Xalq arasında “ Semaşko” kimi tanınan 1 saylı Şəhər Klinik Xəstəxanasını çoxları kasıb-kusubun ümid yeri adlandırır. Bu xəstəxanada müalicə özəl klinikalara nisbətən ucuzdur. Bu səbəbdən də özəl xəstəxanalara gedə bilməyənlər şəfa tapmaq üçün “ Semaşko”ya üz tuturlar. Adıçəkilən xəstəxananın baş həkimi Ədalət Dadaşovun qanunsuz əməli ilə bağlı bu günlərdə bir sıra elektron xəbər portallarında məlumat yayıldı.
Qeyd olunur ki, baş həkim xəstəxanada bütün şöbələrdən qanunsuz olaraq pul alır, hətta bir neçə həkimi belə qanunsuz yerə işdən çıxarıb. Bildirilir ki, baş həkim hər ay hər şöbədən 3000 manat alır, hər həkim ayda 300 manat baş həkimə görüm-baxım edir.
İddia olunur ki, son 1-2 il ərzində əmək müqaviləsinin bir il uzadılması üçün 3 min manat haqq verməkdən imtina edən ixtisaslı, peşəkar həkimlərdən Travmatologiya şöbəsinin müdiri Alim Mirzəyev, Cərrahiyyə şöbəsinin reanimasiya müdiri Vaqif Rəhimov, Anestiziologiya şöbəsinin müdiri Fətəli Fətəlizadə, Neyrotravmatologiya şöbəsinin müdiri Əmirəli Yusifov, nevropatoloq Səlim həkimin əmək müqavilələrinə səbəbsiz yerə xitam verilib.
Əmirəli Yusifov: “İşdən çıxarılmamışam, sadəcə, rəhbərlik etdiyim şöbə başqa bir şöbə ilə birləşdirilib, rəhbərliyə də travmatologiya şöbəsinin rəhbəri gətirilib”
Deyilənlərə aydınlıq gətirmək üçün xəstəxanaya zəng vurduq. İlk öncə işdən çıxarıldığı iddia olunan həkimlərlə əlaqə saxladıq. Neyrotravmatologiya şöbəsinin müdiri Əmirəli Yusifov bizimlə söhbətində qeyd etdi ki, işdən çıxarılmayıb və hazırda xəstəxanadadır: “Mən işimdən çıxarılmamışam. Sadəcə olaraq, rəhbərlik etdiyim şöbə başqa bir şöbə ilə birləşdirilib, rəhbərliyə də travmatologiya şöbəsinin rəhbəri gətirilib. Burda nə var ki? Xəstəxanada islahatlar aparılıb. İnsan bəyəm ömrü boyu vəzifədə qalmalıdır? “Semaşko” xəstəxanası həmişə kasıb camaatın arxasında olub. Biz də olmayandan sonra görün vəziyyət necə olacaq, bu camaat hara gedəcək? Bu qədər böhtanı kim yazıb, bilmirəm, amma düz yazmayıb. Mən öz adımdan deyirəm, kimin ehtiyacı var, gəlsin, mən onu bir qəpiksiz müayinə edim. İşdən çıxarıldığı iddia olunan həkimlərin hər biri iş başındadır və xəstələrini müalicə edirlər”.
“Semaşko”nın baş həkimi Ədalət Dadaşov: “Söz yox ki, xəstəxanada nöqsanlar, çatışmazlıqlar var, ancaq mənim kimlərdənsə o qədər rüşvət almağım barədə deyilənlər həqiqət deyil”
Xəstəxananın baş həkimi Ədalət Dadaşov “Bakı-Xəbər”ə açıqlamasında qeyd etdi ki, deyilənlərin hər biri iftira və böhtandan başqa bir şey deyil: “Xəstəxananı, məni tənqid etmək olar. Amma bu qədər iyrəncliyə yol vermək olmaz. Bizim xəstəxanada söz yox ki, nöqsanlar, çatışmazlıqlar var. Amma mənim kimlərdənsə o qədər rüşvət almağım barədə deyilənlər həqiqət deyil və mən belə söhbətlərə əhəmiyyət vermirəm. Kimsə ağa qara deyirsə, mən durub sübut etməliyəm ki, ağ ağdır?”.
Baş həkim onu da vurğuladı ki, rəhbərlik etdiyi tibb müəssisəsi hər zaman əhalinin aztəminatlı təbəqəsinə dəstək olub: “Bizdə digər xəstəxanalar kimi müayinələr pullu deyil. UZİ, EKQ, rentgen müayinəsi, tomoqrafiya və digər prosedurlar, eyni zamanda, müalicə pulsuzdur. Yəqin kimsə məni ləkələmək üçün belə bir yolu seçib. Mən deyildiyi kimi, hər şöbədən, hər həkimdən pul alan olsaydım, xəstə müayinəsi də pullu olardı”.
Günel CƏLİLOVA
