Azərbaycanda arıçılığın inkişafı üçün əlverişli imkanlar var. Ölkəmizin gözəl iqlim şəraiti, zəngin bitki aləmi arıçılığın genişləndirilməsinə böyük təbii imkanlar yaradır. Arıçılığın inkişafı üçün yaradılan şərait nəticəsində Azərbaycan balı dünyanın əksər ölkəsində tanınır.
Məlumdur ki, Azərbaycanın bir sıra bal sortları var. Bununla yanaşı, Azərbaycanda yeni bal brendi yaradılır. Yeni bal brendinin adı “9 iqlim”dir. Azərbaycan Arıçılar Assosiasiyasının sədri Bədrəddin Həsrətov media nümayəndələrinə açıqlamasında bildirib ki, bu bal ilə artıq xaricdə maraqlanırlar: “Bildiyiniz kimi, Azərbaycanda bir sıra bal sortları var. Ancaq hazırda ölkədə yeni bal brendi yaranır, adı isə "9 iqlim"dir. Həmin balın tərkibi 9 regiondan əldə edilən və 9 müxtəlif sortda olan balların birləşməsi olacaq. Yeni brendlə artıq Almaniya maraqlanır və bununla bağlı iki dəfə görüş keçirilib".
Ekspertlərin fikrincə, yeni bal brendinin yaranması ölkə iqtisadiyyatına müsbət təsir edəcək.
“Hər bir regionun balı, eyni zamanda, digər kənd təsərrüfatı məhsulları həmin bölgənin xarakterik xüsusiyyətinə görə marka kimi qəbul olunmalıdır”
Aqrar sahə üzrə ekspert Nicat Nəsirli “Bakı-Xəbər”ə açıqlamasında qeyd etdi ki, bir sıra kənd təsərrüfatı məhsulları kimi, Azərbaycan istehsalı olan bal xarici bazara tam şəkildə çıxa bilmir: “Bunun bir sıra səbəbləri var. Bunun bir səbəbi yerli məhsullarımızın xaricdə aqromarketinq baxımından brendləşməməsidir. Məlumat üçün bildirim ki, hər bir məhsulun öz adı, markası olmalıdır. Məhsul üçün təyin olunan standart dövlət tərəfindən müəyyən olunmalıdır. Arıçılıq sahəsində mövcud olan problemlərdən biri də balın markalanmaması və qablaşdırılmamasıdır. Nəzərə almaq lazımdır ki, qablaşdırmanın özü belə standartdır. Xarici ölkələr qablaşdırılmamış məhsulu qəbul etmirlər. Çünki bal maye halında olan məhsuldur. Bununla yanaşı, qab üçün xüsusi tələblər müəyyən olunub. Dünya standartına əsasən, duru məhsullar üçün qablaşdırma ya taxta, ya da plastikdən ibarət olmalıdır”.
Həmsöhbətimiz onu da vurğuladı ki, hər bir regionun balı, eyni zamanda, digər kənd təsərrüfatı məhsulları həmin bölgənin xarakterik xüsusiyyətinə görə marka kimi qəbul olunmalıdır: “Məlumdur ki, Azərbaycanın bir sıra bal sortları var ki, məşhurdur. Məsələn, Arıçılar Assosiasiyası Kəlbəcər, Daşkəsən balına öz adına uyğun sertifikat verərək, brendləşdirib xarici bazara çıxara bilər. Bölgələr öz məhsullarının tanınması baxımından bu işdə fəal olmalıdırlar”.
Günel CƏLİLOVA
