: “Binədə zibil qutusu ilə bağlı problem qəsəbə bələdiyyəsinin maliyyə vəsaitinin azlığı ilə bağlı ola bilər”
Məsələyə münasibət bildirən ekspert İlqar Hüseynlinin sözlərinə görə, Binə kimi böyük qəsəbədə zibil qutularının olmaması təəssüf doğurur. Onun fikrincə, bu, bir sıra problemlərdən qaynaqlanır: “Əslində, bütün kənd və qəsəbələr çeşidli zibil qutuları ilə təmin edilməlidirlər. Bu nə deməkdir? Bu o deməkdir ki, çörək üçün ayrı, digərləri üçün də ayrıca qutular olmalıdır. Təəssüflər olsun ki, bizdə bu yoxdur. Ümumi zibil qutularından istifadə olunur. Binədə zibil qutusu ilə bağlı problem qəsəbə bələdiyyəsinin maliyyə vəsaitinin azlığı ilə bağlı ola bilər. Çünki bələdiyyələrin zibildaşıyan maşınlarla bağlı problemləri var. Əksər bələdiyyələrdə əraziyə bir maşın xidmət edir. Digər problem odur ki, bələdiyyələrin zibil qutusu almağa yetərincə maliyyə vəsaiti yoxdur. Bütün bunlara baxmayaraq, ərazi mənzil idarəetmə orqanları var. Onlar da bu işə yardım etməlidirlər. Bəzən ikili idarəetmə problemlər yaradır. Ona görə də bununla bağlı bütün xidmətlər bələdiyyələrə həvalə edilməlidir. Belə olarsa, o zaman bəlkə bu problemlər öz həllini tapar”.
Vidadi ORDAHALLI
